Miqueas 3
3
Kabamint dudutni balna niningna yakat yulna
1Waralaih dakanauh, kabamint balna dawak Israel tunan muihni balna,
¿manna amanglanamana-awas katpah
la kat yamnin kidika?
2Kaput kauna, yamni kidika dutni talaman,
dawak dalani talamana dutni kidika;
tawanki unitak taktamana
wakalni manah kaldatamana.
3Tawanki kidika sangka palni kakaswi;
unitak tuturwi dawak wakalni balna babahwi,
suba yakat āwi lahnin dinimuihni kapat yayamwi.
4Ma askat manna Dawan yakat yultanama,
kauna witing nangmatnalawas karang.
Kidika mani manna kaupak yakmaldarang
dutni yamnamana kidika yulni.
5Tawanki kidika ta pini yakat kiwi
prapit balna alas kalyuyulwa kidika yulni,
kulnin aslah lani yuyulwi, di diayawak kakaswa muihni balna yakat,
kauna war duahaiwi
tininapas yakat puwi babangwas balna yakat.
Dawan yaklauwi prapit balna yakat diyulwi:
6“Manna watta dutas awanama
prapit amana talwa kapat kidika pukta yakat
dawak tanit kau ma balna yakat di kalahwarang kidika yultas awanama.”
Ma kidika kawi kiuna karang kidika prapit balna yakat,
madah kidika puksani manah kalwarang, witingna yakat.
7Kidika di talyang balna kidik asalnina kalahna karang.
Witingna bitik ap dadawarang,
Papang kaupak di as bik diyulwas dawakat.
8Nawatni kauh laih yang nikingyakat,
Papang spiritni yaklauwi paraski yana,
la kat yaka bik dawak kulnik parasni atnik bik,
kaput laih Israel muhni kat witing kulnin dutni
dawak dutni balna yamna kidika yaktik yulnik.
9Waralaih adika dakanauh kabamint balna,
dawak, Israel tunan muihni balna,
manna la yamni kidika dutni talamana,
dawak di barangni kidika kawaini yamtamana,#Am 5:7.
10Jerusalén kidika watta lahta dulauta yamtamana,
Sayan asangni nuhni rahni balna kidika laih inin lani karak,
dawak la dutni karak.#Hab 2:12.
11Tawan nuhni wihnita balna kidika dadawak yakauh dimurna ki,
sumalyang nunuhni balna kidika laih lalah yulni manah sumamalwa dai,
dawak prapit balna laih, witingna di baisa kaikalahwas yulni balna kidika bakakanna,
dawak yuyulna Papang yaklauwi ilp diawi bahang aput yuyulna:
“Papang laih mayang karak ki,
di dutni as bik mailaihwas karang.”
12Kaput bahang manna dutmana yulni
Jerusalén Sayan tawanni nuhni kidika daukalna karang,
dawak kidika asangni kau Papang uni kidika laih minit yakat
dibasta manah ukusna karang.#Jr 26:18.
Currently Selected:
Miqueas 3: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998