Nehemías 13
13
Nehemías la satuk wirlana
1Kidika mani balna yakat, Moisés wauhnitaya dai kidika, muih bitik muhnina yakat yulwi talna, dawak kidika wauhnitaya yakat ulna dai, Amonita balna dawak Moabita balna kidika sip-awas palni dai Papang tawanni atnin. 2(Kat Israel balna yakat, kasnin dini karuk kalahwi uiwi kalpapakwas dai, dinin karak bik, nawatkauh laih, witingna Balaam yakat lauwi kalalana dai, Israel balna#Nm 22:1-6. niningyakat la tuhna atnin yulni, Papang yaklauwi la tuhnin kaupak, blisin yakat wirlana dai karang bik.)#Dt 23:3-5. 3Kaput laih, la yulwa yakat dakakana kat, Israel kaupak dakwi kalalahna dai, ūk balna karak kalbahahana muihni balna kidika.
4Kidika tanitkauh, sumalyang Eliasib kidika, Papang ūni kau di uduhna sakkidika witing tingni yakat dai. Kat Eliasib kidika Tobías karak kalwanaih dai bahang, 5pa as kalana dai, kidika pāni laih muhnilau kau, kidika yakat minitdis kawa dini kidika yakat apakwa dai, dawak walapni buswa dini balna, di ūk balna salap lalauwa plawar minik balna, wain, dawak disala bahang kidika laih, dipakwa dai, libait balna yakat diana atnin, unbauyang balna, dūr maintalyang balna yakat bik, dawak baisa minit yakat sumalyang balna yakat diayawa kidika bik. 6Dawak adika dini balna bitik kalahwa yakat, yang Jerusalén yakat sak-awasyang dai, kat Artajerjes Babilon kingni, witing king kana kurih muihasluih minitkau, salap minitkau, bu yakat, wattik king yakat yawanayang dai, kaput laih ma as as bayakwakat wattik king yakat yulnayang dai yadawak alahwana atnik 7dawakat Jerusalén yakat wattik nawattik yawanayang. Bahang kidika yakat amanglana yang dai Eliasib dutni yamna kidika, Tobías kulnin lani kaput yamwi, Papang ūni, watakni yakat pa apis kalana kidika yulni. 8Kidika yulni uba kulnik daukalna dai, dawak Tobías ūni kau yalahwi dini balna dawak di ūk balna bangdai kidika bitik ahni yakat ruhmyaknayang. 9Usnit kat di paknayang pāni kidika suhwi yakna atnin, dawak watwi Papang ūni kau di yusyamnin dini balna kidika dukiwi āna atnin, minitdis kalanin dini, dawak walapni busnin dini balna bik.
10Dawak bik dakanayang libait balna yakat bik kasninna diawas ki,#Dt 12:19. dawakat libait balna, kaput bik unbauyang balna, bik witingna makatyulnin warkni yayamwa dai kidika kaupak dawi kikirana, dawak mahka saunina kau uina. 11Kaput laih dibilnayang tunan muihni balna yakat, Papang ūni ruhmwi dadana kidika yulni. Usnit kat sumalyang balna dawak libait balna kidika uduhtik datik, wattik panina dianayang, 12Judá muihni balna bitik salap launin#Mal 3:10. minit kidika duahaina dai, plawar minik, wain dawak disala. 13Usnitkat, sumalyang Selemías kidika di maintalnin āna dai, dawak ulyang muihni laih Sadoc yaka, dawak libait as ayangni Pedaías āna dai; dawak tingnisut laihnin laih Zacur walanibis Harán ānayang dai, dawak Matanías mani, kat witing kidika al yamni as kalkulna dai bahang. Witingna tingnina yakat dai wanaihnina balna sahwi yaknin kidika. 14¡Papangki: yang adika yamnayang kidika yakulta-awah; dawak datang damatkahnin-awaski yamni yamnayang kidika man ūma yakat dawak man kau makatyulnin warkni kidika bik!
15Kidika mani balna yakat talnayang Judá yakat yak-urupdinin mani#13.15 Yak-urupdinin mani: kidika laih satadi mani. wain minik atatakwa dai wain wasni yamna atnin yulni, dawak wain kidika bik trurukna, kaput bik muyul balna wain tururukna dawak wain minik balna bik, ani damni minik balna, dawak truknin satni ūk balna bik, bahang kidika laih yak- urupdinin mani kat Jerusalén yakat duwi uina#Ex 20:8-10; Dt 5:12-14; Jr 17:21-22. kaput laih yang dibilnayang kidika mani dinina wauhwi bakakanwa kidika. 16Baisa minit yakat, Tiro sauni kau tawan nunuhni as as bangdai kidika, witingna waspadini dawak di ūk balna bik duwi uiwi wauhwi bakakanwa dai, Ju muihni balna Jerusalén kau bangdai yakat, yak-urupdinin mani kat. 17Kaput laih Judá tunan muihni balna yakat bitik aput diyulnayang:
—¿Amput dutni yamtamanah, yakurupdinin mani kultasmana kidika? 18Aput yayamna dai kuduh manna muihmana-bararak balna kidika bahang Mapapangki yaklauwi dutni manas mamikit yakat duaina dawak adika tawanni nuhni minit yakat bik. ¿Papang kulnin kidika baisa daukalwang-timana katpah Israel nining yakat, yak-urupdinin mani kultasmana yulni?
19Kaput laih yang dipaknayang, mahka mapukwak dawak yak-urupdinin mani kidika kaiwak,#13.19 Israel balna ma kukulwa dai kidika laih, mahka ma kidika kakiudawa kaupak kukulwadai. Jerusalén dūrni kidika putnin, dawak apahnin-awaski mani kidika bayak-dawakat apahnin. Dawak baisa minit yakat, yang diki yayamwa muihni balna kidika sihting uina dūr yakat, yak-urupdinin mani#13.19 Yak-urupdinin mani: kidika laih satadi mani. yakat dadawak di duahaiwa kidika bayaknin-awas. 20Di wauhwi bakanyang muihni balna kidika watmanas Jerusalén yakat kawas ahni yakat payayahna, 21kaput laih yang witingna karak biri biri yultik talnayangna, dawak dibilnayang, witingna daklana muhnit tani yakat payayahwa kidika, dawak bik diyulnayang, witingna watwi yayamwarang kat, yang dilaihtik tingnina sitki. Kaput dawak kaupak yak-urupdinin mani yakat witingna uiwas dadana. 22Usnit kat libait balna yakat paknayang kalsahwi kalahdawi dūr yakat uiwi maintalna atnin, yak-urupdinin mani yakat dutni yamnin-awas yulni. ¡Papangki: adika yulni yang akat bik yakulta awah, dawak dalani lani dutaman kidika kau bik mikun yatalah!
23Dawak talnayang kidika mani balna yakat Ju muihni balna as as, Asdod, Amón dawak Moab yayalni balna karak kalduduna dai; 24dawak walaninabis papuswayah kidika Asdod tūni yuyulwadai dawak tuni ūk balna bik, kauna Ju tuni laih yuyulwas dai. 25Witingna karak kalbiltik dawak la dituhnayang. As as laih dalani dianayang, dawak basnina bik istik daknayang, dawak dipaknayang Papang ayangni kau yakwi yulna atnin, witingna walaninabis ahal, yayal kidika sau ūk muihni balna kidika kaldunin-awas, dawak witingna walaninabis yalnina kapat bik kulnin-awas, dawak witingna yalnina kapat bik dunin-awas.#Ex 34:11-16; Dt 7:1-5. Dawak baisa minit yakat diyulnayang: 26“¡Adika dai Israel kingni Salomón dutni yamna dai kidika! Dawak sau ūk balna pasyakat witingna kapat king ūk disdai, dawak bik Papang yaklauwi dalani talna#2 Sam 12:24-25. dawak king āna dai Israel minit yakat, dawak sau ūk yayalni balna yaklauwi kalyayamwak dutni yamna dai.#1 Re 11:1-8. 27Kaput bahang dawak diswas karang manna Papang niningkauh dutni palni yamtamana kat, sau ūk yayalni balna dutamana yulni.”
28Joiada walanibis balna kaupak al as, dawak sumalyang nuhni Eliasib walanibis al, dawak witing kidika laih Sanbalat#Neh 4:1. horón kaupak kidika unisah dai, bahang Sanbalat laih horonita dai, bahang yamtingkat yang muhki tani kaupak kirana. 29¡Yang Papangki: Ismangkatta man sumalmayang warkni daukalna kidika, dawak sumalyang warkni pranimis dawak libait warkni balna bik daukakalna kidika!
30Kaput laih klin yamnayang bitik kau, sau ūk muihni balna dai kidika, dawak sumalyang warkni dawak libait balna bik, witingna bitik warknina kat kat; 31kuh balna duainin bik mani kat, dawak di minik balna tatuna kalahwa kidika bik. ¡Papangki, ismangkattah yang ilp yatah!
Currently Selected:
Nehemías 13: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
