Números 7
7
Holi pāni Dawan dini yakwi minitdis kalanin dini balna kidika
1Holi pāni kidika Moses yamwi dana mani kat, di salani kau duwi, pāni kidika Papang dini yakna dai, paskau dunin dini balna bangkidika karak libitwi. 2Usnitkat, sulani balna bitik paskau tunan duwa muihni balna, muih ayang āwi kukulna dai kidika balna, 3Dawan yakat minitdis kalanin dini duahaina dai, di puwi tuknin dini tiaskauas, dawak turuh ahalmuk pan muryang balna 12; yuldarang kat di puwi tuknin dini kidika tunan muihni balna bu duahaina dai dawak turuh almuk pan muryang as kidika laih, muihnina kat kat as as duahaina dai. Adika bitik holi pāni muhnityakat lalakna dai.
4Dawan yaklauwi Moses yakat kalyulna: 5“Di puwi tuknin dini balna kidika dawak turuh pan muryang balna kidika, levita balna yakat diatangkat kalpaknin ūni labanni kau di yayamwa balna yakat duwi di yayamwang, witingna wark ais ais yayamwa balna kidika pasyakat.”
6Moses laih di puwi tuknin dini balna kidika dawak turuh ahalmuk balna kidika bik duwi levita balna yakat sahyakwi diana. 7Gersón sulani balna yakat diana di puwi tuknin dini balna bu, dawak turuh ahalmuk pan muryang balna arungka, witingna dukihdai kidika dini balna kau warknina balna yamna atninna. 8Merari sulani balna yakat laih diana dai, di puwi tuknin dini balna arungka, turuh ahalmuk pan muryang balna kidika tiaskaubās, witingna dukihdai kidika dini balna kau warknina balna yamna atninna, Aarón walanibis Itamar taninatuna kawak. 9Coat sulani balna yakat laih, di puwi tuknin dini balna kidika diawas dai, dawak turuh ahalmuk pan muryang balna bik diawasdai, kat di balna Dawan dini yakna balna kidika, salahkau trukwi dukiunin dai bahang.
10Sakripais busnin pāni kidika Papang dini yakna mani kat, sulani balna taninatuna kidika bitik minitdis kalanin dini duwi uiwi sakripais busnin pāni kidika muhnityakat lalakna dai. 11Bahang Dawan yaklau Moses yakat kalyulna: “Ma bitik yakat sulani balna taninatuna kidika ūk ūk karang sakripais busnin pāni Papang dini yakwak minit dis kalanin dini duwi uiwa balna kidika niningnayakat.”
12Naasón, Aminadab walanibis kidika, tatuna dukiuna dai, minitdis kalanin dini kidika, witing laih Judá sulani dai. 13Minitdis kalanin dini dukiuna dai kidika laih, sutak ānin dini as lalah kau yamna, tikini laih, gramos 1,430 duwadai, dawak lalah kau sutak nuhni as yamna dai, tikini laih, gramos 770 duwadai (holi pāni kidika laih tikini kaput duwadai), kidika dini balna bupak plawar tanit yamni kidika babung uhwi disala karak banawi laihna dai, kidika laih minit dis kalanin dini di satni balna minik dai; 14kidika minityakat gol kau ispun nuhni as yamna dai, tikini laih gramos 110 duwadai, kidika isnipun bung walapni busnin dini, 15turuh almuk wahma as, sīp almuk as dawak sīp kurih as duwa kidika as sakripais karauni kauna busna atnin, 16kuts almuk as dutni dawak disnin yulni sakripais busna atnin, 17dawak witni kat, sakripais buswi watwi wanaihni karak yamni kalahna atnin dini kidika laih, turuh ahalmuk bu, sīp ahalmuk singka, kuts ahalmuk singka, sīp kurih as duduwa balna kidika singka. Adika laih Aminadab walanibis Naasón duaina dai minitdis kalanin dini.
18Usnit kat, ma bu yakat Natanael, Zuar walanibis kidika dukiuna dai, minitdis kalanin dini, bahang witing laih Isacar sulani balna taninatuna dai, 19-23dawak Naasón ampus dukiuna kat, sihm kaput duwi kiuna dai.#7.19-23 Dawak Naasón ampus...duwi kiuna dai: akat dawak ūk balna yakat bik hibru wauhnitaya kidika sihm yulni balna kidika lamwi yulwi S.d. 13-17 kau yulwa kidika yulni, kidika balna laih adika wauhnitaya akat yakmukna isi yulwi talna atnin yulni.
24Kidika kaupak ma bas yakat, minitdis kalanin dini dukiuna kidika laih Eliab, Helón walanibis, witing laih Zabulón sulani balna taninatuna dai, 25-29muhnilau balna duwi uina kaput, witing bik duwi kiunadai.
30Ma arungka yakat, minitdis kalanin dini kidika dukiuna dai Elisur, Sedeur walanibis, witing laih Rubén sulani balna tanina dai, 31-35muhnilau balna duwi uina kaput, witing bik duwi kiuna dai.
36Ma singka yakat, minitdis kalanin dini dukiuna kidika laih, Selumiel, Zurisadai walanibis, witing laih Simeón sulani balna taninatuna dai, 37-41muhnilau kau, minitdis kalanin dini muih ūk balna duahaina kaput, witing bik duaina dai.
42Reuel walanibis Eliasaf kidika, ma tiaskauas kat minitdis kalanin dini kidika dukiuna dai, witing laih Gad sulani balna taninatuna dai, 43-47muhnilau kau minitdis kalanin dini ampus duahaina kat witing bik kaput duaina dai.
48Amiud walanibis Elisama kidika, ma tiaskaubu mani kat, minitdis kalanin dini kidika dukiuna dai, witing laih Efraín sulani balna taninatuna dai, 49-53muhnilau kau, minitdis kalanin dini, ūk balna duahaina kaput witing bik duaina dai.
54Pedasur walanibis Gamaliel kidika, ma tiaskaubās mani kat, minitdis kalanin dini kidika kalana dai; witing laih Manasés sulani balna taninatuna dai, 55-59muhnilau kau minitdis kalanin dini ampus duahaina kat kaput witing bik duaina dai.
60Gedeoni walanibis Abidán kidika, ma tiaskauarungka mani kat; minitdis kalanin dini kidika dukiuna dai. Witing laih Benjamín sulani balna kidika taninatuna dai, 61-65dawak muhnilau kau minitdis kalanin dini, kalana dai kaput, watwi kalanadai.
66Amisadai walanibis Ahiezer kidika, ma salap mani kat, minitdis kalanin dini kidika dukiuna, witing laih Dan sulani balna kidika taninatuna dai, 67-71dawak muhnilau kau minitdis kalanin dini, kalana dai kaput watwi kalanadai.
72Ocrán walanibis Pagiel kidika, ma salap minitkau as mani yak, minitdis kalanin dini kidika dukiuna, witing laih Aser sulani balna taninatuna dai, 73-77dawak muhnilau kau, minitdis kalanin dini kalanadai kaput watwi kalanadai.
78Enán walanibis Ahira kidika, ma salap minit kau bu mani kat, minitdis kalanin dini kidika dukiuna. Witing laih Neftalí sulani balna kidika taninatuna dai, 79-83muhnilau kau, minitdis kalanin dini, ūk balna duahaina kaput witing bik duaina dai.
84Kaput bahang, sakripais busnin pāni kidika, Papang dini yakna mani kat, Israel sulani balna taninatuna balna bitik yaklau sutak ānin dini lalah kau yamna kidika 12, sutak nunuhni lalah kau yamna kidika 12 dawak ispun nunuhni gol kau yamna kidika bik 12 diayana dai. 85Sutak ānin dini as kidika tikini laih, gramos 1,430 duwadai, dawak sutak nuhni as kidika tikini laih, 770 gramos duwadai. Bitik kat, sutak ānin dini balna dawi sutak nunuhni balna kidika karak tikini kidika laih, 26,400 gramos duwadai, holi pāni tikini kidika laih kaput duwadai. 86Ispun nunuhni gol kau yamna kidika bik 12 bangdai, walapni busnin dini kidika babung, kidika balna as kidika laih tikini 110 gramos duduwadai, holi pāni tikini kidika laih kaput duwadai. Ispun nunuhni balna kau gol duwadai kidika bitik kat tikini, 1,300 gramos duwadai.
87Sakripais karauni kauna busnin dini balna kidika bitik kat turuh ahalmuk wawahma 12, s-ip ahalmuk 12, s-ip kurih as duduwa balna kidika 12 dawak minitdis kalanin dini di minik satni balna kauna, dawak sakripais yamwak dutni dawak disnin yulni kuts ahalmuk 12. 88Sakripais yamwi watwi wanaihni karak yamni kalahna atnin tingnilau balna kidika laih bitik kat turuh ahalmuk wawahma 24, s-ip ahalmuk 60, kuts ahalmuk 60 dawak s-ip kurih as duduwa balna kidika bik 60. Adika balna dai minitdis kalanin dini balna, sakripais busnin pāni yakat busnin dai kidika, Papang dini yakna usnitkat.
89Moses witing Papang karak kalpaknin ūni labanni yakat kana mani kat, Dawan karak yulbauna atnin, witing dakana dai Dawan yaklau yulkalbauwakat pramis baksni kidika putnin minit kaupak, di lawani bu duldai kidika walsah kaupak.
Biblia Sumo
Texto © Sociedad Bíblica de Nicaragua 1998