Luk 4
4
Jisas traini talna kidika
(Mt 4:1-11; Mk 1:12-13)
1Jisas laih Spirit Holi kalbangna palni Jordán wasni kaupak kilna, dawak Spirit yaklau kauhmak wanilang yakat duwi kiunadai. 2Kidika yakat ma 40 sakdai, dawak sitan yaklau traini talna dai. Kidika mani balna pasyakat di as bik kaswasdai, kaput bahang usnit kat yuh kallaihna dai. 3Bahang sitan yaklau kalyulna:
—Rahm palni man kidika Papang Walanibis man kat, adika kinipala akat kalyultang kat plawar busna kalwang.
4Jisas yaklau nangnitlana:
—Ulna yakat aput yulwi: ‘Muih kidika plawar busna kau manah sangka awas karang ki.’#4.4 Tingkau ulna balna as as yakat laih aput minitlalakwi: kaunah Papang yulni balna bitik karak.,#Dt 8:3.
5Usnit kat sitan yaklau ma yakat dulauwi sau akat pa balna bang kidika bitik niningkawi, 6aput kalyulna:
—Yang lawik adika parasni bitik dawak sau nunuhni balna kidika bik man yakat maki. Kat yang tingki yakat dunayang bahang, dawak yang lawik wais yakat kalanik dukih yāwarang kidika yakat kalaki ki. 7Man limbabahta yang akat manah ayangki nuhni yamma kat, adika bitik kidika man dīma karang.
8Jisas yaklau nangnitlana:
—Ulna yakat aput yulwi: ‘Man Papangma Damawan yakat manah ayangni nuhni yamtah, dawak bik witing yakat manah dini yamtah.’#Dt 6:13.
9Usnit kat sitan yaklau Jerusalén tawanni nuhni yakat duwi kiunadai, dawak makat yulnin ūni tuna yakat ilwi aput kalyulna:
—Rahm palni man kidika Papang Walanibis man kat, akaupak sau yakat buktah; 10kat Ulna yakat aput yulwi:
‘Papang yaklau witing innisal balnakidika sihwarang ki
mainmatalwi tamat kana atninna.#Sal 91:11.
11Witingna tingnina kau malaihwimadulalauwarang,
man kipala minityakat buknam awas yulni.’#Sal 91:12.
12Jisas yaklau nangnitlana:
—Ulna yakat bik aput yulwi: ‘Man Papangma Dawan yakat traini talwinih.’#Dt 6:16.
13Sitan witing Jisas yakat traini talnin dini ūk dis dawakat, witing kaupak naikau kalahwi kiunadai.
Jisas witing Galilea yakatwarkni yamna kidika
(Mt 4:12-17; Mk 1:14-15)
14Jisas laih Spirit Holi parasni kidika kalbuhng Galilea yakat nawatwi kiunadai, dawak witing yulni kidika sau balna bitik yakat yuyulwadai. 15Pa balna bitik kau Papang yulni sumamalwa ūni balna yakat kawi sumalwadai, dawak muih balna bitik laih witing ayangni nuhni yayamwadai.
Jisas Nazaret yakat kiuna kidika
(Mt 13:53-58; Mk 6:1-6)
16Jisas laih Nazaret yakat kiunadai, barakna dai kidika tawanni yakat. Yakurupdinin mani#4.16 Yakurupdinin mani: kidika laih yulwi satadi. yakat Papang yulni sumamalwa ūni yakat kanadai, witing nining yamwadai kaput, dawak kasakni yaklauwi ulna yulni balna kidika yulwi talna dai. 17Prapit Isaías ulna wauhnitaya kidika yulwi talnin kalalana dai, dawak kurahna pāni yakat aput ulna sakdai:
18“Dawan Spirit kidika laihyang mikit yakat ki,
kat witing dini yayakna bahang
muih miniknakunni balna yakatyul yamni kidika uiwi diana atnin;
silak muihni balna yakatyul yamni kidika diyulnin yasihna
dawak muih miniknapa dis kidikaminiknapa diana atnik;
tataihwa muihni balna yakatpri lani diana atnik;
19Dawan yamni talna kurihni kidikamuih balna yakat sumalna atnik.”#Is 61:1-2.
20Usnit kat Jisas yaklau wauhtaya kidika putwi Papang yulni sumamalwa ūni yakat di yamwa muihni yakat kalawi yalahna dai. Kidika yakat muih balna bangdai kidika bitik witing yakat manah kaltatalna dai. 21Witing tatuna yulbauwi aput yulna dai:
—Warmani adika wauhnitaya ulna adika kaput kalahna manna muhmana yakat.
22Muih balna bitik laih Jisas yulni yamni manah yuyulna dai dawak di yayamni balna yulwa kidika yakat dakawi yamni tatalna dai. Biri biri aput yulwi dakakana dai:
—¿Adika awasyah José walanibis kidika?
23Jisas yaklau nangnitnalana:
—Rahm palni manna lawa adika sinsni lani yayultanama: ‘Daktar, man alas kalyamtah.’ Dawak baisa kidika minityakat yayultanama: ‘Capernaum yakat yamtang kat dakanayangna kidika, man sauma akat bik yamtah.’
24Dawak tanityakat baisa aput yulwi kiunadai:
—Rahm palni manayultayang prapit as bik witing sauni yakat laih yamni kalyayamwas ki.#Jn 4:44. 25Rahm palni, Israel yakat tingmak balna mahni bangdai prapit Elías mani balna dai yakat, kurih bas minitkau papusbah was lauwas dawak sau bitik yakat yuh lakna dai mani yakat;#1 Re 17:1. 26kaunah Elías laih Israel muihni balna tingmak as yakat bik sihwasdai, kaunah Sarepta muihni tingmak as yakat sihna dai, Sidón tawanni nuhni kidika yaihnit yakat.#1 Re 17:8-16. 27Prapit Eliseo mani balna yakat bik Israel yakat pilau sikninis duyang muihni balna bik mahni bangdai, kaunah witingna kaupak as bik laih yamni kalalahwasdai, kaunah Siria kaupak Naamán kidika manah yamni kalahna dai.#2 Re 5:1-14.
28Kidika dakakana mani kat, Papang yulni sumamalwa ūni yakat muih balna bangdai kidika bitik kulninna daukakalna dai. 29Yaklauwi tawan kaupak kangwi yayakna dai Jisas yakat, dawak asang tuna tawannina yayamna pakdai kidika yakat duwi iluina dai, kidika kaupak sau yakat ruhmlakna atnin yulni. 30Kaunah Jisas laih witingna pasmunah bayakwi kiunadai.
Muih al as spirit dutni duwadai kidika
(Mk 1:21-28)
31Jisas laih Capernaum yakat kiunadai, Galilea tawanni as yakat, dawak yakurupdinin mani yakat muih balna yakat disumalwadai. 32Dawak muih balna kidika laih Jisas amput sumalwa kidika yakat yamni tatalna dai, kat witing parasni karuk yulbauwa dai kidika yulni.#Mt 7:28-29.
33Papang yulni sumamalwa ūni yakat spirit dutni duyang muihni as sakdai, kidika muihni yaklau parasni yulwi sarahna:
34—¡Yanadatah! ¿Jisas Nazaret kaupak ais yamta yangna yakat yanaustamahn? ¿Yanadaukalmukna aiwanamahn? Yang laih amangmalatayang, man laih Papang Holi man kidika.
35Jisas yaklau kidika sitan yakat bilwi aput kalyulna:
—¡Apdatah dawak kidika alni yakat datah!
Bahang sitan yaklau muih al kidika sau yakat ruhmlakna muih balna bitik muhnina yakat, dawak witing kaupak kalahna dai dutni as bik kalyamwas. 36Muih balna kidika bitik yamaduwi biri aput yuyulna:
—¿Adika ais yulni balnayah? Adika alni witing parasni bitik karuk spirit dudutni balna yakat kalahnin diyulwakat, ¡witingna laih kalalahwi!
37Dawak Jisas yulni laih kidika sauni pa balna bitik yakat yuyulwadai.
Jisas yaklau Saiman Pita unisah yalsikninis kaupak kalyamna kidika
(Mt 8:14-15; Mk 1:29-31)
38Jisas laih Papang yulni sumamalwa ūni kaupak kalahwi Saiman ūni yakat kanadai. Saiman unisah yal kidika laih yamah parasni kallaihna tusdai, dawak witing yulni Jisas kalnidinit bubukna dai. 39Jisas laih yal kidika minityakat abukwi yamah yakat bilna, dawak yamah kidika laih kaldana dai. Kidika minitni yakat, yal kidika yaklauwi dinina yamna dai.
Jisas yaklau muih mahnisikninanis kaupak yamni diyamna kidika
(Mt 8:16-17; Mk 1:32-34)
40Masan yakat, siknis satni balna duduwadai kidika Jisas yakat duwi uinadai, dawak Jisas yaklau witingna minitna yakat tingni dulauwakat sikninanis kaupak yamni diyamna dai. 41Siknis muihni balna mahni kaupak bik sitan balna kalalahna dai, aput yulwi sararahwadai:
—¡Man kuduh Papang Walanibis!
Kaunah Jisas laih sitan balna yakat dibilwadai dawak bik didawakat yulbabauwasdai, kat witingna laih amanglalawadai bahang witing laih Mesías kidika.
Jisas yaklau Papang yulni sumamalwaūni balna yakatyul yamni sumalna kidika
(Mk 1:35-39)
42Payahlawakat, Jisas laih tawan nuhni kaupak ahni nai pa as kau kiunadai. Kaunah muih balna kidika laih kalwalwi witing sakdai yakat uinadai. Laihwatnin kukulna dai kiwas atnin yulni, 43kaunah Jisas yaklau diyulna:
—Papang king kāwa sauni yulni yamni kidika bik tawan ūk balna yakat diyulnik ki, kat kidika yulni yasihwakat aiwanayang.
44Jisas laih kaput yul yamni kidika sumalwi kiwadai Judea#4.44 Luk yulwa kidika laih Palestina sauni bitik yakat yulwi aput yulwa mani kat Judea. (Talah 1:5; 6:17; 7:17; 23:5.) sauni yakat Papang yulni sumamalwa ūni balna bang bang yakat.
Currently Selected:
Luk 4: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998