Mark 3
3
Jisas yakurupdinin mani muih asdulauna siknis kaupak
(Mt 12:9-14; Lk 6:6-11)
1Jisas witing watwi Papang yulni sumamalwa ūni as kau kana; dawak kidika ūni yakat muih al tingni kusulana as sakdai. 2Dawak muih balna kidika Jisas yakpakdi kaltatalna yakurupdinin mani yakat sikninis kaupak yamni kalyamwarangpa, dawak kaput laih yulni yakna atnin. 3Jisas yaklau muih al tingni kusulana yakat kalyulna:
—Lawah, dawak papusyakat yawah.
4Usnit kat muih ūk balna yakat diyulwi dakana:
—¿Yakurupdinin mani yakat ais yamwih: di yamni kidika awaskat di dutni? ¿Muih sangnika as laihwi yaknin kidika awaskat daukalpamnin?
Kaunah witingna laih apdadana dai. 5Bahang Jisas witing yaihnitkau muih balna bangyakat kulnin daukalwi ditalna, dawak bik kulninna bukna dai, kat kulninna dadasni kidika yulni, dawak kalyulna kidika al yakat:
—Tingma dulautah.
Kaput laih al kidika tingni dulauna, dawak tingni kidika yamni kalyamna dai. 6Kaunah fariseo balna laih kalahwi, Herod karak aslah balna kidika laih ridi kakalna Jisas kidika inin.
Muih mahni lakun kungyakat uina
7Jisas witing disainipil balna karak lakun kungyakat uina, dawak Galilea muihni balna mahni bik usnit uiwi uina. 8Jisas witing di nunuhni balna yamwa kidika muih balna dakakana kat, Judea kaupak, Jerusalén, Idumea, Jordán kaupak ma kilwa niningkauh, Tiro sauni, dawak Sidón sauni kaupak bik muih mahni uiwi kaltatalna dai. 9Kidika yulni, Jisas disainipil balna yakat diyulna kuring as ridi yamnin, muih balna mahni kidika kallaihnin awas yulni. 10Kat muih mahni sikninanis kaupak yamni diyamna dai kidika yulni, siknis balna bitik kidika witing minityakat duwi uina, tingnina kau Jisas yakat laihwi ilp duna atnin.#Mk 4:1; Lc 5:1-3.
11Dawak spirit dutni balna Jisas yakat talwi, witing muhni yakat limbabahwi sararahna dai:
—¡Man laih Papang Walanibis man!
12Kaunah Jisas yaklau dibilwi diyulwadai witing yulni muih balna muhnina yakat di as bik yulninna awas.
Jisas yaklau apostel balna 12walwi yakna kidika
(Mt 10:1-4; Lk 6:12-16)
13Kidika usnit kat Jisas laih asang as kau kilwi kiuna, dawak angdika muihni balna yakat witing yamni talwa kidika yakat diyulwak iluina. Aslah kalbahahana mani kat, 14witingna paskaupak 12 walwi yakna dai, witing yakat minikdana atninna dawak bik uiwi yul yamni kidika yulna atninna. Adika balna akat ayangnina pakna dai apostel, 15dawak witingna yakat parasnina diana sitan balna kidika kangwi yakna atnin. 16Adika balna ki 12 walwi yakna kidika: Saiman, ayangni ūk Pita pakna kidika; 17Sibidi walanibis balna Jims dawak wirahni Jan kauna, kidika balna yakat laih Boanerges pakna (yuldarangkat, “alwana walanibis balna”); 18Andru, Pilip, Bartolomé, Matyu, Tomás dawak Jims, Alpius walanibis; Tadeo, Saiman rahmni yulni kalbauyang dai kidika, 19dawak Judas Iscariote, usnit kat Jisas yakat malni kau pāt yakat āna kidika.
Jisas yulni yayakna sitan kaupakparasni duwi atwi
(Mt 12:22-32; Lk 11:14-23; 12:10)
20Usnit kat Jisas ū as kau kana, dawak watwi muih mahni palni kalududuhna dai, witing dawak disainipil balna kat bik sip di kakaswas dai. 21Jisas wanaihni balna amanglalana mani kat, kalahwi uina dai duwi uina atnin, muih balna laih yuyulwadai Jisas laih tunan dutni kalna.
22Lā sumalyang balna Jerusalén kaupak uina kidika bik yuyulwadai: “Beelzebú, sitan balna taninatuna kidika yaklau adika alni akat parasni kalana sitan balna yakat kangwi yakna atnin.”#Mt 9:34; 10:25.
23Jisas yaklau muih balna yakat uinin diyulna, dawak yul as yul ūk karak libitwi diyulna: “¿Amput sitan yaklauwi witing yakauna kangwi yakwarangyah? 24Sau as sahwi kalahna bu kidika sip sak-awas karangki; 25dawak kalwanaih as sahwi kalahna kidika, sip sak-awas karangki. 26Kaput bik, sitan kidika sahwi kalahwi witing alas niningyakat yaklauwarang kat, witing sip sak-awas karangki; kidika laih mani witni kiwi kana karang.
27“Muih al as parasni kidika ūni yakat sip muih as kawi witing dini balna kidika dakyakwas karangki, laihwi sitwas tanitkauh; kaput laih witing dini balna kidika dakyaknin sip karang.
28“Barangni manayultayang Papang yaklau muih balna dutnina bitik dawak dutni mahni yuyulwarang kidika bik dawak diswarang ki; 29kaunah angdika muihni Spirit Holi yakat dutni yulwarang laih, sip dutni dawak diswas karang,#Lc 12:10. kaunah witing dutni kalkulna kidika laih ban kaput karang.”
30Adika laih Jisas yaklau yulna dai, kat witingna yaklau yuyulwa dai Jisas laih spirit maisihni duwi.
Jisas nanangni dawak wirahni balna kauna
(Mt 12:46-50; Lk 8:19-21)
31Kaput bik Jisas nanangni dawak wirahni balna kauna uina, kaunah ahni yakat watwi kidika kaupak yul sisihna dai Jisas kalahkaina atnin. 32Muih balna Jisas yaihnitkau bangdai kidika yaklau kalyuyulna:
—Man nanangma, wirahma ahal balna dawak wirahma yayal balna kauna ahni yakat mawawalwi.
33Witing yaklau nangnitnalana:
—¿Wais balnayah yang nanangki dawak yang wirahki balna kidika?
34Usnit kat, witing yaihnit kau muih balna yalahna bangdai kidika yakat ditalwi, baisa minit lakwi aput yulna:
—Adika balna ki yang nanangni dawak yang wirahki balna. 35Bahang wais Papang kulnin lani yamwa kidika, kidika ki yang wirahki al, wirahki yal dawak nanangki.
Currently Selected:
Mark 3: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
