Zacarías 2
2
Kulwi talnin wahni niningkana kidika
1Dawak di ūk bik, amana kau kapat talnayang. Muih al as kaiwi kalahna, bahang witing laih tingni yakat kulwi talnin wahni as duwalikdai. 2Dawak yultik danayang: “¿Angkat yawamahn?” Dawak witing yaklauwi nangkitlana: “Jerusalén tawanni nuhni kidika kultik talki ki, naiki kidika dawak panuhni kidika bik ampuspa.”#Ez 40:3-4; Rib 11:1; 21:15-17.
3Kaput laih talnayang insal yang karak yulbauna kidika mahka kiwak, dawak insal ūk kalahwak kalpapakna 4dawak kalyulwadai: “Ira yawa kalyultah wahma as kulwi talnin wahni dukiwa kidika yakat: ‘Jerusalén kidika watwi muih uiwi yalalahwarangki, dawak muihni balna kidika mahni karangki, dawak tuninaruh balna bik daklawi dunin sip awas karang ki. 5Kaunah Dawan yulwi: Yang laih daklana as kuhpau kapat awaki Jerusalén yaihnit yakat, dawak tawan papus yakat yang alaskina yaksihni kidika niningkana awaki.’ ”#Is 4:5; Ez 43:4-5; Rib 21:3,23.
Dawan yaklauwi witing tawanni kidika laihwi yakwarang
6-7Dawan aput yulwi: “Yang lawik yamnayang, manna kidika pa bitik yakat manaruhna atnin. Kaunah waralaih manayultayang: ¡Tingpal niningkauh sauni kidika kaupak iranauh! ¡Babilon kaupak iranauh, manalaihwi manaduwi uina kidika kaupak, Sayan yakat yalahtamana dai kidika! Yang, Dawan yang kat lawik yultayang.”
8-9Dawan parasni nuhni duwa kidika adika yulni karak yasihna, nisan balna manna dimana dakyayakna balna niningna yakat diyulna atnin: “Wais karang bik yang tawanki yakat uswarangkat, kidika laih sihm buihbin yal mikpa kapat#2.8-9 Yal mikpa kapat: hibru kau laih yulwi: yalbin witing minikpa sumani kapat, Papang minikpa kidika risnipik diswas atnin kidika yulni, kaput yulwi. talayang yakat uswa kapat ki. Kidika bahang yang palni kalbauna awaki kidika ninisan balna niningna yakat, dawak diyamtingkat witingna warau duduwa kidika balna yaklauwi dinina kidika bitik laihwi duduna karang.” Kaput yamtik Dawan parasni nuhni bitik duwa kidika alasnina yaksihni kidik lāih yakki, dawak kaput laih manna amanglatanama witing yaklauwi yang akat yasihna kidika.
10Dawan yaklauwi aput karangti: “¡Alasna unbautanauh, Jerusalén muihni balna, kat yang aiwayang witingna pasningna yakat yalahna atnik!” 11Adika kaput kalahwak, nisan balna manas Dawan yakat aiwi aslah kalalahwarang. Dawak witing yulwarang: “Adika ninisan balna bik yang tawanki balna karang. Dawak kaput laih yang manna pasmangna yakat yalahki.” Kaput laih manna amanglatanama Dawan parasni nuhni bitik duwa kidika yaklauwi yasihna kidik. 12Kaput laih Dawan watwi Judá kidika witing dini palni kapat duna karang, holi sauni yakat, dawak watwi bik yulna karang, Jerusalén kidika witing tawanni nuhni walwi yakwi duna.
13¡Sau muihni balna bitik ap atnin Dawan niningyakat, kat witing laih mayang akat kaiwi, witing pāni holi yalahwa kidika kaupak!#Hab 2:20; Sof 1:7.
Currently Selected:
Zacarías 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998