Apastil Balna Warknina 2
2
Spirit Holi kaina
1Dawak Pentecos alasnina#Lv 23:15-21; Dt 16:9-11. mani kaina kat, kulyang balna kidika bitik kaluduhna bangdai pa aslah. 2Sirihni kaupak, makau kisang kidika yakaupak, yulni parasni yulwi kaina, witingna bangkidika ūni yakat laihwak parasni yulna. 3Dawak witingna bangkidika minitna yakat kuhpau kapat dahlna, dawak sahwi kalahwi witingna minitna kat kat uiwi wawatna. 4Dawak witingna bitik Spirit Holi dibuhngdana dai, dawak muih ūk tuni karak yuyulna, amput Spirit yaklauwi diawa kaput yuyulna.
5Kidika mani balna yakat, Ju muihni balna kidika Jerusalén yakat uiwi makatyulnin ūni yakat ais yayamwadai kidika yayamna, pa ūk ūk balna kaupak bik uina dai. 6Di parasni yulwa kidika talnin yulni muih kalududuhna dai, witingna amanglalawasdai ais kulninpa, kat witingna muihnina kat kat kidika kulyang balna yulnina kat yuyulwakat dakakana dai. 7Witingna isningna aiwaskat kaput di kalahwa kidika talwi pini biri biri yuyulna:
—¿Adika muihni balna yulbauwabang adika Galilea kaupak awasyah? 8¿Kaunah amput didakadih mayang matuki kat yuyulwak? 9Akat muih balna Partia kaupak, Media kaupak, Elam kaupak, Mesopotamia kaupak, Judea kaupak, Capadocia kaupak, Ponto kaupak dawak bik Asia sauni balna kaupak bik ki, 10Frigia kaupak dawak Panfilia kaupak, Egipto kaupak, Libia sauni kaupak, Cirene yaihnit kau kidika. Buas Roma kaupak aina; 11as as kidika laih Ju balna dawak ūk balna kidika laih Ju balna yakat wiryaklalana. Creta kaupak bik aina dawak Arabia kaupak bik. ¡Witingna mayulki kat yuyulwak dakadi, di taldas yamni kidika Papang yamwak!
12Dawak witingna bitik laih di kalahwa kidika tatalna, ais kulninpa amanglalawasdai, dawak yulwi dakakana:
—¿Adika ais tanka yah?
13Kauna buas laih sarahni diyuyulna:
—¡Adika muihni balna laih wasak dadauna!
Pita yulbauna
14Kaput laih, Pita witing yaklauna apostel ūk balna 11 kidika karak, dawak yulni parasni yulwi yulna: “Ju muihni balna bitik Jerusalén yakat yalahtamana kidika, manna adika manayulki kidika yamni dakanauh. 15Adika balna wasak dadauwaski manna kultamana kaput, kat baisa mapiris awar tiaskauarungka. 16Nawatkauh laih prapit Joel yulna kidika kalahwasakki, witing yulna:
17‘Papang yulwi, mani balna witni yakat,
yang Spiritki kidika muih bitik minitna yakat utuhki;
manna walamabis ahal dawak yayal balna bik
yang yulki yuyulwarang,
wawahma balna kidika amana kapat sahmuhni tatalwarang,
dawak muihbararak balna laih amana tatalwarang.
18Dawak yang diki yamyang ahal, dawak yayal balna minitna yakat
Spiritki kidika utuhki, kidika mani balna yakat,
dawak witingna bik yang yulki yuyulwarang.
19Makau kisang yakat di nunuhni balna yakki,
ā, kuhpau dawak mukus kidika wayau kapat karang sau minityakat.
20Ma kidika puksani kalwarang,
waiku kidika bik ā kapat kalahwarang,
baisa Dawan mani kidika kaiwas tanit yakat,
ma nuhni dawak alasna yaksihni kidika.
21Kauna muih bitik Dawan ayangni yuyulwarang balna kidika
laihwi yaknin kidika kukuihwarang.’#Jl 2:28-32.
22“Israel muihni balna dakanauh, yang yulbauki adika: Manna yamni palni amanglatamana, Jisas Nazaret kaupak kidika al as dai, witing kidika Papang yaklauwi yakna dai, manna muhmana yakat, witing munah di manas yamna dai, sain balna, di yamni taldas dini kidika, muih bik dulauna siknis kaupak. 23Kaput kaunah manna tingmana yakat āna dai Papang warkni dawak, ais yamnin kulwi yamna dai kidika baisa tanit kaupak,#Lc 24:26. kaunah manna laihta īnamana, muih dutni yamyang balna tingnina yakat ātanangkat pan prihni yakat ilwi papana.#Mt 27:35; Mk 15:24; Lc 23:33; Jn 19:18. 24Kauna Papang witing dauna kaupak dulauna,#Mt 28:5-6; Mk 16:6; Lc 24:5. daunin dalani kaupak laihwi yakna, kat daunin kidika yaklauwi sip taihwi duwas dai bahang. 25King Devid bik yulna Jisas yulni:
‘Yang talnayang Dawan kidika yang takityakat ban dai;
witing tingkipal yakat karang kat, di as bik yayamwak buktas awaki.
26Kidika bahang ising alasna ki,
yang tuki kidika alasna manah buhng unbauwi.
Yang muihki nuhni bitik sangka ban karang, witing yakat kultik,
27kat man sip yadatas awama bahang sau-ū yakat
datang kat yadutlawas karang
man dima yamyang holi muihni kidika.
28Man nikingkanaman sangka atnin tani kidika,
dawak man aiwa alahwama yakat, alasna manah yabuhngdama.’#Sal 16:8-11.
29“Wirah balna, yadatang kat lāih manayulkuh, mayang mamuihki barak Devid dauna, sau yakat nununa, dawak sauni-ū kidika ban mapasking yakat ki. 30Kauna Devid laih prapit as dai, dawak witing amanglawadai, Papang pramis kalyamna dai kidika, witing sulani balna kaupak as king ānin.#Sal 132:11; 2 Sam 7:12-13. 31Kaput bahang uman talwasakkapat Devid yulna dai, Mesías dauna kaupak watwi yaklauwarang kidika, dawak bik witing sip sau-ū yakat watwas karang ki, dawak muihni bik dutlawas karang ki. 32Bahang Papang yaklauwi Jisas adika dauna kaupak dulauna, kidika laih yangna bitik witnis yangna. 33Witing kidika kaldulauna, Papang tingnipal yakat kiwi yalahna, dawak Papang kaupak Spirit Holi kidika duna, kaput pramis kalyamna dai bahang, dawak kidika Spiritni witing yaklauwi sahyakna. Kidika kuduh talnamana, dawak bik dakanamana kidika. 34Kat Devid kuduh, makau kisang yakat kilkiwas kidika, kat witing palni yulna:
‘Dawan yaklauwi Dakiwan yak kalyulna:
Man tingkipal yakat yalahta,
35yang waihmala balna kidika bitik man kalma dinit yakat āki kat.’#Sal 110:1.
36“Bahang Israel balna tawanni bitik adika yamni palni amanglatanauh, rahm palni, manna adika Jisas pan prihni yak īnamana kidika, Papang yaklauwi Dawan, dawak Mesías kalyamna.”
37Kidika balna kaluduhna bangdai kidika dakawi, nuhni palni kulninna bukna, dawak Pita yakat kalyulwi dakakana, kaput bik laih apostel ūk balna yakat bik diyulwi dakakana:
—Wirah balna, ¿ais yamniknayah?
38Pita nangnitnalana:
—Papang yakat nawatta aiwanauh, dawak Jisas Krais ayangni kau was kalutuhta alahwanauh kaput laih Papang dutmana kidika dawak diswarang, dawak bik kaput laih Spirit Holi kidika manawarang. 39Adika pranimis laih manna dimana, dawak walamanabis balna dinina bik ki, kaput bik pa naikau balna kidika bik dinina, yuldarang kat, Papang dukih kalawi, kidika balna bik yulwak aina atnin.
40Adika yulni balna karak Pita yuldibauna, dawak bik yul sumalwi diyulna:
—¡Adika muih dudutni balna kaupak naikau alahwanauh!
41Kaput yulni dakakana balna kidika was utuh'yakna; kaput laih kidika muihni tausin bās kulyang kakalna balna karak aslah kalalahna dai. 42Witingna bitik laih apostel balna sumamalwa yakat dakakana, dawak witing ais duduwa kidika yuwi kakasna, minitna yuyulwadai, dawak kalududuhwadai plawar busna kidika bahnin.
Kristian tatuna balna sangninaka
43Witingna bitik laih taldas dini kidika tatalna, sain balna, siknis kaupak yamni kalalahwa kidika apostel balna yayamwadai. 44Rahm kukulna balna dai kidika laih kulninna aslah kuluduhdai, witingna di duduwa kidika biri biri kalyuyuwādai;#Ap.w 4:32-35. 45witingna saunina balna dawak ais duduwa balna kidika bik wauhwi bakakanwa dai, dawak lalah kidika sahyakwi duduwa dai, muihnina kat kat di ais dukih diawa kidika kaput. 46Dawak ma bitik witingna kalududuhwadai makatyulnin ūni yakat, dawak ūnina yakat laih plawar busna kidika bahwi yuwi asla kakasna, kulninna yamni dawak buknin kidika karak. 47Papang ayangni nuhni yayamwadai, dawak biri biri dalani kaldakakawadai; dawak ma balna bitik yakat Dawan yaklau laihwi yakwa balna kidika diduwi kiwi banawadai suts yakat.
Currently Selected:
Apastil Balna Warknina 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998