1Korintus 12
12
Allah Agurengge nen ninobabut dombok woknisiligogo wene
1Nagarlagi nirugi o. Allah Agurengge nen woknisiligogo wene eti kinonggodek dogusak eti naʼit. 2Kit alebat ninewe Endaganggok kinonggodek werekma, obabut weyak mende nen ngganengge ane dek mende oba panggot diluk dogowagaluk, nggomangge salek wokisek lalok nen, nuket dinagasi lagike eti kinilu. 3Wene yi kinilurogo yokisak. Akoni Allah Agurengge inakla werekma,
“At Yesus Allah nen weyagat duwak o,” yiluk alem ʼbusak erlok dek o. Nen, Allah Agurengge inakla dek kalok,
“Yesus an newe Endaganggok,” yiluk yusak erlok degat o. 4Ninobabut dombok ninasokondek dombogat woknisiligogo eti, Allah Agurengge omanggiat mende nenat woknisiligogo o. 5At ninewe Endaganggok eyabu asokondek dombok kagat diyiligogi mende eti, at ebe omanggiat mende, eyabu kagat diyiligogi mende o. 6Eyabu esigit diluk kagat diyasi dogolik, nininggi ninasokondek dombok kagarigogi mende eti, ebe taʼbokogonat kagasuwagaluk, ninombae Allah omanggiat mende nen ninebe dombok obatne woknisiligogo o. 7Akoni nen,
“It Allah Agurengge inakla werek,” yiluk enggagat didinanuwagaluk, at nen, ninebe taʼbokogo panot ninabuwagaluk ninakla dombok nggagaligogo mende, 8At Allah Agurengge nen, at omanggi wene nggagalogo yisi dogowagaluk wogorigogo mende. Nen, at Agurengge eti nenat, at omanggi yi wene ndi wene ilu mondok atluk yogisawagaluk wogorigogo mende. 9Nen, at Agurengge omanggiat eti nenat, at omanggi endainggen Allah oba panggot diluk mondok dogowagaluk ninat wogorigogoat. Nen, at Agurengge omanggiat eti nenat, at omanggi nen u pano kagarinako dogowagaluk obatne wogorigogoat. 10Nen, at omanggi yi mende ndi mende elalinat kagako dogowagaluk wogokik, at omanggi nen Allah wene yogisasi dogowagaluk wogokik, at omanggi nen yisi dogolik,
“At eti Allah Agurengge akla dogolik kagarigogo, yigik, weyak mende agurengge akla dogolik kagarigogo, yigik,” enggagat mbenako dogowagaluk wogokik, at omanggi nen inane onggodek mende elalinat yisi dogowagaluk wogokik, at omanggi inane inonggodek mende yisinem, at asuk kol diluk nen, ebe yigit diluk mende pasik yeke yiluk it inane paga mot-mot yogisasi dogowagaluk wogokik, inebe dombok wogisaligogo o. 11Esigit diluk wogisaligogo eti, Allah Agurengge omanggiat eti nenat akla ambalok, yi kagakik, ndi kagakik, kagako dogowagaluk inebe dombok minggirlogo wogisaligogo o.
“Nit nininggi niniyok yi mende ndi mende dogalegat ninoba kunik werek mende, ninebe omanggiat,” yiluk yogisasike wene
12Nit akoni ninebe omanggiat mende, nininggi, niniyok, ninebe paga dogalegat kunik werek. Nininggi niniyok ninebe paga yi mende ndi mende dogalegat kunik werek mende, dambukogo ninebe omanggiat eti kak, at Kristus ebe esigit dilugat o. 13Nit ninebe taʼbokogonat Yahudi mende inom, Yunani mende inom, inanduwanengge mende inom, inasokneat dogoligogi mende inom, at Kristus ebe omanggiat mende ninom kunogo ʼbinanuwagaluk, at Agurengge nen ima wusa ʼbinanggike o. Nen, i elesi omanggiat mende niligogi kak, at Agurengge omanggiat mende ninakla ʼbisike. 14Nit akoni ninebe nininggi omanggi eti arligat ʼbuk. Nininggi niniyok ninebe paga yi mende ndi mende dogalegat ninebe paga kunik werek o. 15Niniyok yi ane werek dogolepma, at nen yisi dogolik,
“An nebe ininggi ʼbuk. Ninat, eti paga, inebe paga kunik werek dek o,” yiluk yumo ane esigit diluk yigin eti paga, ninebe paga kunik mende eti, asokneat dogusak ambegep a? Erlok dek o. 16Ninasuk yi ane werek dogolepma, at nen yisi dogolik,
“An nebe inilenggen ʼbuk. Ninat eti paga inebe paga kunik werek dek o,” yiluk yumo ane esigit diluk yigin eti paga ninebe kunik mende eti asokneat dogusak ambegep a? Erlok dek o. 17Ninebe yi ninilenggen arlek dogolepma, ninasuk ninggit diluk kolko dogolep. Nen, ninasuk arlek dogolepma, obasi ninggit diluk mbalko dogolep. 18Mende, at Allah nen akla ambalok nenat nininggi niniyok ninebe yi mende ndi mende ninebe paga kunik werek yoma obalikmo dombok kunogo ʼbinanggikemo ninebe omanggiat werek o. 19Ninebe yi, nininggi eti arligat dogolepma, ninebe ninggit diluk dogolep. 20Mende, nininggi niniyok yi mende ndi mende ninebe paga dogalegat kunik werek mende, ninebe omanggiat o. 21Eti paga, ninilenggen nen, nininggi yogoko dogolik,
“An, kat dekma pano dogolep,” yiluk yusak erlok dek o. Esigit dilugat, ninunggulowak nen niniyok yogoko dogolik,
“An, kat dekma pano dogolep,” yiluk yusak erlok degat o. 22Ninebe omanggiat mende, nininggi niniyok yi mende ndi mende ninebe paga kunik dogoligogo mende eti, omanggi obatne dek negen ambasi mende, eti pano mondogat o. Dekma ninggit diluk kagako dogolep. Erlok dek o. 23-25Nit nininggi niniyok ninebe paga kunik dogoligogo mende eti, omanggi elokonggen pano kalok, agubak kagasusak dek. Mende, omanggi elokonggen weyak kalok, agubak pano kagarogo ʼbigik, omanggi ninenggarli asusak kalok limago ʼbiluk agubak panorogo kagarogo ʼbigik, kagarigogi. Nininggi niniyok yi mende ndi mende ninebe paga kunik dogoligogo mende taʼbokogonat omanggi nen omanggi aʼbuwa kigik, kagako dogowagaluk, at Allah nenat ninebe agubak kagarogo winamet dinanggike. Winamet dinanggo dogolik, nininggi niniyok ninebe paga kunik dogoligogo mende taʼbokogonat, agot lasunogo yiluk elokonggen weyak kalok, agubak kigilogo kagakik, kagako dogowagaluk, obalikmo dombok kun kigik ʼbinanggike o. 26Nininggi niniyok yi mende ndi mende ninebe paga kunik dogoligogo mende, omanggi aik nen kenet wako kalok, ninebe abirat kenet warigogo mende o. Nen, nininggi niniyok yi mende ndi mende ninebe paga kunik dogoligogo mende, omanggi akoni nen pogorako kalok, ninebe abirat ninakla arlenggen kiligogi mende o.
27Kit kinebe dambukogo Kristus ebe kagat dogolik, kinebe dombok, at inggi iyok negen oba kunik werek o. 28At Allah nenat, aʼburi ninobalikmo dombok ʼbinanggo dogolik, alebagik nit at ane yogisilik noko dogowagaluk ninayonggo ʼbigik, ninomborlik at ane yogisasi dogowagaluk it amberek inayonggo ʼbigik, it inomborlik wene yanggul isasi dogowagaluk it amberek inayonggo ʼbigik, it inomborlik elalin mende kagako dogowagaluk it amberek inayonggo ʼbigik, it inomborlik akoni amberek u warek mende kagarinako dogowagaluk it amberek inayonggo ʼbigik, nen, yi mende ndi mende yamagiyasi dogowagaluk it amberek inayonggo ʼbigik, ineugi nggokndek mendek dogowagaluk it amberek inayonggo ʼbigik, akoni o ya mende nda mende inane inonggodek mende paga wene yisi dogowagaluk it amberek inayonggo ʼbigik, ninebe dombok esigit diluk ninayonggo ʼbisike. 29Nit taʼbokogonat eti ninebe dombok, at ane wolok lowagaluk ninayonggo ʼbisike mende werek mende nogo? Nit taʼbokogonat Allah wene yogisaligogi mende nogo? Nit taʼbokogonat wene yanggul isaligogi mende nogo? Nit taʼbokogonat elalin mende kagarigogi mende nogo? 30Nit taʼbokogonat akoni amberek u kagarinabigogi mende nogo? Nit taʼbokogonat akoni o ya mende nda mende inane ninonggodek mende paga wene elalinat yogisaligogi mende nogo? Nit taʼbokogonat inane ninonggodek mende yisinem ninane paga mot-mot yiligogi mende nogo? Dek o. 31Eti paga, nagarlagi nirugi. Allah Agurengge nen ninobabut dombok woknisiligogo eti mende, ebe pano mende wokisawagaluk kinobatnerogo kagako dogono o.
“Akoni inebe inaʼbuwa dogusak,” yiluk yogisasike wene
Wene yokisigi eti panoat mende, pano mondok kagako dogusak mende yanggul kisak.
Currently Selected:
1Korintus 12: DNA
Highlight
Copy
Compare
Share
Want to have your highlights saved across all your devices? Sign up or sign in
