Salmos 31
31
Kulnin bitik Dawan yakat kulnin
Coro sumalniyang kaupak, Devid salnimo.
1Dawan, man yakat nakitdaknin kidika waltayang;
¡bahang wat as bik yadatang dauh kalnin awaski!
¡Man yalaihta yakta, kat man laih la kat man bahang!
2Man rismapik kau yadakah;
¡sirihni aiwa yalaihta yaktah!
Amanglatayang, man laih yang kikipala nakitdakyang as man,
¡amanglatayang, man laih yakmaldinin ūni parasni as man dawak yalaihwi yaknin!
3¡Man kuduh yang kikipala man dawak yakmaldinik uni parasni as man!
¡Takituna āwa yaduyawah dawak nakitdaktah;
dawak man ayangma risnipik kidika yamtah!
4¡Yalaihnin dini ririna kidika kaupak yalaihta yaktah,
kat man laih nakitdakyang man bahang!
5Man tingma yakat yang spirit ki kidika ātayang;#Lc 23:46; Ap.w 7:59.
¡yalaihta yaktah, Dawan, man laih rahm Papangniman kidika!
6Dutni talayang dawan dauh yakat minitnayuyulwa kidika.
Yang kulnik kidika Dawan yakat ānayang.
7Man dalani lani dutaman kidika alasna yawi.
Yang kulnik bukna kidika man talaman,
kaput kulnik bukna kidika man amanglataman;
8waihla tingni yakat bik yahatasman dai;
¡yatangkat pa yamni yakat kalki ataknayang!
9Dawan, yang akat mikun yatalah,
kat yamadangni yakat sakyang bahang.
Dalani dutayang kidika yaklauwi mikpa balna kidika parasni dis yamwi,
muihki ¡dawak yang muihki bitik!
10¡Dalani dawak kaidinin balna kidika
yaklauwi yang sangkika kurihni balna kidika dahn yamwi!
Kulnik bukna#31.10 Kulnin bukna: sara kau ulna kidika kaput yulwi. Hibru kau laih yulwi dutki balna. kidika yaklauwi paraski dahn yamwi;
¡muihki nuhni kidika parasni dis kalwi!
11Waihkila balna karininna kidika laih yang,
di as sarahni yuyulwa kidika#31.11 Di as sarahni yuyulwi kidika: kaput ulna kidika yamni kapat ki. Hibru kau laih yulwi mahni. yaihkit kau muih balna kidika
amangkilalawa balna kidika laih tatalwi muihsakdaunin dini kidika.
¡Ta pasyakat muih yapak yatatalwa kidika laih yang kaupak kikiri!#Job 19:13; Sal 38:11; 69:8; 88:18.
12Yang adika dinitnakahna bitik palni,
sihm daunayang kapat.
Yang laih sihm was punin dini as bahwi uhdana kapatyang.
13Sip dakayang, tapaki āwi yuyulwa kidika:
“Yamadangni lani kidika pa bitik yakat ki.”#Jr 20:3,10; 46:5; 49:29; Lm 2:22.
Muih al aslah kapat, yang nikingkauh warknina balna kidika yayamwi;
¡witingna warknina kidika ridi yamwi dadawi ya-īna atnin yulni!
14Kaunah, yang laih Dawan, man yakat kulnik ātik dutayang;
yang yulnayang: “¡Man laih yang Papangkiman!”
15Yang sangkika kidika man tingma yakat ki;
¡yang waihkila balna kaupak yalaihta yakta yauiwi aiwa kidika!
16Man dima yamyang adika minikun kaltalah,
dalani lani dutaman kidika kau yalaihta yakta.
17Man yakat yultayang Dawan;
¡asalni yakat yataih-āwinih!
¡Asalni yakat taih-ātah muih dudutni balna kidika;
sau-ū ap kidika yakat taih-ātah!
18Alas yuyulwa balna tininapas kidika ap dawang,
sarahni dauh talwi yuyulwa balna kidika,
muih al kulnin yamni yakat uhuswa kidika.
19¡Ampat nuhni dutamahn minikun talnin lani kidika,
man yakat ayangma nuhni yayamwa balna niningna yakat!
Kipala dahlwa minit nuhni kapat apakta dutaman
muih balna miniknapa tani yakat,
dawak sahyakta diataman angdika muihni balna man yakat kulninna āwi duduwa balna yakat.
20Man aiwa nakitdaktaman kidika karak
muih ahal dudutni balna warknina kidika kaupak laihta yaktaman;
man ūma pasyakat āta nanitnadaktaman
waihninala balna yaklauwi uhuswa kidika kaupak.
21Dawan ayangni kidika nuhni yamna karang dalani lani nuhni duwa kidika karak
di nunuhni manas yamna yang yulki
kulnik kaidana mani balna yakat.#31.21 Kulnik kaidana mani balna yakat: kaput ulna kidika yamni kapat ki. Hibru kau laih yulwi tawan nuhni as awaihwi dadakna kidika.
22Kulnik abahlwa kidika karak yang kulnayang
man muhma tani kaupak yayakpamna man;
kauna man yakat ilp mayultingkat,
yang sarahtayang kidika dakanaman daih.
23Dawan yakat dalani talnauh, witing yakat barangnimana kidika.
Dawan yaklauwi maintalwi alas yuyulwas balna kidika,
kaunah witingna manah kapat kaldakakawa balna kidika laih
minitna nuhni diawi minitkau lakwi.
24Manna kulnamna kidika kalatanang yaklauwang yamaduwaski
Dawan yakat kultamana bitik kidika.
Currently Selected:
Salmos 31: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
