Números 2
2
Ūnina labanni pāni kat kat yayamna kidika
1Dawan yaklau aput diyulna Moses dawi Aarón yakat:
2“Israel balna laih kalpaknin ūni labanni kidika kaupak apis nailuih kau ūnina labanni pakna atninna ki, planinakin dinit kat kat, dawak bik wanaihnina balna kat kat.
3“Ma kilwa niningkauh yakat ūnina labanni papakna karang Judá muihni kalbauyang balna planinakin dinit kau lapakwi aiwa kidika. Judá sulani kalbauyang balna tanina tuna kidika laih Naasón, Aminadab walanibis. 4Ayangni āwi kukulna yakat kalahna kat muih ahal manah 74,600 dai. 5Witingna yaihnitna yakat Isacar sulani kalbauyang balna kidika ūnina labanni papakna karang, witingna tanina tuna laih Natanael, Zuar walanibis. 6Ayangnina āwi kukulna yakat kalahwi, 54,400 muih ahal. 7Zabulón sulani kalbauyang balna kidika yaihnitna yakat ūnina labanni papakna karang, witingna taninatuna laih Eliab, Helón walanibis. 8Ayangnina āwi kukulwak kalahna kidika laih 57,400 muih ahal kalahna dai. 9Kaput laih Judá muihni kalbauyang balna kidika sahyakna bas kalahna karang, bitik kat 186,400, kidika ahalni balna Israel muihni balna tanitna yakat lapakwi uina karang.
10“Wadah niningkauh yakat ūnina labanni papakna karang Rubén sulani kalbauyang balna planinakin dinit kau lapakwi aiwa kidika. Witingna taninatuna laih Elisur, Sedeur walanibis, 11ayangnina āwi kukulna yakat kalahwi 46,500 muih ahal. 12Kidika yaihnit yakat Simeón sulani kalbauyang balna, ūnina labanni papakna karang, witingna taninatuna laih Selumiel, Zurisadai walanibis, 13ayangnina āwi kukulna yakat kalahna 59,300 muih ahal. 14Gad sulani kalbauyang balna bik yaihnityak aslah kalpakwi ūnina labanni papakna karang, witingna taninatuna laih, Eliasaf Reuel walanibis, 15ayangnina āwi kukulna yakat kalahwi 45,650 muih ahal. 16Kaput laih Rubén sulani balna kidika kalbauyang manah sahyakna bas karang, bitik kat 151,450 muih ahal, kidika balna laih tatuna kaupak usnit yakat uiwarang.
17“Levita muihni balna laih ū lababanni arungka kidika papusyakat, kalpaknin ūni labanni kidika duwi uina karang. Ū lababanni arungka kidika laih as tatuna kalahwak ūk balna kidika usnit, usnit uina karang, planinakin dinit kat kat.
18“Ma kawa niningkauh yakat ūnina labanni papakna karang, Efraín sulani kalbauyang balna planinakin dinit kat uiwabang kidika, taninatuna laih Elisama, Amiud walanibis. 19Ayangnina āwi kukulna yakat kalahwi 40,500 muih ahal. 20Kidika yaihnit yakat Manasés sulani kalbauyang balna kidika aslah kalpakwi ūnina labanni papakna karang, witingna taninatuna laih Gamaliel Pedasur walanibis, 21ayangnina āwi kukulna yakat kalahna 32,200 muih ahal. 22Benjamín sulani kalbauyang balna bik aslah kalpakwi ūnina labanni papakna karang, tanina tuna laih Abidán, Gedeoni walanibis, 23ayangnina āwi kukulna yakat kalahna 35,400 muih ahal. 24Kaput laih Efraín sulani kalbauyang balna kidika sahyakna bas kalalahna karang, ahal kalbauyang manah bitik kat 180,100 muih ahal, tatuna usnitkau uiwabang kidika dangnitna yakat lapakwi uina karang.
25“Tingpal nining yak ūnina labanni papakna karang, Dan sulani kalbauyang balna planikin dinit yakat lapapakwa muihni balna kidika. Dan sulani kalbauyang balna taninatuna laih Ahiezer, Amisadai walanibis, 26ayangnina āwi kukulna yakat kalahna 62,700 muih ahal. 27Kidika yaihnit yakat, Aser sulani kalbauyang balna ūnina labanni papakna karang, taninatuna laih Pagiel, Ocrán walanibis, 28ayangnina āwi kukulna yakat kalahna 41,500 muih ahal. 29Neftalí sulani kalbauyang balna bik kidika balna karak kalpakwi ūnina labanni papakna karang, taninatuna laih Ahira, Enán walanibis. 30Ayangnina āwi kukulwak kalahna 53,400 muih ahal. 31Kaput laih Dan sulani kalbauyang balna kidika sahyakna bas kalalahna karang, bitik kat 157,600 muih ahal, witingna witni yakat lapakwi uina karang planinakin dinit yakat.”
32Israel sulani kalbauyang bitik ayangni āwi kukulwak kalahna kidika laih, 600,550 muih ahal dai. 33Dawan yaklau Moses yakat kalyulna dai kaput, levita balna laih kidika pasyakat ayangnina āwi kulwas dai.
34Israel muihni balna laih Dawan yaklau Moses yakat amput kalyulna kidika kaput yayamna dai: Wanaihnina, sulanina kat kat, planinakin dinit kat lapakwi uina dai.
Currently Selected:
Números 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998