Luk 7
SUMU
7
Jisas yaklau Roma kaupak tunan muihnidini yamyang as kau yamni kalyamna kidika
(Mt 8:5-13)
1Jisas witing muih balna yakat yuldibauwi dana usnit kat, Capernaum yakat kiunadai. 2Kidika yakat Roma kaupak kalbauyang balna taninatuna muihni as yalahwadai dawak witing laih dini yamyang as duwadai kidika yakat uba palni dalani kaltalwadai, dawak dini yamyang kidika laih siknis kalahna kat daunin manahdai. 3Kalbauyang balna taninatuna kidika Jisas yulni yuyulwakat dakana mani kat, Ju muihni muihbararak balna buas sihna dai uiwi Jisas kalnidinit bubukwakat ūni yakat kiwi dini yamyang kidika yamni kalyamna atnin yulni. 4Witingna laih Jisas muhni yakat uiwi uba palni kalnidinit bukwi aput kalyuyulna dai:
—Adika tatuna muihni yakat ilp kalanam kidika laih yamniki, 5kat witing laih nikinasan kidika yakat dalani talwi dawak bik witing yaklau yangna Papang yulni sumaltayangna ūni kidika yamwi yayana.
6Jisas laih witingna karak kiuna, kaunah ū kidika uman ulisna kat, kalbauyang balna taninatuna kidika yaklau kaltalyang yayamni balna buas karak yul sihna Jisas yakat aput kalyulna atninna: “Dawan, man kiwinih, kat yangna laih yamni awasyang ūki yakat āwanam kidika, 7kidika bahang, yang muihki palni yawik mawaltasyang dai. Man laih ais yamnin kidika manah yultah, yang diki yamyang kidika yamni kalyamna atnin. 8Kat yang bik takituna balna kidika yaklau ais yamnin yayuyulwa kidika yamtayang, dawak yang tingki dinityakat bik soldado balna kidika dutayang. Yang lawik witingna kaupak as yakat yawah kaltiang mani kat, kiwi; dawak ūk yakat aiwah kaltingkat, kaiwi; dawak yang diki yamyang yakat yamtah kaltingkat, yamwi.”
9Jisas laih kidika yulni dakawi yamni dakana dai, dawak muih balna mahni usnit uhuiwa dai kidika yakat ditalwi aput yulna:
—Manna yakat barangni manayultayang Israel yakat bik sihm adika alni rahm kulnin lani duwa apat as bik talasyang.
10Disihna muihni balna dai kidika ū yakat nawatwi aina mani kat, kalbauyang balna taninatuna dini yamyang kidika laih uman yamni kalyamna kat tatalna dai.
Jisas yaklau tingmak yal walanibis al asdauna kaupak watwi dulauna kidika
11Kidika usnit kat, Jisas laih tawan as ayangni Naín kidika niningyakat kiunadai. Disainipil balna dawak muih mahni karak bik kalpakwi kiunadai. 12Tawan kaupak ulis kiuna mani kat, muih as dauna kat nunin duwi uiwabang kat talna dai, tingmak yal witing walanibis aslah dai kidika. Tawan muihni balna mahni witing karak kalpakwi uinadai. 13Dawan laih kidika talwi yal kidika yakat minikun kaltalwi aput kalyulna:
—Kaidinih.
14Kidika usnit kat yaihnit yakat kiwi payahnin pāni yakat sukna, dawak duwi uiwabang muihni balna kidika laih wawatna dai. Jisas yaklau muih dauna yakat aput kalyulna:
—Wahma, man yakat mayultayang: ¡Lawah!
15Bahang muih dauna dai kidika laih yaklauwi yulbauna, dawak Jisas yaklau nanangni tingni yakat āwi danadai. 16Muih balna laih kidika tatalna mani kat bitik yamaduduna dai dawak Papang yakat ayangni nuhni yamwi aput yuyulna dai:
—Prapit nuhni as yangna paskingna akat kalahna.
Aput bik yuyulwadai:
—Papang laih witing tawanni akat ilp kalana kaina.
17Dawak Judea sauni yaihnitkau balna kidika bitik dakakana dai Jisas ais yamna dai kidika.
Jan muih was utuhyang yaklaumuih balna sihna kidika
(Mt 11:2-9)
18Jan laih kidika yulni balna bitik dakana dai, witing usnit uiyang balna yaklau kalyuyulwakat. Witingna kaupak bu yakat diyulwakat uina 19dawak Jisas yakat disihwakat uina, kalyulwi dakana atnin rahm witing pa kainindai kidika kidik awaskat ūk kauh tani talninna karangpa. 20Bahang Jan yaklau muih sihna balna kidika laih Jisas yaihnit yakat uiwi, aput kalyuyulna:
—Jan muih was utuhyang yaklau yanasihwakat aiwanayangna man yakat mayultik dakanikna kainindai kidika rahm manpa kidik awaskat ūk kauh tanitalniknapa.
21Kidika minitni yakat Jisas laih muih mahni palni sikninanis kaupak dawak dalani wawauhwa kaupak, dawak spirit dutni duduwa muihni balna bik yamni diyamna dai, dawak bik muih miniknapa di tatalwas balna mahni bik miniknapa diana dai. 22Usnit kat nangnitnalana:
—Manna yawa Jan yakat kalyultanauh ais talnamana kidika dawak ais dakanamana kidika bik. Kalyultanauh muih balna miniknapa di tatalwasdai kidika tatalwi, muih balna yamni lapapakwasdai kidika yamni lapapakwi, pilau duyang muihni balna dai kidika sikninanis kaupak maisihnidis kakalna, tapanina di dakakawas balna dai kidika dakakawi,#Is 35:5-6. muih dadauna balna kidika bik watwi sangka kakalwi dawak muih miniknakunni balna yakat laih laihwi yaknin yulni kidika diyuyulwi.#Is 61:1. 23¡Dawak alasna isningnalak karangki angdika muihni balna yang yakat kulninna yamni yakukulwa kidika!
24Jan muih sihna balna kidika nawatwi uina mani kat, Jisas laih muih balna yakat diyulna dai Jan yulni kidika, aput yulwinah: “¿Manna kauhmak wanilang yakat ais talna alahwanamanadaih? ¿Dapa panan as wing yaklauwi wauhwa kidika talna? 25Kaput awas kat, ¿ais talna alahwanamanadaih? ¿Muih al as prak yamni kana sakkat talna? Manna amanglatamana angdika muihni balna asna yamni kawi alasna kidika laih king balna ūnina yakat bangki. 26Witni kat, ¿ais talna alahwanamanadaih? ¿Prapit as talna? Agha, rahm muih as baisa nuhni kidika prapit karak dawakat. 27Jan kuduh Ulna yakat witing yulni aput yulwa kidika:
‘Yang yulki trukyang man tamatyakatsihtayang,
man tama ridi yamna atnin yulni.’#Mal 3:1.
28Manna yakat manayultayang, muih balna bitik pasyakat, as bik Jan karak tanit nuhni awaski; dawak, kaput bik, Papang king kāwa sauni yakat dibindauh palni kidika laih, kidika kauh nuhni ki witing karak dawakat.
29“Muih balna bitik Jan yakat kaldakakana kidika, Roma dini tunan minit dadakwa muihni balna kat bik, witing yaklau wassina, kaput karak witingna amanglalana Papang laih la kat kidika; 30kaunah fariseo muihni balna dawak lā sumalniyang balna laih Jan yaklau wassiwi yaknin yuyulwasdai, kaput karak witingna dutni yayamna dai Papang yaklau witingna ilpnina di yamnin kulna dai kidika.#Mt 21:32; Lc 3:12.
31“¿Ais karak libitkiyah adika mani muihni balna kidika? ¿Ais kapātyah? 32Witingna laih sihm muihbinina kat muih kalududuhwa pāni yakat yakisdi kaltalyang yayamni ūk balna yakat sarahwi aput diyuyulwa kapatki: ‘Puhnin dini kidika laih puhnayangna, kaunah manna laih ubutasmana dai; makulnik bukna unbauna unbaunayangna, kaunah manna laih aidasmana dai.’ 33Kat Jan muih was utuhyang kaina kidika yulni, witing laih plawar busna kaswas dawak bik wain diwaski, dawak manna laih spirit dutni as duwi kaltimana. 34Usnit kat muih Walanibis al kidika kaina, witing laih di kaswi dawak bik diwi, dawak manna laih di kasyang dawak bik di diyang, dutni muihni balna dawak Roma dini tunan minit dakyang balna karak kaltalyang yamniki kaltimana. 35Kaunah Papang sinsni lani kidika laih di balna yamwa bitik yakat lāih kalahwi.”#7.35 Di balna yamwa bitik yakat lāih kalahwi: Y.y. walabis balna. Wirlana ūk yakat laih aput yulwi: angdika muihni balna kaput yayamwa kidika.
Jisas fariseo muihni Saiman ūni yakatkiuna kidika
36Fariseo muihni as yaklau Jisas yakat kiwi di kasnin kalyulna, dawak Jisas laih fariseo muihni ūni yakat kiunadai. Tibil yakat yalahna sakkat, 37kidika tawanni kaupak dutni yamyang yalni as witing dakana Jisas laih fariseo muihni ūni yakat di kasna kiuna kidika, dawak yal kidika laih punin dini pihni as kau kahnin dini walapni bung duwi kiunadai. 38Kaidi Jisas kalni sar yakat kiwi makwas kau wassina dai. Usnit kat basni kau uswi buhwi umna dawak kalni balna minityakat kahnin dini walapni kidika utuhna dai.#Mt 26:7; Mk 14:3; Jn 12:3. 39Fariseo muihni witing Jisas yakat kalyulwakat kiunadai kidika, kidika dini talwi, aput kulna: “Adika alni rahm prapit kat laih, muih ampat kat kallaihwa sakkidika amanglawitdai: muih yal as dutni yamyang.” 40Bahang Jisas yaklau fariseo muihni yakat kalyulna:
—Saiman, yang di as mayulnik dutayang.
Fariseo muihni kidika yaklau nangnitlana:
—Maestro, yayultah.
41Jisas laih tanityakat minitlakwi yulwi kiuna:
—Muih ahal bu witingna lalah wayaki yuyang muihni as kau lalah kalaninna duduwadai. As kidika laih lalah 500 kalanindai dawak ūk kidika laih lalah 50 kalanindai; 42dawak witingna lauwi kalaninna sip-awasdai bahang, lalah wayaki yuyang muihni kidika yaklau witingna trasnina kidika dawak disna dai. Waralaih yayultah, ¿witingna kaupak angdika kauh yakat baisa dalani kaltalwarangpah?
43Saiman yaklau nangnitlana:
—Muih al as dutni baisa dawak disna yakat.
Jisas yaklau kalyulna:
—Rahmma dutaman.
44Bahang Jisas witing yal yakat kaltalwinah, Saiman yakat kalyulna:
—¿Man yalni adika talamahn? Ūma yakat āwanayang, dawak was yatasman dai kalki suhnik; kaunah adika yalni laih witing minikwas kau kalki balna kidika suhna dawak bik basni balna kau uswi buhna. 45Man laih yaumtasman dai, kaunah yal adika laih, aiwik āwanayang kaupak kalki balna yakat umnamanah ki. 46Tunaki yakat dia kahtasman dai, kaunah yal kidika laih kahnin dini walapni kidika kalki balna minityakat utuhna. 47Kidika bahang mayultayang witing dutni balna mahni kidika dawak disna ki, kat uba palni dalani talna kidika yulni; kaunah angdika muihni yakat dutni dibin dawak diswa kidika laih, dalani lani dibindauh duwi.
48Usnit kat yal yakat kalyulna:
—Man dutma balna kidika laih dawak disna ki.
49Kidika yakat muih ūk balna diyulwakat uinadai kidika laih, biri biri aput yulwi dakakana dai:
—¿Waisyah adika, muih dutni balna kat bik dawak diswa kidika?
50Kaunah Jisas laih baisa minitlakwi yal yakat aput kalyulna:
—Rahm kulnin lani dutaman kidika yulni kallaihta alahwanaman; kulnam alasna yawah.

Biblia Sumo

Texto © Sociedad Bíblica de Nicaragua 1998

Learn More about the Papang Yulni