Ribilisan 12
12
Muih yal dawak waula karak
1Kisang yakat sain nuhni as kalahna dai: muih yal as ma kidika yakat kalwiditna dai sihm asna as kapat, waiku kidika laih kalni balna dinityakat dawak tunani yakat laih kraun as duwadai yala 12 duwa kat. 2Muih yal kidika laih muihkaruk dai, dawak muihbin dunin dalani balna kidika yulni sarahwadai, muihbin duwi dalani wauhwarang kidika yulni. 3Usnit kat kisang yakat sain ūk kalahna dai: waula nuhni pauni as kalahna dai kidika laih tunani balna tiaskaubu, tamni balna salap#Dn 7:7. dawak tunani balna kat kat kraun as as duduwa dai. 4Kidika mamahni kau kisang yalani balna sahyakna bās kidika murwi duwi kiwi sau#Dn 8:10. minityakat ruhmlakna dai. Waula kidika laih muih yal muihbin duwarang kidika muhnityakat watna dai, walanibis bin kidika sirihni duwakat kasna atnin yulni. 5Dawak muih yal kidika laih walanibis al as duna dai,#Is 66:7. kidika yaklau nisan balna bitik yakat king kanin manah ki ayan tulninah as karak.#Sal 2:9. Kaunah walanibis kidika laih dakyakwi Papang dawak tronni kidika muhnit yakat bik duwi kiuna dai; 6dawak muih yal kidika laih kauhmak wanilang yakat kirana dai, Papang yaklau pa as ridi yamwi kalana dai kidika yakat kidika pāni yakat ma 1260 di kalalawakat kasna atnin yulni.
7Usnit kat kisang yakat kalbaunin as sakdai: Miguel#Dn 10:13,21; 12:1; Jud 9. dawak innisal balna karak kalpakwi waula kidika niningyakat kalbabauna dai. Waula dawak innisal balna kidika karak kalpakwi kalbabauna dai, 8kaunah sip minit bayayakwas dai, dawak witingna panina laih uman dis dana dai kisang yakat. 9Kaput laih waula nuhni kidika kangwi yakna dai, muhnilau kau bilni#Gn 3:1. ayangni muih alasni yulyang dawak satanás duwadai kidika, dawak muih balna bitik yakat alas diyulwa kidika. Witing dawak innisal balna karak libitwi sau yakat ruhmlakna dai.#Lc 10:18.
10Bahang kisang yakat yulni as parasni aput yulwakat dakanayang dai:
“Laihwi yaknin lani kidika umankaiwi kana,
Mapapangki parasni dawak king kāwalani kidika,
dawak Mesías parasni kidika kauna;
kat kangwi yakna bahang
mawanaihki balna yulnina yakyang muihni,#Job 1:6-12; Zac 3:1.
madah dawak pukta yulnina yakwa daikidika
Mapapangki muhni yakat.
11Mawanaihki balna yaklauminitbayayakna
sīp āni utuhna kidika karak
dawak yul yamni witingna yuyulnakidika karak bik;
witingna sangnika disnin kidikayamaduduwasdai,
kaunah witingna dauninna kidikakulninna aslah duduna dai.
12¡Bahang kisang balna alasnaalahwanauh,
dawak manna laih kidika yakatyalahtamana kidika!
¡Kaunah alakaih sau dawak kuma yakatbik yalalahwa kidika,
kat muih alasni yulyang witingma balna bulah kalwatwa kidikaamanglawa bahang,
manna namangna yakat kulnin daukalwiyaklakna ki!”
13Waula kidika sau akat ruhmlakna mani kat, muih yal walabis duna dai kidika yakat usnit uina dai. 14Kaunah muih yal kidika yakat yakal lawani nunuhni bu kalalana dai, witing pāni kauhmak wanilang yakat yaklauwi kiuna atnin, waula kaupak naikau, kurih bās minitkau papusbah di kalalawakat kasnin dai kidika pāni yakat.#Dn 7:25; 12:7. 15Waula kidika laih tinpas kaupak was yakna dai, was nuhni as yamwakat muih yal kidika ukkiuna atnin; 16kaunah sau kidika yaklau muih yal yakat ilp kalana dai, bahang tinpas kidika wakahwi dawak waula tinpas kaupak was yakna dai kidika dipamna dai. 17Kidika karak, waula kidika laih muih yal niningyakat kulnin daukalna dai, dawak kiwi muih yal sulani balna kidika karak kalbauna dai, Papang lani balna kat dakakawa kidika dawak Jisas yulni yakat barangni usnit uhuiwa kidika yakat bik. 18Dawak waula kidika laih watna dai#12.18 Dawak waula kidika laih watna dai: tingkau ulna balna buas kidika laih aput yuyulwi: dawak yang laih kasakni sakyang dai. kuma kung yakat.#12.18 Yulni balna as as yakat laih pasyakat ahawi S.d. 18 kidika sihm 13:1 kidika dini kapat.
Currently Selected:
Ribilisan 12: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
