Apastil Balna Warknina 1
1
Spirit Holi kalanin pranimis
1Wauhkitaya tatuna kidika yakat, Teófilo yamni palni,#Lc 1:1-4. yang lawik Jisas tatuna kaupak di yamna balna dawak sumalna balna 2dawak mahka makau kisang yakat kilwi kiuna mani kat kidika ulnayang. Baisa witing kiwas tanit yakat, witing amput atnin kidika disumalna dai Spirit Holi munah, witing apostel balna walwi yakna dai yakat, witingna ais yamnin dai kidika. 3Dawak dauna usnit kat witing muihni nuhni lāih kalahwi niningnakana, witing dauwas kidika. Ma 40 praisni dāwak kaltatalna dai, dawak Papang king kāwa lāni balna kidika diyulna dai.
4Witing baisa apostel balna karak bangdai mani balna yakat Jisas diyulna dai witingna Jerusalén kaupak uinin awas ki. Diyulna:
—Tahatanauh Papangki pramis manayamna kidika kaiwi kalahwarang kat,#Lc 24:49. kidika yulni kuduh yang manayulnayang dai. 5Rahmki, Jan witing was karak manautuhwi yakna, kaunah nai awaskat manna laih Spirit Holi karak manautuhwi yakwarang.#Mt 3:11; Mk 1:8; Lc 3:16; Jn 1:33.
Jisas makau kisang yakat kilwi kiuna
6Dawak Jisas karak bangdai kidika balna kalyulwi dakakana:
—Dawan, ¿Israel kingni lani kidika watta āmayah?
7Jisas nangnitnalana:
—Manna amanglanamna dini awaski, mampat mani Papang yamwarang kidika, kat witing manah parasni duwa bahang yamnin; 8kauna Spirit Holi kidika kaiwarang kat manna mamatna yakat, manna parasni dutanama, dawak alahwa yang yulki yultanama, Jerusalén yakat, Judea, Samaria, kaput bik sau naikau balna yakat bik.#Mt 28:19; Mk 16:15; Lc 24:47-48.
9Adika yulni yulwak talwabangkat Jisas kidika mahka duwi kiuna, dawak mukus pasyak āna, bahang watwi talwas dadana.#Mk 16:19; Lc 24:50-51. 10Dawak witingna Jisas kidika amput makau kisang yakat kilwi kiwa kidika talwabangkat, muih ahal bu praknina pihni kat kawi witingna yaihnitna yakat yaklauna raudai 11dawak yuyulna:
—Galileo ahalni balna, ¿ais yamta makau kisang yakat talamanah? Sihm adik Jisas kuduh manna pasmangna yakat likdai kidika, bahang waralaih makau kisang yakat duwi kiuna, kaput bik wat nawatwi kaiwarang, amput kiwak talnamana kaput.
Judas pāni yakat Matías kidika yakna
12Olib asangni kaupak, apostel balna kidika nawatwi uina Jerusalén yakat: ta barangni parahni munah uina, urupnin mani#1.12 Urupnin mani: kidika laih satadi. lā āna kaput, ta naini lapaknin awas. 13Witingna tawan nuhni yakat uiwi kakana, dawak ū uptis makau bangdai yakat kikilna. Adika balna dai: Pita, Jan, Jims, Andru, Pilip, Tomás, Bartolomé, Mateo, Jims, Alpius walanibis dai kidika, Saiman, Celote balna kaupak as dai kidika, dawak Judas Jims walanibis.#Mt 10:2-4; Mk 3:16-19; Lc 6:14-16. 14Adika balna bitik kalududuhwādai minitna yulnin, Jisas wirahni balna karak, Mery witing nanangni, dawak yayal ūk balna dai kidika karak bik.
15Bahang kidika mani balna yakat, kulyang balna kidika muih 120 dai kidika kalududuhna, dawak Pita yaklauwi yulna: 16“Wirah balna, Spirit Holi Devid munah yulna dai kidika, kaiwi kalahnin dai, Judas yulni, kidika witing waihla balna taninatuna kawi duwi kiuna dai Jisas yakat laihna atnin. 17Judas kidika mayang paskaupak dai, dawak mawarkki kidika witing bik yamwadai. 18Kaunah witing kiwi sau as bakanna, dutni yamwak minitlauwi kalalana dai kidika lalahni karak, kidika usnit kat, tunan tani bukwi tutwi dauna, dawak bani balna bitik kurwi kalahna dai. 19Bahang Jerusalén muihni balna dakawi, witingna kidika sauni ayangni Acéldama papakna, kidika tanka laih ‘Ā sauni’.#Mt 27:3-8. 20Kat Salmo wauhnitaya yakat yulwa kaput:
‘Ūni kidika kauhmak wanilang as kalahwarang,
dawak muih as bik yakat sip yalahwas karang.’#Sal 69:25.
Dawak aput bik yulwi:
‘Witing warkni kidika muih ūk duwarang.’#Sal 109:8.
21“Mapasking akat ahal dudi, bahang witingna laih ma bitik yakat mayang karak dai, Dawan Jisas mayang karak dai mani balna yakat, 22Jan yaklauwi was utuh'yakna kaupak,#Mt 3:16; Mk 1:9; Lc 3:21. makau kisang yakat kilwi kiuna kat.#Mk 16:19; Lc 24:51. Kaput bahang kidika balna as mayang mapasking yakat ānin wantki, kaput laih kalpakdi witnis yulnin, Jisas kidika yaklauna sauū kaupak.”
23Kaput laih muih bu yayakna: José, Barsabás, dawak bik Justo bik kalyuyulwadai, dawak Matías. 24Dawak witingna aput minitna yuyulna: “Dawan man muih balna bitik kulninna talaman kidika, nikingnakata, bu adika kaupak angdika palni yakta dunamahn 25kaput laih witing apostel warkni Judas dutni yamwi dispamna kidika pāni yakat duwarang, kat Judas laih witing pāni palni yakat kiuna bahang.”
26Dawak suerte yakwi tatalwak Matías minitkat bukna, kaput laih kidika minitni kaupak 11 balna pasyakat kāna dai.
Currently Selected:
Apastil Balna Warknina 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998