Roman 4
4
Abraham kasak kulna kidika
1Kaput kat ¿Abraham kidika ais as duna atdarangyah? 2Rahm kidika laih, Abraham yamna balna kidika munah, lā kat yamwa muihni as kalkulna dai kat laih, alasna yaksihni kidika dunin dai, kaunah Papang muhni yakat awas karang bik. 3Ulna yakat yulwi “Abraham Papang yakat kulna, kidika yulni Papang bik talna dawak lā kat muihni as kalkulna dai.”#Gn 15:6; Gal 3:6. 4Waralaih, muih as wark kalahwarang kat, minit lauwi kalawa kidika laih prisant as awaski, kaunah witing minit dunin sakbahang. 5Nawatwak, muih as Papang yakat kulwa kidika, dutni muihni kidika laih lā kat yamyang kalkulna ki, kasak kulwa kidika Papang talwi, lā kat yamyang kapat kalkulnin kidika, di as bik yamwasdai kaunah minit duna atnin kapat. 6Devid bik yulna dai kidika, kidik muihni yakat Papang yaklauwi kalkulna lā kat yamyang kapat, di yamna balna kidika yakat laih talwas dawi. 7Devid yulna:
“¡Yamni palni ki kidika muihni
Papang yaklauwi dutni balna dawak diswa kidika,
dawak bik talwas kapat dawak bayakwa kidika!
8¡Yamni palni ki, kidika muihni
Dawan yaklauwi dutni balna yamna yulni kalkulwas kidika!”#Sal 32:1-2.
9¿Adika yulni balna yulna kidika Papang sainni duna muihni balna manah dinina yulwih, kidika awas kat dis balna bik duduwarangyah? Yulna mayang, Papang talna Abraham kasak kulnin lani duwa kidika, lā kat kapat kalkulna atnin. 10Kaunah ¿mampat kat kaput kalkulnayah? ¿Abraham kidika Papang sainni duna kaupak, kidika awaskat baisa kidika sainni duwas tanitkauh? Kidika usnitkauh awaski, kaunah tanit kauh. 11Dawak kidika usnit kat Abraham Papang sainni duna,#Gn 17:10. kidika laih sain as, Papang yaklauwi kalkulna kidika witing laih lā kat ki kasak kulwa kidika munah. Kaput laih, ban kaput kaina Abraham kidika laih kasak kukulwa balna bitik papangnina, Papang sainni duduwas balna bik, kaput laih Papang yaklauwi ditalwi sihm kapapat witingna yakat bik lā kat balna kapat. 12Kaput bik laih Abraham kidika laih papang as ki, kidika balna Papang sainni duduna kidika minit yakat, witingna muihninabararak balna kasak kulnin lani duduna dai kidika usnit uhuina, witingna Papang sainni duduwas dai bik.
Pranimis kidika laih sulani balnakaiwarang kidika yakat
13Papang yaklauwi Abraham yakat pramis yamna dawak sulani balna kau bik, sau yamna adika witingna yakat dinina karang,#Gn 17:4-6; 22:17-18; Gal 3:29. kaunah adika pramis laih lā munah awasdai, kaunah la kat yamwa kidika kasak kulwa munah. 14Kidika dinina duduwarang balna kidika laih lā yakat kukulwa muihni kuduh, kaput kat kasak kulnin lani laih dauh kalwi dawak Papang pranimis kidika bik dauh kalwarang ki.#Gal 3:18. 15Kat lā laih wah duaiwi; kaunah lā dis yakat laih, lā niningkauh yamwa kidika bik diski.
16Kidika bahang, Abraham kau pramis yamna kidika ban parasni dunin yulni sulani balna kau kaiwarang kidika balna bitik yakat, kidika laih blisinni prisant as dai, kasak kulwa kidika munah. Yuldarang kat, pramis kidika laih lā kat yayamwa muihni balna manah dinina awaski, kaunah kasak kukulwa muihni balna bitik dinina, Abraham kapat. Kaput laih, witing kidika kaiwi mayang bitik mapapangki,#Gal 3:7. 17Ulna yakat yulwa kaput: “Nisan balna mahni papangnina mayamnayang.”#Gn 17:5. Kidika Papang yakat kuduh Abraham kasak kulna kidika, dauna balna yakat bik sangninaka diawa Papangni kidika, dawak di dis balna kidika bik yamwa kidika.
18Tahanin kidika baisa dis kat, Abraham kidika kasak kulna bahang tahawi talnin kidika kalahna, dawak kaput laih kaiwi kalahna “nisan balna mahni papangnina”, Papang yaklauwi kalyulna dai kaput: “Aput karang man sulama balna kidika.”#Gn 15:5. 19Abraham kasak kulwa kidika sau kau bukwasdai, kurih#Gn 17:17. andat as kapat laihna dai bik, dawak witing amanglana sara dawak witing bik dadauna kapat dai, muihbararak palni kakalna dai walabis yaknin kidika. 20Papang pranimis kidika dauh kulwasdai, kaunah kasak kulnin kidika baisa parasni duna. Papang ayangni nuhni yamna, 21yamni palni amanglana Papang parasni duwi pranimis kat yamnin. 22Kidika bahang, Papang adika talna bahang, lā kat muihni as kalkulna.
23Adika Papang talna kidika, Abraham yulni manah laih ulwasdai; 24mayang madiki bik ulna. Papang laih mayang kasak kulda kidika bik talwi, Madakiwan Jisas sau-ū kaupak dulauna yakat kasak kulda kidika, 25daunin yakat āna dai kidika madutki yulni,#Is 53:4-5. dawak dauna kaupak yaklauna lā kat mayang kapat maiyamnin.
Currently Selected:
Roman 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
