Matyu 25
25
Sirarau salap yulnina, malni yulni
1“Bahang Papang king kawa sauni kidika laih sihm muih yayal sirarau salap balna kat marid alasnina as kau awasnina balna#Lc 12:35. duwi marid al yakat kalahwi kalpararasna kapat karang ki. 2Witingna kaupak singka kidika laih kulwi tatalwa dai dawak singka uk balna kidika laih kulwi tatalwas dai. 3Kulwi tatalwas muihni balna kidika laih awasnina duwi uina dai, kaunah wasni laih duwi uiwas dai dahn kalwa kat watwi puna atnin; 4kaunah wirlawa kat, kulwi tatalwa muihni balna kidika laih awasnina dawak wasni kauna duwi uina dai. 5Marid al kidika laih sirihni kiwi kawas dai bahang, witingna bitik kau miniknakauhwa kat kakamana dai. 6Pukpapusnin manah kat sararahna dai: ‘¡Marid al kidika laih uman kaiwi! ¡Alahwa kalparastanauh!’ 7Yayal sirarau balna kidika bitik laih yaklauwi awasnina ridi yayamna dai. 8Bahang sirarau singka kulwi tatalwas balna kidika laih sirarau uk singka kulwi tatalwa balna yakat diyuyulna: ‘Awasmana wasni kidika kaupak apis yanatanauh, kat yangna awaskina kidika laih wasni dis kat piyayamwi.’ 9Kaunah sirarau kulwi tatalwa balna kidika yaklau nangnitnalalana: ‘Ahmdeh, kat kidika yamtanaki kat yangna dawak manna kat bik manalaihwas karang ki. Baisa yamni ki bakakanwa pani yakat yawa manna silp dimana bakantanama kat.’ 10Kaunah sirarau singka kulwi tatalwas balna dai kidika laih awasnina wasni bakanna uidadawa kat, marid al kidika laih kaina dai, dawak kulwi tatalna balna dai kidika laih marid alasnina yakat kakawa kat dur kidika putna dai. 11Usnit kat sirarau uk balna kidika laih aput yulwinah uikakana dai: ‘¡Dawan, Dawan dur apahtah!’ 12Kaunah witing yaklau nangnitnalana: ‘Barangni manayultayang manna kidika waismanapa amangmanalatasyang.’ ”#Lc 13:25.
13Jisas yaklau minit lakwi diyulna: “Sahmuhni bang-awanauh, kat manna laih mani kidika dawak awarni kidika bik amanglatasmana bahang.
Lalah yulni malni yulni kidika
(Lk 19:11-27)
14“Papang king kawa sauni kidika laih sihm muih al as kat sau uk kau kalahkiwi lalahni kidika laih dini yamyang balna yakat maintalnin diawa kapat ki. 15Witingna kaupak as kidika yakat laih lalah dadasni 5,000 kalana dai, uk yakat laih 2,000 kalana dai dawak witni kidika yakat laih 1,000 kalana dai: witingna ais sip kidika kaput diana dai. Bahang muih al kidika laih mahka kalahwi kiuna dai. 16Wark muihni 5,000 dunadai kidika laih lalah warkni yamwi 5,000 uk yakna dai. 17Wark muihni uk lalah 2,000 duna dai kidika bik sihm lalah 2,000 uk win kalna dai. 18Kaunah lalah 1,000 duna dai kidika muihni laih duwi kiwi sau yakat kuhrwi nuna dai.
19“Ma mahni bayakwa kat wark muihni balna daninawan dai kidika laih kaina dai, dawak witingna karak yalahwi lalah kidika kulwi talna dai. 20Lalah dadasni 5,000 duna dai kidika muihni tatuna kiuna dai, dawak tanituna yakat aput kalyulwinah lalah dadasni 5,000 uk kalana dai: ‘Dakiwan man lawa lalah dadasni 5,000 yanaman dai dawak akat 5000 uk sakki win kalnayang dini kidika.’ 21Tanituna kidika yaklau kalyulna: ‘Yamni ki, man laih wark muihnni as yamni man; di dibindauh yakat yamni man dai kidika yulni, baisa di nuhni kidika tingma yakat akiki. Aiwa awa yang karak alasna awah.’ 22Usnit kat lalah dadasni 2,000 duna dai kidika muihni kiwi kana dai, dawak aput yulna: ‘Dawan, man lawa lalah 2,000 yanaman dai, dawak akat sakki lalah 2000 uk win alahwanayang dini kidika.’ 23Tanituna kidika yaklau kalyulna: ‘Yamni palni ki, man laih wark muihni as yamniman; di dibindauh yakat yamniman dai kidika yulni, baisa di nuhni kidika tingma yakat aki ki. Aiwa awa yang karak alasna alahwah.’
24“Kaunah wark muihni lalah dadasni 1,000 duna dai kidika kiwi kana mani, tanituna yakat kalyulna: ‘Dawan, yang nuyang dai man laih muih al as dadasniman dai kidika, di dahtasman pani kaupak di minik yaktaman kidika dawak di minik ratasman pani kaupak anataman kidika. 25Kidika bahang yamadunayang dai, dawak lalahma kidika laih dutik yawik sau pasyakat malpamnayang dai. Kaunah man dima kidika laih akat sakki.’ 26Tatuna kidika yaklau nangnitlana: ‘Man laih wark muihni as dutniman dawak bik baskiwahman, bahang yang di dahtasyang pani kaupak di minik yaktayang kat dawak di minik ratasyang pani kaupak di minik dulautayang kat, 27yang lalahki kidika laih bank yakat duta yawanam dai, dawak yang nawattik aiwik lalahki minit kau kilna kidika yaknik dai.’ 28Dawak kidika yakat bangdai kidika muihni balna yakat diyulna: ‘Lalah dadasni 1,000 duwa kidika dakyaktanauh, dawak lalah 10,000 duwa muihni kidika yakat kalatanauh. 29Kat angdika muihni mahni duwa kidika laih minit yakat baisa lakwi kalana karang ki, dawak minit bayak duwa karang ki; kaunah dis muihni kidika laih, ais ampus duwa kat kidika bitik dakyakna karang ki.#Mt 13:12; Mk 4:25; Lc 8:18. 30Dawak adika wark muihni di sip awas kidika laih, puksani yakat ruhmyaktanauh. Bahang kaput laih kaidinin lani dawak anani karksnin lani kidika kaiwarang ki.’#Mt 8:12; 22:13; Lc 13:28. ,#Lc 19:11-27.
Nesan balna lanina yamwarang kidika
31“Muih Walanibis al kidika yaringni dawak innisal balna karak awaihdak kaiwarang mani kat,#Mt 16:27. witing tronni yaksihni yakat yalahwarang ki.#Mt 19:28. 32Nesan muihni balna bitik laih witing muhnit yakat kalududuhwarang ki, dawak witing yaklau muih balna kidika dakwi yakwarang ki, sihm sīp maintalyang muihni kat sīp dawi kuts balna karak dakwi yakwa kapat. 33Sīp balna kidika laih tingnipal niningyakat lawarang ki dawak kuts balna kidika laih wadahni niningyakat lawarang ki. 34Dawak King laih tingnipal niningkauh bangkidika yakat diyulwaran: ‘Papangki yaklau blis manayamna kidika laih aiwanauh; Papang sau yamna mani kaupak manna saumana ridi yamna kidika dutanauh. 35Bahang yuhyang kat manna lawa di yabayahnamana dai;#Ez 18:7. dikit buhni kat manna lawa dinin dini yanamana dai; ū disyang kat manna lawa ū yanamana dai. 36Asna disyang kat manna lawa asna yanamana dai; siknisyang kat manna lawa yawa yatalnamana dai; silak yakat tusyang kat manna lawa yawa yatalnamana dai.’#Hib 13:3. 37Bahang barangni muihni balna kidika yaklau yulwi dakakana: ‘Dawan, ¿man mampat mani man yuhman kat di matining kat kasnamahn? ¿Kidik awas kat mampat mani man was dikih mawak matining kat dinamahn? 38¿Kidik awas kat mampat mani man kidika ū disman kat ū manayangnah, dawak asna disman kat asna manayangnah? 39¿Kidik awas kat mampat mani siknisman kat dawak silak yakat bik tusman kat yawik matalnayangnah?’ 40King kidika yaklau nangnitnalana karang: ‘Barangni manayultayang yang wirahki balna miniknakunni akat ais yamnamana bitik kidika, yang akat yayamnamana.’
41“Usnit kat king witing wadahni niningkauh bangkidika yakat diyulna karang: ‘Yang kaupak naikau alahwanauh, daunin yakat walnamana kidika; ban atnin kuhni muih alasni yulyang dawi innisal balna karak dinina ridi yamna kidika yakat yawanauh. 42Bahang yang yuhyang kat manna di yabayahtasmana dai; was dikih yawakat was yatanangkat ditasyang dai; 43ū disyang kat ū yatasmana dai; asna disyang kat asna yatasmana dai; siknisyang kat dawak silak yakat bik tusyang kat yawa yatalasmana dai.’ 44Bahang witingna yaklau nangnitlalana: ‘Dawan, ¿mampat mani yuh, was dikih, ū dis, asna dis, siknis, silak yakat tusman kat ilp matasyangna daih?’ 45King kidika yaklau nangnitnalana karang: ‘Barangni manayultayang adika muihni miniknakunni balna akat ilp diatas danamana kidika laih, yang yakat bik ilp yatasdanamana.’#1 Kor 8:12. 46Kidika muihni balna laih ban kaput dalani wauhnin yakat uina karang ki, dawak barangni muihni balna kidika laih ban kaput sangka atnin yakat uiwarang ki.”#Dn 12:2.
Currently Selected:
Matyu 25: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
