1Korintus 14
14
Allah Agurengge nen wogisasinem inane inonggodek mende elalinat yigik, wene ʼbukakogo yogisigik, yiligogi wene
1Kinobabut akoni inebe inaʼbuwa dogoligogi eti mende kinobatnerogo yanggulko dogono. Yanggulko dogolik, Allah Agurengge nen inobabut dombok wogisaligogo wene eti indewerek asubagik nen, kinobatnerogo kagako dogono. Kagako dogolik, Allah wene ʼbukakogo yogisiligogi mende eti wokisawagaluk, nggogot dino o. 2Ta nen inane inonggodek mende elalinat yiligogo eti, Allah Agurengge akla dogolik wene limago mende yiligogo eti paga, akoni yogisiligogi dek mendeat, at Allah yogokonem, akoni amberek nen didiligogi dek o. 3Esigit dilugat mende, at ta nen Allah wene akoniat ʼbukakogo yogisasinem, inendainggen aik wakik, inasuk wakik, inendainggen sebelkik, kagarigogo o. 4Mende, at inane inonggodek mende elalinat yiligogo mende eti, at enggaerek endainggen aik warligogo o. Mende, at omanggi Allah wene akoni ʼbukakogo yogisaligogo mende eti arlek Allah aʼburi nandorligogi mende taʼbokogonat inendainggen aik wat diyaligogo o. 5Akoni inane inonggodek mende elalinat yiligogi eti ʼbugurlagat erlok dek negen mende, Allah wene akoni ʼbukakogo yogisiligogi eti arlek, nggok mondok o. Eti paga kit kinebe taʼbokogonat akoni inane kinonggodek mende elalinat yumo, an warlok mendeat, ebe pano mondok, kit nen Allah wene ʼbukakogo yogisasi dogusak etiat warlok o. Mende, inane kinonggodek mende elalinat yugun kalok, yabunggane Allah aʼburi amberek inendainggen aik wat diyawogoluk, kit kinane paga motogo yumoat, pano. 6Nagarlagi nirugi o. An yabunggane inane ninonggodek mende elalinat yokisa wagi kalok, eti paga panot kinabusak nogo? Wene Allah akla mende ʼbukakogo yigidegat, wene nilu mende yokisigidegat, Allah wene yokisigidegat, wene dikogo yanggul kisigidegat kalok, panot kinabusak nogo? 7Yi pinggon ndi pinggon windabo inom, gitar negen mende inom, aborlok dek mende aneget kasinem, ane yiligogo mende, ane nggut asokondek dombok yigidek kalok,
“I, ane eti mende yeke,” yiluk ninggit diluk didusak nogo. Erlok dek o. 8Akoni wim luwogoluk amitmit yiligogi kak, pinggon omanggi ane nggok yiligogo mende eti, ane nggut nil-kiltogo yisi kalok,
“Yogo, yogondak wim abuwogoluk kigi,” yiluk dikogo didigidek ta nen obabut kwalogo kagasusak nogo. Erlok dek o. 9Eti kagat, kit nen inane kinonggodek mende elalinat yisi dogolik, kinambe paga nen wene dikogo yigidekma, wene eti ninggit diluk dikogo inilu asusak. Erlok dek o. Ongga kerlengga yogoko dogusak o. 10Agat oba yi akoni ndi akoni inane dombok dogalegat werek ambaligogi. Mende, inane eti yugunat yiligogi ʼbuk. Dikogo yisinem didusak arlek o. 11Esigit diluk mende, it inane nggut mbalekma an nonggodek kalok, at omanggi nen yisinem, an nen nasuk ninggit diluk kolusak. Nen, an nane yisinem, nane nggut mbalekma, at nen nane ninggit diluk asuk kolusak. Erlok dek o. 12Eti paga, Allah Agurengge nen inobabut dombok wogisaligogo mende eti wokisawagaluk kinakla warlokogo kagarigogi mende, Allah aʼburi inendainggen aik wat diyausak mende kalok nggokogo wokisawak nen, etiat nggogot dino. 13-14It amberek inane an nonggodek mende paga elalinat sembayan yisi dogolik, nendainggen oba nen yiligogo mendeat, ebe didiligogo mondok dek eti paga, at omanggi nen it amberek inane onggodek mende paga elalinat yiligogo mende eti nen yisi dogolik,
“Allah Nombae. Inane inonggodek mende eti an nenggaerek nane paga motogo yogisasi dogik nen, kat Kagurengge nen inobabut wogisaligogon etnogo mende omanggi woknisuwak o,” yiluk sembayan yisi dogowak o. 15Eti paga, an ninggit diluk kagasik. Yigit diluk kagasigin. Sembayan eti, Allah Agurengge nen yoknoko nggorlek inane nonggodek mende paga elalinat yigik, ninenggaerek ninane paga nendainggen didiluk nen yigik, yigin o. Nen, endai eti Allah Agurengge nen yoknoko nggorlek inane nonggodek mende paga elalinat wakik, ninenggaerek ninane paga nendainggen didiluk nen wakik, kagasiginat o. 16Eti kagat, kat omanggi nen Allah Agurengge nen yokogo nggorlek inane konggodek mende elalinat yisi dogolik,
“Allah Nombae,” yiluk keyagi wasigin kalok, at omanggi onggodek mende nen didigidek dogolik,
“Wene yeke eti ebeat asuwak,” yiluk yu kak,
“Amin,” yiluk yusak nogo? Wene kat yigin eti, at onggodek nenat yusak erlok dek o. 17Eti paga, kat nen esigit diluk Allah keyagi panorogo wasigin mende, at eti endainggen aik wat digin nogo? Dek o. 18Inane inonggodek mende elalinat yiligogi eti, kit nen ʼbugurlagat yiligogi. An narligat dogalegat yiligogo yiluk,
“Allah Nombae,” yiluk keyagi warigogo o. 19Mende, an Allah aʼburi ninom nandorlek dogolik wene yanggul isagaluk, inane nonggodek mende elalinat dogalekogo 10.000 negen yigidek, didusak mende nane ʼbugurlagat 5 pagaat yumo pano yiluk yogisiligogo.
20Nagarlagi nirugi o. Wene kinakla eberigogi eti, elegerlak inakla eberigogi kak ebeko dogogup. Ngget endago mende nen weyak kagako inonggodek dogoligogi kak dogolik, kinendainggen inarluwe inendainggen negen korlerogo dogono. 21At ninombae Allah Endaganggok nen ninasuk wakike wene paga wene omanggi men yisikemo kolal mbalek werek,
“An nen akoni yoma, wene it amberek inane nggut mbalek mende inane paga yogisigik, it amberek kuso mende inambe paga yogisigik, yigin o. Esigit diluk yogisagin mendeat, inasuk kolugun dek o,” (Yes. 28:11-12; Ul. 28:49)
yiluk yisikemo kolal mbalogo ʼbisuka.
22Wene Allah Agurengge nen yogisasinem inane inonggodek mende paga elalinat yiligogi eti, akoni inendainggen Allah oba panggot diligogi mende eti diduwagaluk yiligogi ʼbuk. It amberek inendainggen Allah oba panggot digidek mende eti nen diduwagaluk esigit dilugat yiligogi o. Mende, Allah Agurengge nen wogisasinem, Allah wene ʼbukakogo yogisiligogi eti, inendainggen Allah oba panggot digidek mende pasik ʼbuk. It inendainggen Allah oba panggot diligogi mende nen diduwagaluk yogisiligogi o. 23Kit Allah aʼburi omanggimo nandorlek dogolik, kinebe taʼbokogonat nen inane kinonggodek mende paga elalinat yisinem, it wene inonggodek mende inom, inendainggen Allah oba panggot digidek mende inom, kinoba unggi witluk, it nen,
“Yoma kunu-gunu agakasik yiligogi o,” yiluk yokisagun dek nogo? Yokisagunat o. 24Esigit diluk mende, kit kinebe taʼbokogonat nen, Allah wene ʼbukakogo yisinem, at omanggi endainggen Allah oba panggot digidek mende inom, wene onggodek mende inom, kinoba unggi witluk, at nen men yusak,
“Iya. An weyak kagakima wene noba werek kigi o,” yiluk akla ambasinem, 25at Akla limago mende ʼbuwalasigin. ʼBuwalagonem obabut sebekogo esigit diluk at ebe soma yiluk Allah pogorako dogolik, men yigin,
“Eberogonat Allah kinom werek o,” yiluk yokisagin o.
Allah aʼburi nandorlek dogolik kagako dogusak wene
26Eti paga, nagarlagi nirugi o. Ninggit diluk kagako dogusak. Yigit diluk kagako dogusak o. Kit kinebe nandot diluk, at omanggi nen Allah endai iya yigik, at omanggi nen wene dikogo yanggul kisigik, at omanggi nen Allah wene akla mende yokisigik, at omanggi nen wene inane kinonggodek mende paga elalinat yisinem, at omanggi nen kit kinane paga motogo yokisigik, kagako dogolik, Allah aʼburi inendainggen aik warogo yi wene ndi wene taʼbokogonat erlogat esigit diluk yisi dogusak o. 27It amberek nen, inane inonggodek mende paga elalinat yuwogoluk kalok, inebe mbere a? Kenagan a, yumo pano. Mbere o, mbere o, yusak dek. Mende, alep-yabungga yisinem, at omanggi nen kit kinane paga motogo yokisasi dogusak pano. 28Mende, at omanggi kit kinane paga motogo yokisausak mende ebe dek kalok, it inane inonggodek mende elalinat yiligogi mende eti, Allah aʼburi nandorlek werekma etoma inane degat dogusak. Inane degat dogolik, inakla nen Allah at yogoko dogowak o. 29Nen, Allah wene yogisiligogi mende eti inebe mbere nen a? Kenagan nen a, yokisausak. Esigit diluk yokisasi nggorlek, kit amberek nen, wene mot yiligogo yigik, nggorlo yiligogo yigik, aren mbalko dogusak o. 30Esigit dilugat mende, Allah nen at omanggi korek welaga mende wene akla nggagalko kalok, yokisawak nen at alep yokisaligogo mende eti, ane dek puk asusak o. 31Eti kagat kinebe taʼbokogonat nen wene yanggulogo kinilu agik, kinendainggen nggaguk yigik, kagasuwogoluk kinebe taʼbokogonat omanggindek omanggindek alep-yabungga Allah wene ʼbukakogo yogisasi dogusak o. 32-34At Allah yugunat-yaganat kagarigogo mende ʼbuk. At te, mot-mot arlek kagarigogo eti paga, it ap Allah wene yogisiligogi mende eti, wene yogisasi dogowagaluk at Agurengge nen inobabut wogisiligogo mende eti inde atluk dogolik, inenggaerek nenat,
“An yigit diluk yogisak ndigit diluk yogisak,” yiluk yisi dogusak o.
Wene Allah nen ninasuk wakike wene etnogo paga kolal mbalogo ʼbisi dogolik,
“Kumi inane degat ap inapma dogusak,” yiluk yisike eti paga, Allah aʼburi o yi ai ndi ai nandot diluk dogoligogi kak, kit kinebe nandorlek dogolik, kumi inane degat dogusak o. Inaneyak walko dogusak dek o. 35Mende, it kumi nen wene omanggi yanggul uwogoluk kalok, Allah aʼburi nandorlek werekma, inaneyak walusak dek eti paga, inaguma lalok inenggaerek inagoni inoba kinok waganusak o. 36Allah wene o yi ai ndi ai liligogo eti erlo kit nogo? At te, kit kinake arlek kinoba yokisa waguka nogo a. 37At omanggi nen,
“An nen Allah wene yokisawagaluk, Allah Agurengge nen nobabut eti woknekemo,” yigik, at te,
“Ninat mende kagasuwagaluk woknekemo,” yigik, yisi kalok, at nen,
“Wene Paulus nen yeke eti, ninewe Endaganggok nen ninasuk wakike mende, kolal mbalogo ninoba laʼbi waga o,” yiluk didiluk waganuwak o. 38Mende, wene eti waganggidek togot diyasi kalok, kit nen ap eti ebe waganggidek togot diyasi dogono. 39Yogo. Nagarlagi nirugi o. Allah wene ʼbukakogo yogisasi doguwogoluk nggogot diluk kinobatnerogo kagako dogono. Mende, it amberek nen inane inonggodek mende elalinat yuwogoluk yisi kalok, wenemuk mbalusak dek o. 40Mende, yi wene ndi wene panorogo yigik, mot-mot yigik, yisi dogono o.
Currently Selected:
1Korintus 14: DNA
Highlight
Copy
Compare
Share
Want to have your highlights saved across all your devices? Sign up or sign in
