Números 13
13
Moses yaklauwi Canaán sauni yakat muih sihwak awaihwi tatalna
(Dt 1:19-25)
1Dawan yaklauwi Moses yakat kiwi aput kalyulna:
2“Ahal buas yakat sihtang Canaán sauni kidika awaihwi tatalwang, Israel balna yakat diaki sauni kidika. Sulani uduhna paskaupak as yakta sihta, kaunah tunan muihni kat.”
3Dawan yaklauwi Moses yakat kalyulna kapat, Parán pāni kaupak muih sihna dai. Bitik laih ahal dai tunan muihni mana dai Israel pasyakat, 4kidika balna laih adika dai: Samúa, Zacur walanibis, Rubén sulani paskaupak; 5Safat, Hori walanbis, Simeón sulani balna; 6Caleb, Jefone walanibis, Judá sulani; 7Igal, José walanibis Isacar sulani; 8Oseas, Nun walanbis, Efraín sulani; 9Palti, Rafú walanbis, Benjamín sulani; 10Gadiel, Sodi walanibis, Zabulón sulani; 11Gadi, Susi walanibis, José sulani (yuldarang kat Manasés sulani); 12Amiel, Gemali walanibis, Dan sulani; 13Setur, Micael walanibis, Aser sulani; 14Nahbi, Vapsi walanibis, Neftalí sulani; 15Geuel, Maqui walanibis, Gad sulani.
16Adika ayang balna laih, Moses ahal yakwi sihna dai kidika Canaán yakat awaihwi talna atnin. Oseas, Nun walanbis laih ayangni ūk āna dai, Josué.
17Moses yaklauwi sihna dai Canaán sauni awaihwi talna alni, bahang aput diyulna:
—Néguev yakat yawa, asang yakat ilwanama. 18Kidika sauni amput kat yamni talnama, kidika muihni balna ahal pararasni pa, kidika awas kat pararasni awas pa, dawak bik mahni pa kidika awas kat bulah pa. 19Tawannina kidika talnama ū lababanni pa, kidika awas kat ū aihwa pa, dawakat sau kidika yamni pa kidika awas kat sau dutni pa, yamnin talnama, 20sauni kidika diminik dahni yakwapa, kidika awas kat diminik laihwas pa, dawakat pan duwa, kidika awas kat dispa. Yamaduduwinih; kidika sauni kaupak diminik as as duaitanama.
Wain minik babahwa mani kat, adika dini kalahna dai. 21Kidika ahalni balna uiwi awaihwi tatalna dai, Zin wanilang kauhnimak, wadah nining kaupak Rehob kat, tingpal nining yakat laih, Hamat pāni yaihnit kaupak. 22Néguev kaupak kakana kidika Hebrón kat uina dai, kidika pāni yakat Ahimán muihni balna yalalahwa dai, Sesai dawak Talmai, Anac sulani balna, witingna bik yakat yalalahwa dai. Hebrón tawanni yayamna kidika, Egipto yakat Zoán dis kurih tiaskaubu tanitkau. 23Escol wasni kat uina dai, yakat wain tingni rahni as dadahna dai, minik tunan yayamni laihna kat, dakwi muih bu pan kau alahwi trurukna dai. Ani damni minik bik ananana dai. 24Kidika wasni ayangni laih Escol#13.24 Hibru kau laih, Escol tanka laih upuna. papakna dai, kat kidika pāni yakat Israel muihni balna diminik upuna tunan as dadakna dai kidika yulni.
25Ma muihasluih bu, awaihwi tatalna dai kidika pāni usnit kat nawatwi aina, 26Cades Parán kauhnimak wanilang yakat. Yakat, Moses, Aarón dawakat Israel balna bitik bangdai. Witingna tatalna kidika bitik yuyulna, dawakat diminik balna duwi uina kidika niningna kana dai. 27Moses yakat aput kalyuyulna:
—Man yanasihnaman sauni yakat yawanayangna dai. Rahm kidika laih, sauni kidika tāwas dawi amak karak kiri was kapat, bahang di minik balna adika yakaupak kalahwi. 28Kidika sauni muihni balna laih, ahal pararasni ki, dawakat tawannina balna bik nunuhni ki, dawak bik yamni nanit dadana. Dawak di ūk talnayangna kidika laih, Anac sulani balna muih nunuhni kidika yakat bangki. 29Néguev sauni yakat amalecitas balna yalalahwi, dawak asangpas yakat laih hitita balna yalalahwi, jebuseo dawak amorreo balna laih kuma nining yakauh bangki, dawakat cananeo balna laih Jordán wasni yaihnit yakat yalalahwi.
30Caleb yaklauwi Moses yaihnit kau muih bangdai yakat diyulwak ap dadawak diyulna:
—¡Kidika sauni laih kalbaudi dakyakdi dudarangki! ¡Mayang sipki kalbaudi dakyaknin!
31Kaunah witing karak uina muihni balna aput yuyulna:
—¡Sipawas mayang kidika muihni balna niningna yakat kalbaunin! Witingna kau pararasni ki mayang karak.
32Dawakat muih balna yakat diyuyulna, witingna pa uiwi tatalna kidika, sau dutni ki, dawakat:
—Kidika muihni balna bik muih nunuhni ki. 33Dawak Anac sulani muih nunuhni balna#Gn 6:4. kidika bik talnayangna. Witingna yaihnitna yakat sisin dibin kapat kaldakada dai, dawakat witingna bik kapat maitatalwadai.
Biblia Sumo
Texto © Sociedad Bíblica de Nicaragua 1998