Eclesiastés 1
1
Di bitik laih dauh manahki
1-2Adika balna kuduh sumalwa muihni#1.1-2 Sumalwa muihni: uhulna ūk balna yakat kaput yulwi. Hibru kau laih amangladaski. kulnin lani balna kidika, Devid walanibis, Jerusalén yakat king kana dai kidika.
¡Adika laih dauh alas yulni manah ki, adika laih dauh alas yulni manah ki!
¡Bitik laih dauh alas yulni manah ki!
3¿Muih kidika ais yakwih
sau akat wark parasni yamwa manah?
4Muih buas kidika laih batatahnwi, ūk balna kidika laih dadauwi,
kaunah sau kidika laih satuk bik kalwas ki.
5Ma kidika kalahwi, ma kidika puklakwi,
dawak sirihni palni watwi pāni yakat kiwi
watwi kalahna atnin yulni.
6Wing kidika wadah niningyak wauhwi,
dawak usnit kat tingpal niningyak awaihwi kiwi.
¡Wing kidika laih wat wat awaihwi!
¡Awaihwi watwi awaihwi!
7Was balna bitik laih kuma yakat uiwi,
kaunah kuma kidika laih sip bangwas ki;
dawak was balna kidika laih watwi angkaupak kalalahna kat pāni yakat uiwi
tani kidika munah watwi murna atnin yulni.
8Sip muihni as bik diski yulna atnin
di balna bitik kau ampus dilunglakwa kidika;
muih as bik talwas ki dawak bik dakawas ki aitani palni
isninglak kapat dana atnin.
9Di as bik dis karang muhnilau kau dis dini dai kidika;
di as bik kalwas karang ki muhnilau kau kalwasdai kidika dini.
¡Adika sauni akat laih di as bik wisamni diski!
10Muih laih aput yulwarang ki:
“¡Adika dini laih wisam ki!”
Kaunah kidika laih uman muhnilau kau kalahna
kurih andat bayakna, mayang dismayang tanitkau.
11Di balna bayakna dini kidika laih dinitkahnin yakat bubukna,
dawak di balna baisa kaiwi kalahwas balna kidika bik dinitkahnin yakat bubukna karang ki
usnitkauh aiwarang balna kidika pasyakat.
Sumalwa muihni di balna talwi bayakna kidika
12Yang, sumalyang muihni yang adika laih, Jerusalén yakat Israel kingni yang dai, 13dawak kulnik aslah palni dutik sins tuhni karak waltik talnayang dai adika sauni akat di balna yamnin bitik yakat. ¡Truknin dini tikini palni Papang yaklau dana kidika muih balna minitna yakat kidika kau sau yakat dilakna atnin yulni! 14Dawak yang amanglanayang dai adika sauni akat di balna bitik yamnin kidika dauh alas manah ki, kidika laih wing kidika laihnin kapat yamdi.
15¡Dawak di kawaini kalna kidika sip barangni yamdaski, dawak sip bik kul'yakdas ki di as didis kaupak!
16-17Bahang yang alas muihki yakat yulnayang dai: “Akat yadutamana, muih nuhni as kalna, sins nuhni duyang muhnilau kau Jerusalén yakat king kakana balna kidika karak dawakat;#1 Re 4:29-31. sins tuhni yakat dawak amanglanin yakat bik āwanayang di balna kidika waltik talna atnik yulni, dawak sins dis lani dawak tapdadas lani yakat bik āwanayang kaput karak amanglana atnik yulni kidika kaput bik wing kidika yakat laihnin yamda kidika.” 18Rahm kidika laih, sins tuhni nuhni kat, dutni kidika nuhni palni maiyamwi; di kidika mahni palni amanglada kat, dalani kidika baisa wauhdi.
Currently Selected:
Eclesiastés 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998