Números 29
29
Trumpit balna alasnina
(Lv 23:23-25)
1“Waiku tiaskaubu laihwak, ma tatuna yakat kaluduhnin holi as dutanama. Kidika mani wark as bik yamtas awanama, bahang kidika trumpit puhta muih balna yakat isningna paktanama. 2Sakripais walapni yamni as bustanama Dawan, sakripais bustanama kidika turuh almuk as, sīp almuk as, dawakat sīp tiaskaubu kurih as lalaihna kidika dawakat wayakani dis 3dawakat minitdis kalanin dini, plawar disala karak bahawi laihna kidika laih kilo tiaskauas karang, turuh almuk as yakat, sīp almuk yakat laih plawar kilo arungka karang 4dawak sīp as kidika laih plawar kilo bu karang. 5Kuts as bik sakripais yayamna karang, dutnina dawak disnin yulni, 6waiku bani, sakripais bubuswa pasyakat, dawakat sakripais ma bani bubuswa kidika minit yakat, plawar bik, wain bik Papang yamnin yulwa kaput. Adika sakripais laih walapni yamni as busna karang Dawan ayangni kau.
Minit dis kalanin dutni dawak disna mani
(Lv 23:26-32)
7“Waiku tiaskaubu kidika ma salap yakat, kaluduhna holi as dutanama. Kidika mani di kastas awanama,#Lv 16:29-34. dawak wark as bik yamtas awanama. 8Sakripais walapni as bustanama Dawan yakat, turuh almuk as sīp almuk as, dawakat sīp tiaskaubu, kurih as la laihna kidika wayakani as bik dis kat. 9Plawar disala karak āwi laihna kidika laih kilo tiaskauas karang turuh almuk as yakat, kilo arungka karang plawar sīp almuk as yakat, 10dawak plawar kilo bu karang sīp aslah kaput libitna karang. 11Kuts as bik sakripais yayamna karang, dutni dawak disnin yulni, dutni dawak disnin mani sakripais yayamwa minit yakat ūk karang, adika sakripais laih, kaput bik minit yakat minitdis kalanin di minik balna wain bik libitna karang.
Panting kau ū labanni pakna alasnina
(Lv 23:33-44)
12“Waiku tiaskaubu, kidika kaupak ma salap minitkau singka yakat manna kaluduhnin holi as yamtanama. Kidika mani wark as bik yamtas awanama. Ma tiaskaubu alasna dutanama, Dawan ayangni nuhni kau duta.#Ex 23:16; 34:22; Dt 16:13-15. 13Ma tatuna#29.13 Ma tatuna: grik kau ulna kidika laih kaput yulwi. Hibru wauhnitaya yakat laih adika yulni kalahwas ki. yakat sakripais karauni walapni kapat turuh ahalmuk wawahma 13, sīp ahalmuk bu, dawakat sīp kurih as lalaihna kidika 14 sakakahwa awaskat Dawan yakat busta kalatanama. 14Minit dis kalanin diwi plawar kidika bik, kilo tiaskauas karangki, disala yamni āwi laihna kidika, turuh as kidika kaput bahana karangki plawar, sīp almuk as yakat plawar kilo arungka libitna karangki, dawakat, 15kilo bu karangki plawar, sīp as yakat. 16Ma bitik yakat sakripais bubuswa kidika minit yakat, kuts as sakripais bubuswarang, witingna dutnina dawak disnin yulni.
17“Ma bu yakat laih, turuh ahalmuk salap minitkau bu duahaina karang, sīp ahalmuk bu, dawakat sīp 14, kurih as lalaihna balna kidika sakahwa awaskat. 18Kidika minit yakat minitdis kalanin dini, diminik balna duahaina karang, dawakat wain bik duahaiwarang, turuh ahalmuk ampus kat kaput duahaiwarang diminik balna, dawakat wain bik ampus kat kaput sīp ahalmuk balna kidika duahaina karang, Papang yaklauwi yamnin pakna kaput. 19Ma bani walapni bubuswa kidika pasyakat kuts as sakripais yayamna karang dutnina dawak disnin yulni.
20“Ma bās yakat laih, turuh ahalmuk salap minitkau as duahaiwarang, sīp ahalmuk bu, dawakat sīp salap minitkau arungka kurih as lalaihna kidika, sakahwa awas kat. 21Kidika minit yakat duahaina karang, di minik, wain, turuh ahalmuk, sīp ahalmuk, dawakat sīp kurih as lalaihna kidika balna bitik ampus kat, kaput duahaina karang di minit, wain kidika, Papang yamnin pakna kaput. 22Ma bani walapni bubuswa kidika pasyakat, kuts as sakripais yayamna karang, dutnina dawak disnin yulni.
23“Ma arungka yakat, turuh salap duahaina karang, sīp ahalmuk bu, dawakat sīp kurih as lalaihna kidika, salap minitkau arungka, sakahwa awas kat. 24Kidika minit yakat, minit dis kalanin diwi, di minik balna wain duahaina karang, turuh almuk, sīp almuk, dawakat sīp kurih as lalaihna balna kidika bitik ampus kat di minik, wain kidika bik kaput duahaiwarang, Papang yamnin yulna kaput. 25Ma bani walapni bubuswa pasyakat, kuts as sakripais yayamwarang dutnina dawak disnin yulni.
26“Ma singka yakat duahaina karang, turuh ahalmuk tiaskauarungka, sīp ahalmuk bu, dawakat, sīp kurih as lalaihna kidika salap minitkau arungka, sakahwa awas kat. 27Baisa minit yakat, minit dis kalanin dini, diminik balna dawi, wain bik duahaiwarang, turuh, sīp balna kidika ampus duahaina kat, kaput duahaina karang diminik balna bik, Papang yamnin yulna kaput. 28Ma bani walapni bubuswa pasyakat, baisa minit yakat kuts as sakripais yayamna karang, dutnina dawak disnin yulni.
29“Ma tiaskauas yakat turuh wawahma tiaskaubās duahaiwarang, sīp ahalmuk bu, dawakat, sīp salap minitkau arungka, kurih as laihna kidika, sakahwa awaskat. 30Kidika minit yakat, minit dis kalanin dini, di minik balna, dawakat wain bik duahaina karang, turuh, sīp kidika balna ampus duahaina kat, kaput diminik balna bik duahaina karang, Papang yamnin yulna kaput. 31Ma bani walapni bubuswa minit yakat, kuts as sakripais yayamwarang, dutnina disnin yulni.
32“Ma tiaskaubu yakat, turuh ahalmuk tiaskaubu duahaiwarang, sīp ahalmuk bu, dawakat, sīp salap minitkau, kurih as lalaihna kidika, sakahwa awas kat. 33Kidika minit yakat, minit dis kalanin dini, diminik balna dawi wain bik duahaina karang, turuh, sīp balna kidika amput kat, diminik balna bik kaput duahaina karang, Papang yamnin yulna kaput. 34Kuts as sakripais yayamna karang, dutnina dawak disna atnin yulni, witingna ma bani walapni bubuswa minit yakat, ūk karang adika kuts iwi sakripais yayamwarang kidika.
35“Ma tiaskaubās#Jn 7:37. yakat kaluduhnin as yamtanama, muih bitik kalududuhwarang alasna nuhni karak, kidika mani wark as bik yamtas awanama. 36Walapni yamni as bustanama Dawan dini, turuh almuk as, sīp almuk as, dawakat sīp almuk as, dawakat, sīp tiaskaubu kurih as la laihna kidika, sakahwa awaskat. 37Kidika minityakat, minitdis kalanin dini kidika duaitanama, di minik balna, dawakat wain bik, turuh, sīp duaitanama kidika libitwi busna atnin, Papang yamnin yulna kaput. 38Ma bani walapni bubuswa minit yakat, kuts as sakripais yayamna karang, dutnina dawak disna atnin yulni.
39“Adika sakripais balna yamtanamaki, Dawan yakat mani āna balna yakat; manna sakripais yamtamana karang bik kidika laih silp, ūk karangki.”
40 # S.b. 29:40—30:16 kidika laih S.b. 30:1-17 kat kidika simh ki hibru kau ulna kidika.Dawakat, Moses yaklauwi diyulna dai Israel balna yakat, Dawan ais yamnin yulna kidika bitik.
Biblia Sumo
Texto © Sociedad Bíblica de Nicaragua 1998