Ribilisan 1
1
Jisas Krais yulni balnayakwi niningkana kidika
1Adika kuduh Papang yaklau Jisas Krais yakat di balna yakwi niningkana dai kidika, witing yaklau dini yamyang balna yakat wirlawi niningnakana atnin sirihni palni di balna kalahwarang kidika yulni. Jisas Krais yaklau witing innisal kidika sihwakat dini yamyang Jan yakat kalyulna, 2witing laih yul rahm kidika yulna dai ais talna dai kidika bitik, dawak witing laih witnis Papang yulni Jisas Krais yaklau yulna dai kidika.
3Yamni alasna karang angdika muihni yulwi talwa kidika dawak bik yamni alasna karang ki angdika muihni balna adika yulni Papang kaupak adika dakakawa kat, dawak akat ulna aput bik dakawi yayamwa kidika, kat mani balna kidika laih uman kaiwi uliswa bahang.
Jan yaklau suts tiaskaubu balna kauulna
4Yang, Jan, Asia sauni sahyakna tiaskaubu balna yakat wauhtaya ultayang. Manna minikun talnin lani dawak kulnin aslah lani kidika bik dutanauh warminitni sakkidika dawak sakdai kidika dawak kaiwarang kidika muihni#Ex 3:14. kaupak, dawak spirit balna tiaskaubu witing tronni tanityakat bangkidika kaupak bik,#Rib 4:5; Is 11:2. 5dawak Jisas Krais kaupak bik, witnis barangni,#Is 55:4. witing tatuna watwi yaklauna#Ap.w 26:23; Col 1:18. kidika dawak sau kingni balna minitna yakat bik parasni duwa kidika.#Sal 89:27. Krais laih dalani maitalwi, dawak mayang madutki kaupak mailaihwi yakna witing āni sau yakat utuhwinah, 6dawak mayang kaupak king kanin sauni as yamna; witing Papangni warkni yamnin yulni sumalyang balna maiyamna.#Ex 19:6; Rib 5:10; 20:6. ¡Alasna yaksihni dawak parasni kidika bik man dima ban kaput atnin karang! Kaput karang.
7¡Krais laih mukus balna yakat kaiwi!#Dn 7:13; Mt 24:30; Mk 13:26; Lc 21:27; 1 Ts 4:17.
Muih balna bitik tatalna karang,
pawi ahllalana muihni balna kat biktatalna karang;#Zac 12:10; Jn 19:34,37.
dawak sau akat tawan balna bitik kidika
dalani dakawi kakaidana karangwiting yulni.#Zac 12:10; Mt 24:30.
Agha, kaput karang.
8“Yang kuduh alfa dawak omega”#1.8 Ulna balna alfa dawak omega kidika balna laih grik yulni ulna balna yakat tatuna dawak witni kidika ki. Tingkau ulna balna buas laih aput minitlalakwi: tatuna dawak witni.,#Is 41:4; 44:6; Rib 1:17; 22:13. Dawan yaklau yulwi, Papang parasni bitik duwa kidika, warminitni sakkidika dawak sakdai kidika dawak kaiwarang kidika.#Ex 3:14.
Krais alasnina yaksihni nuhni kaupaksahmuhni amana kapat as
9Yang, Jan, yang laih manna wanaihmana yang, dawak Jisas karak aslah alahwanayang kidika yulni manna karak yang diki dutayang Papang king kāwa lani yakat, dalani wauhnin balna yakat dawak sip wauhnin kidika parasni yakat bik. Papang yulni Jisas yaklau rahm yamwakat yulnayang kidika yulni, Patmos kini wirni yakat sakyang dai. 10Dawak Dawan mani kidika yakat Spirit parasni kidika dinityakat watnayang dai, dawak yang dangkit yakat yulni parasni as yulwakat dakanayang dai, sihm trumpit puhwa kapat, 11aput yayulwadai: “Di balna talaman kidika wauhtaya as kau ultah, dawak Asia sauni sahyakna balna yakat disihtah: Efeso, Esmirna, Pérgamo, Tiatira, Sardis, Filadelfia dawak Laodicea yakat bik.”
12Wirlawik talnayang dai yayulwa kidika wais kat yulwa dai pa; dawak wirlawanayang mani kat awas dahlwi ilnin dini gol kau yamna manah tiaskaubu talnayang dai, 13dawak awas dahlwi ilnin dini tiaskaubu kidika balna walsah yakat muih muhni kapat as#Dn 7:13. sakkat talnayang dai, prak as kana sakdai naini niningkauh kidika kalni balna kat dai dawak banimak sitnin dini gol kau yamna kidika pasni kat sitna sakdai.#Dn 10:5. 14Basni balna kidika laih sihm sīp unitak butuni#Dn 7:9. kapat dai, kidik awaskat sihm diwas kapat ki, dawak minikpa balna kidika laih sihm kuhpau dahlwa kapat dai. 15Kalni balna kidika laih sihm bras kusna kat yaringni kapat dai, plawar busnin pāni yakat āwi busna kapat;#Dn 10:6. dawak dinit kidika laih parasni yulwa dai sihm kitang parasni yulwa kapat.#Ez 1:24; 43:2. 16Tingnipal niningkauh yakat yala tiaskaubu duwasakdai, dawak tinpas kaupak laih sihm isparah nabupak baini duwa kapat kalahwa dai. Muhni kidika laih sihm ma yaringni dahlwa kidika kapat dai.
17Talnayang mani kat, kalnisar yakat sihm daunayang kapat buknayang dai. Kaunah witing, tingnipal niningkauh kidika yang mikit yakat dulauwi aput yayulna dai: “Yamaduwinih; yang kuduh tatuna dawak witni kidika yang,#Is 41:4; 44:6-8; 48:12; Rib 1:8; 2:8; 22:13. 18dawak sangka kidika. Daunayang dai, kaunah waralaih sangkayang ban kaput atnin yakat. Yang dutayang daunin kingni lani kiniting kidika. 19Ais talnaman kidika ultah: warminitni ais sakkidika dawak usnitkat ais sakkarang kidika. 20Adika ki yala balna tiaskaubu yulnina malni yang tingkipal niningyakat dutasakyang kat yatalnaman dai kidika, dawak awas ilnin dini balna bik gol kau yamna dai kidika: yala balna tiaskaubu kidika laih suts balna tiaskaubu innisal balna kidika ki, dawak awas ilnin dini balna kidika laih suts balna tiaskaubu kidika ki.
Currently Selected:
Ribilisan 1: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
