Luk 2
2
Jisas batahnna kidika
(Mt 1:18-25)
1Kidika mani balna yakat, king tanit nuhni Augusto yaklau yamnin yulna sau muihni balna bitik yakat ayangnina āna atnin. 2Adika tatuna muih ayangnina ānin kidika laih Cirenio Siria kabamintni kana sakkauna yamna dai. 3Muih bitik kidika witingna tawannina kat kat uiwi ayangnina āninna dai.
4Kaput bahang, José laih Galilea sauni Nazaret tawanni kaupak kalahna dai, dawak Belén, Judea yakat kiunadai, king Devid batahnna dai kidika pāni yakat, kat José laih Devid sulani dai bahang. 5Kidika yakat Mery karak uina dai ayangnina āna atnin, kat Mery laih witing karak kaldunin pramis dai dawak Mery laih kidika yakat muih karukdai. 6Dawak witingna Belén yakat raukat, Mery laih muihbin dunin mani kiwi kanadai. 7Dawak kidika yakat walanibis al tatuna batahnna dai, dawak muihbin animat kau tulwi turuh pupuwa pāni daklana pasyakat lakna dai, kat witingna panina as bik disdai bahang kakana pāni yakat.
Insal balna dawaksīp maintalyang balna karak
8Belén yaihnit yakat sīp maintalyang balna buas bangdai, witingna laih pukta kidika di dahnin pāni yakat sīp maintalwi payahlalawadai. 9Sirihni palni Dawan innisal as witingna yakat dikalahna dai, dawak Dawan alasnina yaksihni kidika laih witingna yaihnitna yakat yaringni dahlna dai; dawak witingna laih uba palni yamaduduna dai. 10Kaunah insal kidika yaklau diyulna: “Manna yamaduduwinih, kat yul yamni as manayulna aiwayang, kidika laih muih bitik alasna yulni karang: 11Warmani Devid tawanni yakat manalaihwi yakyang muihni as batahnna, kidika laih Mesías, Dawan kidika. 12Manna sain as dutanama, muihbin kidika amat binina kau tulwi turuh pupuwa daklana pasyakat tuskat talnama.”
13Kidika minitni yakat, insal kidika yaihnit yakat kisang insal ūk balna mahni bik kalalahna dai, Papang yakat ayangni nuhni yamwi aput yuyulwadai:
14“¡Papang yakat ayangni nuhniyamna karang mayakat!
¡Kulnin aslah lani sau akatwiting yamni ditalwamuihni balna pasyakat!”#2.14 Witing yamni ditalwa muihni balna: wirlana ūk yakat laih aput yulwi: muih balna kulninna yayamni kidika.
15Insal balna kidika kisang yakat iluina mani kat, sīp maintalyang balna kidika laih biri biri yulwi dakakana:
—Bahang mawanang Belén yakat, di kalahna kat Dawan yaklau maiyulna kidika talna.
16Sirihni palni uina dawak Mery dawi José karak raukat tatalna dawak muihbin kidika bik turuh pupuwa pāni daklana pasyakat tuskat tatalna dai. 17Witingna kidika tatalna mani kat, muih balna yakat yuyulna dai insal yaklau muihbin yulni diyulna dai kidika, 18dawak muih balna dakakana bitik laih yamni dakakana dai sīp maintalyang balna yul yuyulwa kidika. 19Mery laih kidika di balna bitik kidika isning yakat ban āwi duwadai. 20Sīp maintalyang balna niningnakauh laih, di tatalna dawak dakakana dai kidika yulni Dawan yakat ayangni nuhni yamni nawatwi aina dai, bahang witingna yakat amput diyulna dai kidika bitik rahm kaput kalahna dai.
Muihbin Jisas makat yulnin ūni yakatduwi uina kidika
21Ma tiaskaubās laihna yakat muihbin kidika laih Papang sainni ahana dai,#Lv 12:3. dawak ayangni Jisas papakna dai, insal yaklau Mery muihkaruk kalahwas tanitkauh ayangni amput paknin kalyulna dai kaput.#Lc 1:31.
22Witingna maisihni dis kalahnin mani kiwi kana kat Moses lani balna yakat yulwa kaput, witingna muihbin kidika Jerusalén yakat duwi uina dai Dawan muhni yakat duwi uina atnin yulni. 23Kaput yayamna dai kat Dawan lāni yakat aput ulna bahang: “Walabis al tatuna balna bitik laih Dawan dini yakna karang.”#Ex 13:2,12. 24Bahang witingna sakripais yamna uina Dawan lāni yakat yamnin yulwa kaput: buhtuku bikikisni bu kidik awaskat buhtuku wawahma binina bu.#Lv 12:6-8.
25Kidika mani yakat muih al as Jerusalén yakat yalahwadai ayangni laih Simeón. Witing laih muih al as la kat dai, Papang yakat manah ayangni nuhni yamwadai dawak bik Israel laihwi yaknin lani kidika tahawadai. Spirit Holi kidika laih Simeón karak dai, 26dawak kalyulna dai witing laih dauwas karangki Mesías kidika talwas kat, Dawan yaklau sihwarang kidika. 27Simeón laih Spirit Holi yaklau tanit kawak makat yulnin ūni yakat kiuna; dawak muihbin Jisas papangni balna kidika bik muihbin kidika duwi uina, lā yaklau yamnin yulwa kaput, 28dawak Simeón laih muihbin kidika dulauwi duwi Papang yakat ayangni nuhni yamna, aput yulwinah:
29“Waralaih, Dawan,
man pramamis kidika yakat kalahna:
sipki man dīma yamyang kidikakaldatang kat kulnin aslah lani karakdauna atnin.
30Kat laihwi yaknin lani kidika laihuman talnayang
31tunan bahta yamnaman kidika
tawan balna bitik miniknapa yakat,
32yaringni as nisan balnaduduwarang kidika#Is 42:6; 49:6; 52:10.
dawak kidika laih man tawanma Israelrisnipik karang kidika.”
33Jisas papangni dawak nanangni kidika laih yamni dakakana dai Simeón yaklau muihbin yulni yulna kidika. 34Bahang Simeón yaklau blis diyamna, dawak Jisas nanangni Mery yakat kalyulna:
—Talah, adika muihbin laih Israel muihni balna mahni yakat diyamwakat bukna atninna dawak yaklauna atninna kalkulna ki. Witing laih sain as karang dawak muih mahni kidika witing yakat yamni kaltatalwas karangki, 35muih mahni kulninna lani kidika ahni yakat lāih kalahna atnin yulni. Kaunah adika dini balna bitik laih man namangyakat sihm isparah kau solma yakat pawi lawa kapat karangki.
36Kidika yakat bik sihm yal as sakdai ayangni laih Ana, witing laih Papang yulni yulyang as dai dawak witing laih Aser sulani kaupak Fanuel kidika walanibis yal dai. Witing laih uman muihbarak kalnadai. Witing laih sirau palni al duna dai, dawak alni karak kurih tiaskaubu yalalahna dai; 37uman kurih 84 bayakna dai witing tingmak kalna kaupak.#2.37 Uman...tingmak kalna kaupak: wirlana ūk yakat laih aput yulwi: waralaih tingmak dai, dawak kurih 84 duwadai. Witing laih makat yulnin ūni kaupak kalahwasdai, kaunah witing laih madah dawak pukta yakat Dawan dini yamwadai, yuh wauhwi dawak minit yulwi karak. 38Kidika minitni yakat Ana laih witingna muhnina yakat kiuna, dawak Papang yakat tingkih kalana dawak muihbin Jisas yulni kidika Jerusalén laihwi yakna atnin yulni tahahawa muihni balna bitik yakat diyulna.
Nazaret muihni nawatwi kaina kidika
39Dawak lāni yakat yamnin yulwa kaput yamna usnit kat, Galilea yakat nawatwi uina dai, witing sauni Nazaret yakat.#Mt 2:23. 40Muihbin kidika laih barakwadai dawak baisa parasni kalwadai dawak bik baisa sins duyang kalwadai, dawak witing laih Papang yaklau yamni kaltalwadai.
Muihbin Jisas makat yulnin ūni yakatkiuna kidika
41Jisas papangni balna kidika laih kurih bitik yakat Jerusalén yakat uiwadai insal kaiwi bayakna mani kasnin alasnina yakat.#Ex 12:1-27; Dt 16:1-8. 42Dawak kaput manah, Jisas witing kurih 12 laihna kat, witingna bitik kidika yakat uina dai, nining kaput uiwadai bahang kidika kasnin alasnina yakat. 43Kaunah kidika mani balna bayakna usnit kat, witingna ū yakat nawatwi uiwakat, muihbin Jisas kidika laih Jerusalén yakat watnadai, kaunah papangni balna laih amanglalawas dai. 44Jisas laih muih balna walsah yakat kiwi atwi kukulna, ma as ta lapapakna; kaunah usnit kat, wanaihni balna dawak kaltalyang muihni balna pasyakat walwi, 45yakwas dadanadai. Kaput bahang Jerusalén yakat nawatwi uina dai walna atnin.
46Ma bas bayakwakat usnit kat makat yulnin ūni yakat la sumalniyang balna walsah yakat yalahwi yulbauwakat dakawi dawak yul kalyulwi dakakawakat sakkat yayakna dai. 47Dawak muih balna bitik witing sinsni lani yulbauwa kidika yakat dawak biriwi yul diyulwa kidika yakat yamni tatalna dai. 48Papangni balna kaltatalna mani kat, amangnilawas dadanadai; dawak nanangni yaklau aput kalyulna:
—Yang walakibis, ¿ais yamta adika yanayamtamahn? Papangma dawi yang karak kulnikna bukna karuk mawalnayangna.
49Jisas yaklau nangnitnalana:
—¿Ais yamta yawalnamanah? ¿Manna amanglatasmanah yang Papangki ūni yakat sak-atnik kidika?#2.49 Yang Papangki ūni yakat sak-atnik kidika: wirlana ūk yakat laih aput yulwi: Papangki warkni balna kidika yang yamnik ki.
50Kaunah witingna laih yul diyulwa kidika amanglalawasdai.
51Bahang witing watwi witingna karak kalpakwi Nazaret yakat kiunadai, kidika yakat witing papangni balna yulnina dakawi yalahna dai. Nanangni laih adika di balna bitik kidika isning yakat āwi duwadai. 52Dawak Jisas laih muihni nuhni kidika dawak sinsni lani bik barakwadai, dawak Papang muhni yakat dawak muih balna muhnina yakat bik yamni kaltatalwadai.#1 Sam 2:26; Pro 3:4.
Currently Selected:
Luk 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998