Números 10
10
Lalah kau trumpit balna yamna kidika
1Dawan yaklauwi Moses yak aput kalyulna:
2“Trumpit bu yamtah lalah kau, amar kau tista yamtah, bahang kidika kau duta puhtang kat muih kalududuhwarang dawak diyulna mahka lapaknin kidika. 3Trumpit bupak pupuhwarang kat muih balna bitik kalududuhwarang, kalpaknin ūni labanni, man muhma tani yakat. 4Kaunah trumpit kidika aslah puhwarang kat, sulani balna taninatuna manah kalududuhwarang. 5Trumpit kidika puhwak, muih balna bik parasni sarahwarang kat, ma kilwa nining kauh muih ban kidika mahka lapapakwarang, 6dawak watbu puhwarang yakat laih wadah niningkauh watwi ūnina labanni papakna bangkidika yaklauwi lapapakna karang. Trumpit puhwi sararahwarang kidika laih yaklauwi lapaknin sainni karang. 7Dauhmanah puhwarang kidika laih muih balna kidika kaluduhnin sainni karang. 8Trumpit puhnin muihni balna kidika laih sumalyang balna karang, Aarón sulani balna. Adika laih manna yakat lā as ban kaput atnin karang.
9“Manna saumana kat, waihmanala kidika kaiwi manakalbauwakat, alahwa kalbaunamna barang kat, trumpit puhta parasni bik sarahtanama. Kaput laih, yang Dawan manna Papangmana yang adika, manna yakat isingkatwak, waihmanala tingni kaupak manalaihtik yakki. 10Trumpit puhtanama alasna mani kat, waiku wisam kalahwa mani, dawakat, busnin dini duaitamana kapat Papang nining kau, dawak biri biri dutmana datanang dima yulni busnin dini bustamana kaput mani balna yakat trumpit puhtanama. Kaput laih isingpuk karang manna yakat. Yang kuduh Dawan manna Papangmana.”
Israel balna Sinaí kaupak kalahwi uiwi
11Kurih bu laihwi bayakwi minit yakat waiku bu, kidika kaupak ma muihasluih laihna yakat, mukus kidika mahka yaklauwi kiuna, Papang pāni holi kidika minit kaupak. 12Israel balna mahka lapapakna dai Sinaí kauhnimak wanilang kaupak. Mukus kidika kiwi laihwatna dai Parán kauhnimak wanilang yakat. 13Dawan yaklauwi Moses yakat kalyulna kaput,#Nm 2:1-34. 14tatuna, kalbauyang balna uina kidika laih, Judá planikin dinit kau lapapakwa balna dai kidika, taninatuna laih Naasón, Aminadab walanibis. 15Isacar sulani kalbauyang balna kidika, taninatuna duwa kidika laih Natanael, Zuar walanibis. 16Zabulón sulani kalbauyang balna taninatuna laih Eliab dai, Helón walanibis. 17Kaput laih Papang ayangni nuhni yamnin pāni kidika dudutna, Gersón dawi Merari sulani balna, usnit kat mahka trukwi duwi uina.
18Kidika usnit kat, kalbauyang balna Rubén planikin dinit kat lapapakwa balna kidika uinadai, taninatuna laih Elisur, Sedeur walanibis. 19Simeón sulani kalbauyang taninatuna laih Selumiel, Zurisadai walanibis. 20Gad sulani kalbauyang balna taninatuna laih Eliasaf dai, Reuel walanibis. 21Kidika usnit yakat Coat sulani balna uina dai, yusyamnin Dawan dini balna duwi uinadai, uiwi wawatwa kat, Papang ayangni nuhni yamnin pāni yamwi dadana awadai.
22Kidika usnit yakat Efraín muihni kalbauyang balna planinakin dinit yakat lapapakwa uiwadai, taninatuna laih Elisama, Amiud walanibis. 23Manasés sulani kalbauyang balna taninatuna laih Gamaliel, Pedasur walanibis. 24Benjamín sulani kalbauyang balna taninatuna laih Abidán, Gedeoni walanibis.
25Witni yakat, kalbauyang ūk kalna dangnitna yakat, uiwa bangdai Dan planikin dinit yakat lapakwa balna kidika, taninatuna laih Ahiezer, Amisadai walanibis. 26Aser sulani kalbauyang balna tanina tuna laih Pagiel, Ocrán walanibis. 27Neftalí sulani kalbauyang balna taninatuna laih Ahira, Enán walanibis.
28Israel muihni kalbauyang balna, mahka lapapakwarang kat, aput laih uiwadai.
Moses yaklauwi daini yakat kalyulna dai, minik dana atnin
29Ma askat Moses yaklauwi daini Hobab, Reuel madianita muihni walanibis yakat aput kalyulna:
—Yang adika sauni kaupak mahka yawayangna, Dawan yaklauwi pa as yananin yulna pāni yakat. Yangna karak aiwah, yamni mayamtanaki, kat Dawan yaklauwi yulna Israel yakat dalani kaltalna atnin.
30Hobab yaklauwi nangnitlana:
—Dikah, yang sauki yakat nawattik yawakih yawi, wanaihki balna bangyakat.
31Moses yaklauwi kalyulna:
—Kiwinih. Kauhmak wanilang pasyakat watwi payahnin pāni pa pakkidika yamni amanglataman, man sipman ta nikingnakanam. 32Yangna karak yawanama kat, Dawan yaklauwi, di yamni yanawarang kat, manyak bik matanaki.
33Kaput laih, Dawan asangni kaupak kalahwi, ma bās lapapakna. Lā baksni Dawan dini kidika witingna tanitna yakat kiuna dai, yakurupdinin pāni as walwīnah. 34Ma payahlawak mahka lapakwi uiwakat, Dawan mukusni kidika witingna minitna yakat kiwa dai. 35Lā salap kuringni kidika mahka duwi uiwak, Moses aput yulwa dai:
“¡Dawan, lawah!
¡Waihmala balna ruhwi kalahwang!
¡Dutni makukulwa balna kidika matalwi kikirang!”#Sal 68:1.
36Kaunah lā salap kuringni kidika watwakat, Moses aput yulwadai:
“¡Dawan waralaih nawatta aiwah
Israel kalbauyang muihni mahni pasyakat!”
Biblia Sumo
Texto © Sociedad Bíblica de Nicaragua 1998