Ribilisan 14
14
144,000 balna unbabauna kidika
1Sayan asangni yakat Sīp yaklauna sakdai kidika talnayang dai. Kidika Sīpni karak muih 144,000 bangdai kidika balna laih muhnina yakat Sīp dawak Papangni ayangni kidika bik ulna duduwadai.#Ez 9:4; Rib 7:3. 2Usnit kat kisang kaupak di as parasni yulwi kaiwa kidika dakanayang dai; sihm kitang parasni yulwa kapat atna dai, sihm alwana parasni ruhmwa kapat; sihm paswi yakisdinin dini kat pasyang balna paswi yakikisda kapat atna dai. 3Dawak unbauna wisam as unbabauwa dai trun kidika, di sangninaka duduwa balna kidika dawak muihbararak balna kidika muhnitna yakat bik. Muih as bik sip lan kalwas dai kidika unbauna, kaunah sau muihni balna paskaupak muih 144,000 laihwi yaknin lani duduna kidika balna manah lan kakalna dai. 4Adika balna kuduh yayal balna karak kalpakwi muihnina yakat dutni yayamwas dai kidika; witing laih Sīp angkat angkat kiwarang kidika usnit uhuiwi. Witingna laih muih balna paskaupak laihwi yaknin lani kidika duduna dawak Papang dawi sīp kidika bik dini minitdis kalanin dini as ki.#Ex 23:19; Jm 1:18. 5Witingna kungninamak yakat alas as bik yuyulwas dai,#Sof 3:13. bahang witingna laih dibilwas atnin muihni balna ki.
Insal balna bās yul sisihna kidika
6Insal ūk talnayang dai, kidika laih kisang papus yakat yaklauna witdai dawak ban kaput atnin yulni as duwi kiwadai sau yakat yalalahwa muihni balna, nisan, muih satni, tuni sat sat yuyulwa dawak tawan balna bitik yakat bik diyulna atnin. 7Parasni palni aput yulwadai: “Papang yakat yamanidutanauh dawak ayangni tanit nuhni yamtanauh, bahang witing la yamnin awarni kidika laih uman kiwi kana. Kisang, sau, kuma dawak wastuna balna yamna muihni yakat ayangni tanit nuhni yamtanauh.”
8Insal ūk kaiwi aput yulna dai: “¡Babilon#Is 21:9; Jr 51:8; Rib 18:2. nuhni kidika laih uman bukna uman bukna, witing yaklau nisan balna bitik yakat muihni nuhni dukih kalawa lani kidika karak wasak dihina kidika!”
9Usnit kat insal bās kidika kaina dai, kidika bik parasni aput yulna dai: “Angdika muihni di dutni wayakani dawak wayani kidika yakat bik ayangni tanit nuhni yamwarang kat, dawak bik muhni yakat kidik awaskat tingni yakat sainni kidika awarang kat, 10Papang kulnin daukalna wainni kidika dina karang ki, witing annin sūnitak maisihni dis ridi yamna kidika;#Is 51:17; Jr 25:15; Rib 16:19. dawak dalani kalana karang ki kuhpau dawak sulhpa#Gn 19:24; Sal 11:6; Ez 38:22. karak insal balna holi dawak sīp kidika bik muhni yakat. 11Kidika dalani wayauni kidika laih ban kaput atnin kilwi,#Is 34:10. dawak madah dawak pukta kidika yakurupdinin diski di dutni wayakani dawak wayani yakat ayangni tanit nuhni yayamwa balna kidika dawak ayangni sainni duduwa balna kidika bik.”
12¡Akat talwarang ki Papang tawanni parasni kidika, witing lani balna kat laihwi yayamwa kidika dawak Jisas yakat bik bararangni kidika!
13Bahang kisang kaupak yulni as aput yayulwakat dakanayang dai: “Adika ultah: ‘Yamni palni karang angdika muihni balna warmani kaupak tanitkauh yakat Dawan karak aslah kalahwi dadauwa kidika.’ ”
Spirit yaklau “Agha —ti—, witingna laih warknina balna kaupak yakururupdana karang, bahang warknina balna kidika yaklau miniknadadawi.”
Sau kaupak di minik bahna kalahwa kidika
14Mukus pihni as talnayang dai, dawak kidika minityakat muih as yalahna sakdai muhni kidika laih muih muhni duwadai.#Dn 7:13. Tunani yakat gol kraunni as duwadai dawak tingni yakat laih isparah baini as duwadai. 15Dawak makat yulnin ūni kidika kaupak insal ūk kalahna dai, mukus minitkau yalahna sakdai kidika yakat sarahwi aput kalyulna dai: “¡Ismaparah kau di minik balna kidika daktah; kat awarni kidika laih uman kiwi kana, dawak sau kaupak di minik balna kalahwa kidika laih uman pihna!”#Jl 3:13. 16Mukus minityakat yalahna sakdai kidika laih isniparah kidika sau minityakat ana dai, dawak sau kaupak di minik balna kalahwa kidika dakna dai.
17Usnit kat insal ūk kalahna dai kisang kau makat yulnin ūni sakkidika kaupak, witing bik sihm isparah baini as duwadai. 18Dawak sakripais busnin pāni kaupak insal ūk kalahna dai, witing laih kuhpau yakat parasni duwadai dawak isparah baini duwadai kidika yakat yulni parasni kalyulwi aput kalyulna dai: “¡Ismaparah kidika kau sau yakat wain wahni balna kidika daktah, kat wain minik balna kidika laih uman lalahna bahang!” 19Insal kidika laih isniparah kidika sau yakat ana dai dawak sau yakat wain minik balna kidika dakna dai, dawak usnit kat wain tiriswi puwa dini nuhni sakyakat puna dai dawak kidika tanka laih Papang kulnin daukalna. 20Wain minik balna kidika laih tawan nuhni kidika kaupak ahni naikau yakat tirisna dai#Is 63:3; Lm 1:15; Jl 3:13; Rib 19:15. dawak di punin dini kidika kaupak laih ā kalahna dai, kidika laih aras balna iswi laihwatnin dini kidika kat kiwi kana dai panuhni niningkauh laih kilometros 300.
Currently Selected:
Ribilisan 14: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
