Números 4
4
Levita balna warknina
1Dawan yaklau Moses dawak Aarón yakat kiwi aput diyulna:
2“Levita balna kidika bitik ayangnina āta kultah, Coat sulani balna kidika, 3kurih 30 kaupak 50 duduwa kidika kat, dawak kalpaknin ūni labanni maintalnin sip balna kidika bik.
4“Coat sulani balna yamninna kidika laih maisihni dis palni ki, bahang kidika laih adika ki: 5Tawan muihni balna kidika mahka lapapakwarang kat, Aarón dawi walanibis balna karak yaklau, holi pāni kiwikawakau tunan muknin asnina pakkidika kau dulauwi pramis baksni yakat mumukna karang. 6Kidika minityakat di unitak yayamni balna kau duwi mumukna karang, dawak kidika minit yakat asna sangni kau ririwarang, kaput dawi lakwi truknin panani balna kidika lalakwarang. 7Tibil minityakat asna paisa sa kau ririna karang, dawi kidika minityakat lalakwarang, plit, ispun nunuhni, sutak balna, wain utuhnin dini sau kau yamna balna kidika, dawak ma bitik yakat plawar busna yuyuwa kidika bik. 8Kidika balna minityakat asna pauni kau mumukwarang, dawi minityakat di unitak yayamni kau duwi mumukwarang, kaput dawi tuknin panani kidika lalakwarang. 9Usnitkat asna paisa sa kau duwi awas ilnin pāni kidika, awas balna, itisnin dini balna, wisnin plitni balna dawak disala utuhnin sunitak balna bitik kau mumukwarang. 10Kaput laih bitik kau di unitak yamni kau duwi tulna karang, dawak trukwi dukiunin panani minityakat ilna karang.
11“Sakripais busnin pāni gol kau yamna kidika asna paisa sa kau mumukna karang, kaput bik di unitak yamni kau duwi tulna karang, kaput laih truknin panani yakat ilna karang. 12Kidika usnitkat holi pāni kau, dunin dini balna dai kidika asna paisa sa kau lakwi tutulwarang, dawi minityakat di unitak yamni kau duwi tutulwarang, kaput laih pan minit kau ilwi duwi uiwarang. 13Sakripais busnin panikau di salani dawak wan duwa kidika, uswi yayakna karang, kaput dawi asna paisa kau mumukna karang. 14Kidika minityakat, sakripais busnin pāni kau dunin dini balna kidika bitik lalakna karang: kuh tuturni pupuwa dini balna kidika, park balna, subil balna, sutak nunuhni balna; dawak sakripais busnin pāni yakat dunin dini balna kidika bitik. Adika dini balna bitik yakat, di unitak yamni kau lakwi truknin panani minit yakat ihilwarang. 15Aarón walanibis balna karak Papang dini yakna balna kidika bitik balakwi dadawarang kat, duwi kiunin manah ridi, Coat sulani balna kidika aiwi trukwi duwi uiwarang. Kaunah Papang dini yakna balna kidika as bik laihninna awaski, dauninna awas yulni. Kalpaknin ūni labanni paskau di bangkidika, Coat sulani balna trukwi duwi uina karang. 16Sumalyang Aarón walanibis Eleazar kidika, awas wasni balna kidika witing tingni yakat karang, walapni buswa dini kidika, minitdis kalanin dini di satni balna minik ban yata atnamna kidika, dawak Papang dini yakwi tunan yakat utuhwa diani kidika kauna. Kaput bik holi pāni kidika dawak paskau di balna bangkidika bik maintalna karang, dawak Papang dini yakna balna bangkidika bik sihm maintalna karang.”
17Dawan yaklau Moses dawak Aarón yakat kiwi aput diyulna:
18“Datanangkat Coat sulani balna kidika levita balna pasyakaupak disnin awaski. 19Kaput laih daunin wahni kidika dilaihwas atnin Papang dini yakna yakat lalaihwa kidika yulni, bahang adika dini balna yayamna karang: Aarón walanibis balna karak kalpakwi diyuyulna karang, amput yayamwarang kidika, dawak amput duwi uiwarang kidika. 20Kaput laih witingna, Papang dini yakna balna bangkidika wat as bik kawi tatalwas karang, bahang kaput laih dadauwas karang.”
21Dawan yaklau Moses yakat kiwi aput kalyulna:
22“Gersón sulani balna bik ayangnina āta kultah, wanaihnina kat kat, 23kurih 30 duduwa balna kaupak, kurih 50 duduwa balna kat, dawak kalpaknin ūni labanni yakat wark kalahnin sip balna kidika.
24“Gersón sulani balna yamninna kidika laih adika karang: 25Holi pāni kau dūr yakat asna ririwa kidika, kalpaknin ūni labanni dūrni asnina, minityakat di utak yamni kat mukwa kidika, kalpaknin ūni labanni kiwikawa kau riwa asnina kidika, 26dūr rinin asnina watak kau ririwa kidika, watak dūrni kaupak yaihnit awaihwa kau ririwa asnina kidika, sakripais busnin pāni kidika, sitnin wahni balna kauna dawak wark yakat dunin dini balna kauna. 27Aarón walanibis balna karak, Gersón sulani balna yakat taninatuna kakana karang ais yayawarang kidika, dawakat ais trukwi duwi uiwarang kidika. Witingna ais yayamwarang kidika manna lawa niningna katanang kat yayamna karang. 28Adika warkni balna kuduh Gersón sulani balna yayamwarang kidika, kalpaknin ūni labanni yakat, sumalyang Aarón walanibis Itamar tatuna duwak.
29“Merari sulani balna bik ayangnina āta kultah, wanaihnina kat kat. 30Ayangnina āma, kurih 30 duduwa kaupak, kurih 50 duduwa balna kat, yuldarangkat, kalpaknin ūni labanni paskau wark yamnin sip balna kidika. 31Witingna ū labanni pasyak wark yayamwarang kidika laih tat balna kidika, rauni balna kidika, rahni balna, trukwi duwi uiwarang, 32holi watakni kau ū rahni balna kidika, pan dakwi ukna balna kidika, sitnin wahni balna kidika dawak wark yakat dunin dini balna bitik duwi uiwarang. Man lawa diyulnaman karang witingna yakat, ais palni trukwi uiwarang kidika. 33Kalpaknin ūni labanni pasyakat wark balna laih adika ki, bahang Merari sulani balna tingnina yakat karang, dawak Aarón walanibis Itamar laih, kidika minitna yakat talna karang.”
34Moses, Aarón dawi tunan muihni ūk ūk balna karak kalpakwi muih ayangnina āwi kukulna, wanaihnina kat kat, Coat sulani balna kidika, 35kurih 30 dawak 50 duduwa balna kidika kat, witingna laih kalpaknin ūni labanni kidika yakat wark balna yamninna sipdai, 36dawak ahal ayangnina āna kidika laih muih 2,750 dai bitik kat. 37Bitik kaput dai Coat sulani balna, witingna kalpaknin ūni labanni pasyakat wark yamnin sip balna dai kidika, bahang adika balna kidika Moses dawi Aarón karak kukulna dai, Dawan yaklau Moses yakat yamnin kalyulna dai kaput.
38Gersón sulani balna, wanaihnina kat kat, 39kurih 30 kaupak 50 kat duduwa balna dai kidika, dawak kalpaknin ūni labanni paskau wark yamnin sip balna dai kidika, 40muih 2,630 dai. 41Adika balna kuduh Gersón sulani balna witingna sip dai kidika kalpaknin ūni labanni yakat wark yamna atnin, bahang Moses dawi Aarón karak ayangnina āwi kukulna dai, Dawan yaklau yamnin diyulna dai kaput.
42Merari sulani balna, wanaihnina kat kat, 43kurih 30 kaupak 50 kat duduwa muihni balna, witingna sip dai kidika kalpaknin ūni labanni pasyakat wark yamna atnin, 44bitik kat muih 3,200 dai. 45Adika balna dai Merari sulani balna. Witingna sip dai kidika kalpaknin ūni labanni pasyakat wark yamnin, Moses dawi Aarón karak kalpakwi ayangnina āwi kukulna dai, Dawan yaklau Moses yakat yamnin kalyulna dai kaput.
46Moses, Aarón dawi tunan muihni ūk balna karak kalpakwi, levita sulani balna kukulna kidika, 47kurih 30 kaupak 50 kat, witingna sip dai kidika kalpaknin ūni labanni pasyakat wark yamna atnin, 48bitik kat muih 8,580 dai. 49Adika ayangni ānin yamna kidika, Dawan yaklau Moses yakat amput yamnin kalyulna dai kaput yayamna dai, bahang muihnina kat kat diyuyulna dai witingna yayamwarang kidika, dawak ais trukwi duwi uiwarang kidika bik, amput Dawan yaklau Moses yakat yamnin kalyulna dai kaput.
Biblia Sumo
Texto © Sociedad Bíblica de Nicaragua 1998