Salmos 59
59
Dawan laih mayang matakit dakyang
Coro sumalniyang kaupak. “Daukalnah”. Devid yulni damni, Saúl pakna Devid ūni kidika yakpakwi talnin, bahang kidika laih īna atnin yulni.#1 Sam 19:11.
1Yang Papangki, waihkila balna kaupak yalaihta yaktah;
nikingkauh yaklalauwa balna kaupak yalaihta yaktah,
2muih dudutni balna kaupak bik yalaihta yayaktah,
muih iyang balna kaupak bik yalaihta yaktah,
3kat muih ahal pararasni bik bangki
bahang witingna tahahawi ya īna atnin.
4Dawan kulnik dutni awasdai dawak bik dutni yamtasyang,
di dutni as bik yamtasyang,
kaput kaunah sirihni yayamwi yakalbauna atnin.
¡Sahmuhtah! ¡Yang akat aiwa talah!
5Man Dawan,
Papang parasni bitik duwa kidika, Israel Papangni,
sahmuhtah, dawak wah diatah Papang duwas muihni balna yakat
miniknakun ditalwinih kidika muih dudutni balna malnikau muih ihiwa kidika yakat.
6Pukta yakat nawatwi aiwi, sihm sul kapat ahauhwi,
dawak tawan nuhni yakat awawaihwi.
7Tininapas yakat luhusni manah yayakwi,
witingna yulnina parasni yuyulwi:
“¡Muih as bik diski maidakanin!”
8Kaunah, man laih Dawan, kidika balna yakat āraman;#Sal 2:4.
man kau maduduwas balna yakat sarahni talaman.
9Man yakat nakitdakki, yang Papangki,
man laih yang paraskiman dawak nakitdakyang.
10Papang dalani yatalwa kidika yang akat yawalwi kaiwarang;
yāwak talki, waihkila balna bubukwarang kidika.
11Minikun ditalwinih,#59.11 Minikun ditalwinih: kaput ulna kidika yamni kapat ki. Hibru kau laih yulwi iwinih.
kaput laih yang tawanki kidika ban muhni yakat sakkarang,
kalatang ruhwi kiwang man parasma kau, dawak sau yak bubukwahng.
¡Dawan kidika laih mayang manakitdakyang!
12Di bitik yuyulwa kidika pasyakat dutni yayamwi;
¡witingna manah kapat kaldakakawa kidika yaklauwi ditaihwarang,
dawak pramis dauh yayamwa kidika karak!
13¡Dahn yamtah, dahn yamtah, man kulnam daukalna kidika kau!
¡Dis dadawang!
¡Witingna amanglalawang Papang laih King
Jacob kaupak sau saran kat!
14-15Pukta yakat nawatwi uiwi sul kapat ahauhwarang,
dawak tawan nuhni pasyakat awawaihwi kasnin dini walwi,
kaunah dukih diawa yakat yakwas dawi ahauhwarang.
16Kaunah yang laih, mapiris yakat unbauki manyak;
yang parasni yultik yulki, man dalani lani dawak parasma bik dutaman kidika.
Kat man laih yang nakitdakyang man bahang,
dawak bik maldinik pāni man bahang kulnik kaidana mani balna yakat.
17Man yakat unbauki, yang Papangki,
kat man kuduh paraskiman, dawak yakmaldinik pāni;
¡man laih Papangman, yang kau dalani yatalaman!
Currently Selected:
Salmos 59: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
