Matyu 4
4
Jisas traini talna kidika
(Mk 1:12-13; Lk 4:1-13)
1Usnit kat Spirit yaklau Jisas yakat duwi kiuna dai kauhmak wanilang yakat, muih alasni yulyang yaklau trainitalna atnin.#Hib 2:18; 4:15.
2Madah 40 dawak pukta 40 sakdai di as bik kaswas, dawak usnit kat yuh kal-laihna dai. 3Bahang muih alasni yulyang kidika laih Jisas yaihnit yakat kiuna dai traini talna atnin, dawak aput kalyulna:
—Rahm palni man Papang walanibis man kat, adika kinipala balna akat yultangkat plawar busna kakalwang.
4Kaunah Jisas yaklau nangnitlana:
—Ulna yakat yulwi: ‘Muih al kidika plawar busna kau manah laih sangka awas karang, kaunah sangka karang Papang kungnimak kaupak yul balna kalahwarang kidika kau bik.’#Dt 8:3.
5Usnit kat muih alasni yulyang kidika yaklau Jerusalén tawanni nuhni holi kidika yakat duwi kiuna dai, makat yulnin ūni baisa maluihni yakat ilna dai 6dawak aput kalyulna:
—Rahm palni man Papang walanibis man kat, sau yakat sutta buktah; kat ulna yakat yulwi:
‘Papang witing innisal balna kidika sihwarang ki mainmatalna atninna.
Witingna tingnina kau madulalauwarang ki,
kipala balna yakat buknam awas yulni.’#Sal 91:11-12.
7Jisas yaklau nangnitlana:
—Ulna yakat bik aput yulwi: ‘Man Papangma Dawan yakat traini talwinih.’#Dt 6:16.
8Witni kat muih alasni yulyang kidika yaklau duwi kiuna dai asang as maluihni kat, dawak sau balna nunuhni kidika yakat niningkawi 9kalyulna:
—Limbabahta ayangki tanit nuhni yamma kat, yang lawik adika maki ki.
10Jisas yaklau nangnitlana:
—Alahyawah satanas, kat ulna yakat yulwi: ‘Man Papangma Dawan yakat ayangni tanit nuhni yamtah dawak bik witing yakat manah dini yamtah.’#Dt 6:13.
11Bahang muih alasni yulyang kidika laih Jisas yaihnit kaupak kalahna, dawak insal balna buas aiwi dini yayamna dai.
Galilea yakatJisas warkni tunan bahna kidika
(Mk 1:14-15; Lk 4:14-15)
12Jisas witing Jan silak ahana yulni kidika dakana kat,#Mt 14:3; Mk 6:17; Lc 3:19-20. Galilea yakat kiuna dai. 13Kaunah witing laih Nazaret yakat watwas dawi, Capernaum lakunni kung yakat kiwi yalahna dai,#Jn 2:12. Zabulón dawi Neftalí sulanina balna saunina yakat. 14Adika dini kalahna dai prapit Isaías ulna dai kidika kaput kalahna atnin yulni:
15“Zabulón dawi Neftalí balna saunina,
Jordán wasni nakas kau,
kuma kung yakat:
Galilea sauni Papang yakat kukulwas muihni balna yalalahwa kidika.
16Tawan as puksani yakat likdai kidika
yaringni nuhni as talna;
yaringni as dahlna
daunin puksani yakat bangdai kidika balna dinina.”#Is 9:1-2.
17Kidika mani kaupak Jisas witing yulwi sumalna dai: “Papang yakat wirlawanauh, kat Papang king kawa sauni kidika laih ulis dana ki.”#Mt 3:2.
Jisas yaklau dipamyang muihni balnaarungka yakat diyulwak uina kidika
(Mk 1:16-20; Lk 5:1-11)
18Jisas laih Galilea lakunni kung yakat lapakwi kiwalik kauna kalwirah ahal bu talna dai: as kidika laih Saiman dai, ayangni ūk kau laih Pita, dawak ūk kidika laih Andru dai. Witingna laih dipamyang ahalni balna dai, dawak waspa dini laihnin dini kidika was pasyakat ruhm-āwarau dai. 19Jisas yaklau nangnitnalana:
—Uskit uitanauh, dawak yang lawik muih pamyang manayamki ki.
20Kidika minitni yakat waspa dini laihnin dini kidika dapamwi witing karak uina dai.
21Kidika tanit yakat kiwakat, kalwirah ahal ūk bu talna dai: kidika balna laih Sibidi walanibis ahal Jims dawi Jan karak dai, witingna laih papangnina karak kuring as kau bangdai waspa dini laihnin dini kidika ridi yamwa. Jisas yaklau diyulwak uina dai, 22dawak usnit kat witingna kuringnina kidika papangnina tingni yakat dawi Jisas usnit uhuina dai.
Jisas laih muih mahni kau sumalna
(Lk 6:17-19)
23Jisas laih Galilea sauni bitik yakat awaihwadai, Papang yulni sumamalwa ūni balna bitik yakat. Papang king kawa sauni yulni yamni kidika sumalwadai dawak muih balna sikninanis dalani wawauhwa kidika bitik bik yamni diyamwadai.#Mt 9:35; Mk 1:39. 24Jisas yulni kidika Siria sauni bitik yakat yuyulwadai, dawak siknis sat sat dalani wawauhwa balna, spirit dutni dikana balna, di iswa balna#4.24 Di iswa balna: Y.y. mulkus balna. dawak sininawah buhlana balna kidika bik witing yakat duahaiwadai. Dawak Jisas yaklau yamni diyamwadai.
25Galilea muihni, Decápolis tawanni balna, Jerusalén muihni, Judá muihni dawak Jordán kaupak ma kilwa niningkauh sauni muihni balna bik mahni palni kidika Jisas yakat usnit uhuiwadai.
Currently Selected:
Matyu 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
