Números 16
16
Coré Papang niningkau yaklauwak wah kalana
1Levita muihni as Coat sulani dai, ayangni laih Coré,#Jud 11. Izhar walanibis, dawakat muih ahal ūk as bās dai, Rubén sulani balna ayangnina laih Datán dawak Abiram, Eliab walanibis balna, dawa kat On laih Pelet walanibis, 2adika balna Moses niningkau yaklalauna. Witingna pasningna yakat Israel balna ūk kakana muih panan binina bu minitkau papusbah, kidika ahalni balna laih tunan muihni balna dai tawan yakat, ayangnina bik nuhni dikukulwa dai. 3Kidika balna bitik kaluduhwi, Moses dawi Aarón kidika balna bu niningna yakat aput yuyulna:
—¡Muih aslah kau tanit yamni kalyamnin kidika danin! Tawan bitik laih Papang yaklauwi yakwi duna, dawakat Dawan laih muih bitik mayang karak ki. ¿Amput dawak Dawan tawanni niningyakat mannamanah tanit nunuhni mana kapat lawamanah?
4Moses kidika dakawi limbabahwi muhni saukat kalna dai, 5dawakat Coré yakat kalyulna, Coré usnit uiwa muihni balna yakat bitik aput diyulna:
—Yahan mapiris niningkauh Dawan yaklau yulna karang angdika muihni witing dini#2 Tim 2:19. kidika dawakat wais kidika bik witing dini kalahna kat minitdis kalanin dini dukiwarang kidika. Witing yaklau walwi yakwarang muihni kidika manah sip karang minitdis kalanin dini kidika dukiuna atnin. 6Aput yamtanauh: Coré walapni buswa dini kidika duaitanauh, dawakat witing karak kaltalyang yamni muihni balna dinina yaka bitik duaita, 7kuhusmak puta dawak busnin walapni kidika bik kahta yahan mani Dawan muhni tani yakat uita laktanauh. Angdika alni Dawan yaklauwi yakna karang kat kidika muihni laih maisihni diskarang ki. ¡Levita muihni yakat ki baisa yulbaunah!
8Usnit dawak Moses yaklauwi Coré yakat kalyulna:
—Yadakanauh levita balna: 9¿Manna namangna yakat dauh yah Papang yaklauwi Israel tawanni paskaupak manayakna kidika, dawakat Dawan pāni holi yakat wark yamnamna dawak tawan muihni balna yakat adika warkni yamta diana atnamna? 10Dawan dukih kalanadai, man dawakat, sulama balna ūk kidika bik, levita balna, witing yaihnit yak atnamna, ¿dawak sumalyang warkni bik yamnin kultamanh? 11Rahm kidika laih, muih as tanit nuhni awaski, witing yakat dutni kalyulnin; man dawi ūk balna karak kalpakta yamtamana kidika laih, Dawan nining kauh lawamana.
12Kidika usnit kat Moses yaklauwi, Datán dawakat Abiram, Eliab walanibis balna yakat diyulna dai uina atnin witing yakat, kaunah witingna aput yuyulna:
—Yawas awanaki ki. 13¿Man namang yakat dauh yah, pa as amak dawi tāwas karak was kaput kira pāni kaupak yanayaktang dautayangna, kidika minit yakat, taninatuna nuhni awinik kultaman? 14Man pa as tāwas dawi amak karak was kapat kira pāni as bik yanaduyawasman, dawakat wain yanimak as bik yanatasman. ¿Muih balna kidika miniknapa dis kapat, dadawak didukiunin kultaman?#16.14 ¿Muih balna kidika...didukiunin kultaman?: wirlana ūk yakat laih aput yulwi: ¿Adika muihni balna akat miniknapa kidika di talwas diyammayah? Y.y. ¿Adika muihni balna akat miniknapa kidika yakmayah? Sihm kidika kapat ki muih dinina yamyang balna yakat wah diayawa dai kidika dawak taninaāwa dai Egipto yakat watwi nawatwi uiwarangpa. Matalna yawas awanaki ki.
15Moses uba kulnin daukalwi, Dawan yakat kalyulna:
—¡Minit dis kalanin dini duwi aiwa kidika man yakat duwinih! Witingna yakat muyulnina as bik dakyaktas yang, dawakat witingna yakat as bik dutni diyamtas yang.
16Usnit kat Coré yakat aput kalyulna:
—Man dawi wanaihma as balna yakarak, Dawan muhni yakat yawanama. Aarón bik yakat sakkarang ki. 17Manna bitik kau walapni puwi busnin subani bin kidika duyawa walapni busnin dini kidika putanama. Man dawi Aarón karak walapni busnin dini kidika duyawa laktanama, ūk balna, panan binina bu minitkau papusbah balna lalakwarang yakat, aslah laktanama, Dawan muhni tani yakat.
18Kaput laih witingna bitik kau walapni busnin subani bin yakat kuh tuturni puwi, dawi walapni busnin bitik āwi uiwi lalakna, Moses dawi Aarón karak witingna bik duwi uiwi lalakna, kalpaknin ūni yakat. 19Coré yaklauwi tawan bitik uduhna dai witingna niningnakauh, kalpaknin ūni labanni muhnit yakat. Dawan alasnina nuhni kidika witingna bitik muhnina yakat lāih kalahna dai, 20dawakat Dawan yaklauwi Moses dawi Aarón, witingna yakat aput diyulna:
21—¡Adika tawanni paskaupak data naikau alahwanauh bitik dismukki ki, sirihni palni!
22Kaunah witingna muhnina sau kat lakwi aput yuyulna:
—Papangki, man lawa muih bitik kau sangninaka diataman kidika, ¿tawan bitik niningkau balna daukalmayah, muih aslah dutni yamna kidika yulni?
23Dawan yaklauwi Moses yakat nangnitlana:
24—Israel balna yakat diyultang, Coré, Datán dawa kat Abiram, kidika balna yaihnitna kaupak naikau yaklalawang.
25Moses yaklauna, dawakat usnit Israel muihni bararak balna yaklalauna, dawakat kiwadai Datán dawi Abiram balna rau dai niningna yakat. 26Tawan yakat diyulwadai:
—Ahal dudutni rau kidika ūnina kaupak naikau lawanauh, di as bik lalaihwinih, witingna dutni yayamna yulni kaupak manna bik dautanama.
27Tawan dai kidika dawi naikau kalahna dai Coré, Datán dawi Abiram, witingna balna yaihnitna kaupak, Datán dawi Abiram karak rau dai dūrnina kung yakat, yalnina walaninabis balna bitik. 28Dawakat, Moses baisa yulna:
—Adika kau namangnakaki, Dawan yaklauwi yasihna adika dini yamna atnin, di yamtayang kidika yang alas kulnik yamtasyang. 29Adika ahalni balna, muih madaunik mani kaiwak dauda kaput dadauna karang kat, muih ūk dadauwa kapat, kidika laih Dawan yaklauwi yasihwas kat awarang; 30kaunah Dawan yaklauwi di taldas dini as kapat yamwarang kat, sau yakat kalawak wakahwi ūk mukwarang kat, dinina balna bitik, dawak sau bānipas yakat sangka auiwarang kat, manna talnama, kidika ahalni balna Dawan yakat dauh kukulna dai karang.
31Moses yulbauwi dawakat, witingna raudai yakat sau wakahna, 32dawakat, ahal bitik Coré yulni dakawi usnit uina muihni balna, wanaihnina balna dinina balna bitik ukmukna dai. 33Sangka, sau bānipas yakat auina dai, dinina bitik kau, kaput laih sau kidika watwi putna dai. Kaput Israel paskaupak dakmukwadai. 34Parasni sararahwak dakawi, Israel balna bitik yaihnit kau bang dai kidika kiri aput yuyulna: “¡Sau mayang akat bik mai-ukwarang!” 35Kidika minit yakat, Dawan yaklau kuh as sihwakat muih 250 busnin walapni bubusna dai kidika dadauna dai.
36 # S.b. 16:36—17:13 kidika laih S.b. 17:1-28 kat kidika simh ki hibru kau ulna kidika.Dawan yaklauwi Moses yakat kiwi aput kalyulna:
37“Aarón walanbis, Eleazar yakat paktang, walapni busnin dini balna duahaina dai, kidika naikau dukiwi ruhmmukwang, kuhusnimak balna baisa dahlwas balna kidika. 38Muih ahal dutni yamwi dadauna balna, walapni busnin duduwa dai kidika maisihni diski, kat yang niking yakat kidika dini balna kau walapni busnin duahaiwa dai bahang, kidika dini kau duta sakripais busnin pāni minitkau kidika yamni yamtanauh, bahang kaput laih Israel balna yakat niningnakana as karang.”
39Muih ahal dadauna balna dai kidika, walapni busnin duwi uina dai Papang muhni tani yakat, bahang kidika subani binina, sumalyang Eleazar yaklauwi bitik anana dai, dawakat paknadai kidika dini balna tiswi labanni yamwakat, sakripais busnin pāni kidika yamni minityakat yamna atninki. 40Adika laih, Israel balna yakat isningna paknin as dai, muih as bik, Aarón sulani awas kat sipawas dai Dawan yakat walapni busnin, kaput awas karangkat Coré dawak sulani balna kau ais dikalahna kidika kaput niningna yakat kalahwarang. Dawan yaklauwi Moses yakat pakna dai Eleazar yakat kalyulnin, bahang kidika yulni kaput laih yayamna dai.
41Payahwakat, Israel balna bitik Moses dawi Aarón niningna kauh yuyulna dai:
—¡Manna lawa Dawan tawanni muihni balna kidika itamana!
42Moses dawi Aarón, witingna yaihnitna yakat awaih dadakna dai, kaunah witingna, kalpaknin ūni yakat uina. Kidika minitni yakat mukus kiwi bukna ū minit yakat dawakat Dawan alasnina kidika lāih kalahna dai. 43Kaput dawakat Moses dawi Aarón karak uina dai kalpaknin ūni muhnit yakat, 44dawakat Dawan yaklauwi Moses yakat aput kalyulna:
45—¡Muih bang kidika yaihnitna kaupak naikau lawanauh, sirihni dismukki!
Moses dawi Aarón karak muhnina kidika sau kat lalakna dai 46dawakat Moses yaklauwi Aarón yakat aput kalyulna:
—Walapni busnin subani bin dutaman kidika duaita kuh tuturni puta data, walapni busnin dini kidika bik pasyakat atah; tawan yakat yawa, Papang kauh yultah muih balna dutni yayamna kidika dutnina dawak diswang, Dawan kulnin daukalnin kidika dahlna sakki dawak wah kidika laih uman kalawak kaiwi.
47Moses kalyulna kaput yamna dai Aarón, muih kaluduhna bangyakat kiri kiuna, Papang wah sihma kidika muih balna dauwi kaiwa sakdai, tawan pasyakat. Aarón, walapni busnin kidika puwi, mahka Papang kalni dinit yakat bukwi yulna dai muih balna dutnina kidika dawak disna atnin. 48Usnit kat dadauna balna, dawak sangka balna, kidika bu kidik papus yakat kakawadai, kaput laih muih dauwi kaiwa sak kidika laih watna, 49kaunah muih kidika uman dadauna dai, tausin salap minit kau arungka, minit kau andat tiaskaubu, Coré Papang nining kau yaklauwak muih dadauna kidika laih kulwas dai. 50Papang wah sihna kidika laihwak dawakat, Aarón nawatwi kiuna kalpaknin ūni yakat, Moses karak kalpakna atnin.
Biblia Sumo
Texto © Sociedad Bíblica de Nicaragua 1998