Salmos 64
64
Minityulwi Papang yakat kalyulwi nanitdakna atnin
Coro sumalniyang kaupak. Devid salnimo.
1Papangki, dutni dakik yultayang kidika dakah;
sangkika kidika nanitdaktah waihkila yamadadangni balna kaupak.
2Muih dudutni balna kaupak yamaltah
dawak witingna malnikau di yayamwa balna kidika kaupak bik;
muih dudutni balna yaklauwi inin yayamwa kidika kaupak bik yalaihtayaktah,
3witingna tūnina kidika baini yayamwi isparah kapat
dawak sibang kapat rurumhwi yul puisin duwa balna kidika.
4Yakmamalda pāni kaupak rurumhwi dutni yamwas muihni niningyakat;
isningna aiwas kat rurumhwi dawak bik yamaduduwas.
5Biri kulninna dulalauwi dutni yamnin kidika yulni;
yakmaldi laihna dini kidika ānin yayamwi
dawak witingna kukulwi muih as bik ditalwas karang,
6dawak witingna dutnina kidika muih as bik walwi talwas karang.
Kaunah kidika muihni laih sipki amanglanin
muih al kulnin pasyakau bik,
bahang laihwi talna karang.#64.6 Kauna kidika muihni...laihwi talna karang: kaput wirlana kidika yamni kapat ki. Hibru kau laih amangladaski.
7Witingna silp sīninabang kidika kau Papang yaklauwi dibaswarang,
isningna aiwas kat dibasna karang;
8witingna alas yulnina munah bubukna karang
dawak wais ditalwarang kat sarahni diyulna karang witingna yakat.
9Kaput dawak witingna bitik Papang yakat ayangni nuhni yayamwarang
dawak witing di yamna balna kidika yuyulwarang;
kaput bik witing yamna balna kidika amanglalawarang.
10Muih al yamni kidika Dawan yakat alasna duwarang
dawak witing yakat, nanitdaknin kidika walwarang,
dawak muih kulninna yamni balna kidika bitik
isningnalak kaldakakawarang.
Currently Selected:
Salmos 64: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
