Parallel
15
Sīp maintalyang muihni as sīpniwalwi yakna kidika malni yulni
(Mt 18:10-14)
1Roma dini tunan minit dadakwa muihni balna dai kidika bitik dawak muih ūk ūk ayangnina sau yakat muihni balna kidika kauna Jisas yaihnit yakat uinadai sumalwa kidika dakana atnin. 2Kidika yulni fariseo muihni balna dawak lā sumalniyang balna yaklau niningkauh aput yuyulwadai:
—Adika muihni laih dutni yamyang muihni balna yakat diparaswi dawak bik witingna karak kalpakwi di kaswi.#Lc 5:29-30.
3Bahang Jisas yaklau adika malni yulni adika diyulna dai: 4“¿Manna kaupak angdika muihni kidika sīp 100 duwa kat dawak as diswakat ūk balna 99 kidika di dahnin pāni yakat dabangwas dawi ūk disna kidika walwi kiwih, angkat yakwarangkat? 5Dawak yakwa mani kat, alasna manah salahni yakat ilwi,#Is 40:11; Ez 34:11-12; Jn 10:1-16; Hib 13:20. 6dawak ūni yakat kiwi witing karak kaltalyang yayamni balna kidika dawak ūni yaihnit muihni balna kidika kauna uduhwi aput diyulwi: ‘Yang karak alasna alahwanauh, kat uman yaknayang sīpki disna dai kidika.’ 7Manayultayang dutni muihni as kulnin wirlawa mani kat kisang yakat bik sihm baisa alasna ki, muih yayamni 99 balna kidika karak dawakat.
Muih yal as lalahni dadasni disna katyakna kidika malni yulni
8“Kidik awasbik, ¿angdika yalni witing lalah dadasni salap duwa kat as diswakat awas as dahlwi ūni kidika talna bitwi walwasyah angkat yakwarangkat? 9Dawak yakwa mani kat, witing karak kaltalyang yayamni balna kidika dawak ūni yaihnit muihni balna kidika kauna uduhwi aput diyulwi: ‘Yang karak alasna alahwanauh, kat uman yaknayang lalah dadasni as disna dai kidika.’ 10Manayultayang dutni muihni as kulnin wirlawa mani kat insal balna pasyakat sihm kapat baisa bik alasna ki.”
Muih al as walanibis al as disna katwatwi yakna kidika malni yulni
11Jisas yaklau aput bik yulna dai: “Muih al as walabis ahal bu duwadai, 12dawak wahmabin kidika yaklau papangni yakat aput kalyulna dai: ‘Papang, dipahni yang diki ampus kidika yatah.’ Bahang papangni laih dini yayamni balna kidika witingna pasyakat sahyakna dai. 13Ma balna buas bayakna usnit kat walanibis binkauh kidika laih dini balna bitik bakanmukwi, kidika lalahni kau duwi sau ūk kau kiunadai, kidika yakat lalahni balna bitik dismukna dai sangnika kidika dutni yakat manah kiwi. 14Kaunah lalahni balna kidika bitik dismukna mani kat, kidika sauni yakat di kasnin dini kidika dis palni kalnadai, dawak witing laih yuhdauna dai. 15Kidika sauni kaupak muih al as yakat kiwi wark yulna dai, dawak muih al kidika yaklau di dahnin pāni yakat sihna dai kusih balna maintalna atnin. 16Dawak witing laih kusih balna kasninna dini kidika kaskih kalana dai, kaunah muih as bik kalawasdai. 17Witni kat aput yul kulwi talna: ‘¡Yang papangki ūni yakat wark muihni balna kidika di kasnin dini ampus minitbayak duduwih, dawak yang laih akat yuh dautayang! 18Wattik papangki ūni yakat nawattik yawik aput kalyulnayang karang: Yang papangki, Papang niningyakat dawak man namangyakat bik dutni yamnayang; 19man walamabis yatnam sip awaski; sihm man warkma muihni balna kidika kapat as yakultah.’ 20Kaput laih ta yakat kalahwi papangni ūni yakat nawatwi kiunadai.
“Baisa naikau kiwalik kat, papangni talwi minikun kaltalna dai. Niningyakat kiri kiwi wakaihwi umna dai. 21Walanibis kidika yaklau kalyulna: ‘Yang papangki, Papang niningyakat dawak man namangyakat dutni yamnayang; man walamabis yatnam sip awaski.’ 22Kaunah papangni yaklau dini yamyang balna yakat yamnin diyulna: ‘Sirihni palni asna yamni kidika yakta ātanauh; tingni bikis yakat ting ānin as ātanauh dawak sus bik as ātanauh. 23Turuh almuk wahma baisa salani kidika duaita itanauh. ¡Kidika karak kasnin alasnina as yamdarangki! 24Kat walakibis adika laih dauna dai kaunah watwi sangka kalna; disna dai kaunah watdi yaknamayang.’ Kasnin alasnina kidika laih sarpapakna dai.
25“Walanibis al barakni kidika laih di dahnin pāni yakat likdai. Nawatwi kiwi ū ulis dana mani kat, paswi yakisdinin dini kidika dawak ubuna kidika bik dakana dai. 26Bahang di yamyang balna kidika kaupak as yulwakat kiwak kalyulwi dakana dai ū yakat ais kalahwapa. 27Di yamyang kidika yaklau kalyulna: ‘Wirahma al laih nawatwi kaina; dawak papangma laih turuh almuk wahma salani kidika īna, kat wirahma laih muihni yamni dawak sangka kat kalpakna kidika yulni.’ 28Kaunah wirahni al barakni kidika laih uba palni kulnin daukalwi ū yakat kanin yulwasdai, dawak papangni yaklau kalahwi kalnidinit bukna dai ū yakat kana atnin. 29Papangni yakat aput kalyulna: ‘Man amanglataman kurih yapak man dima yamnayang kidika, wat as bik yulma latas, dawak man lawa wat as bik kuts bin as bik yatasman dai ītik yang karak kaltalyang yayamni balna kidika karak kasnikna. 30Wirlawakat, walamabis al adika laih man lalahma duwi yayal ahal suhlsuhl balna karak kalpakwi dismukna, dawak kaiwakat witing dini turuh almuk wahma salani kidika ītaman.’
31“Papangni yaklau nangnitlana: ‘Yang walakibis, man laih nining yang karak man, dawak ais dutayang balna bitik kidika laih man dima. 32Kaunah adika laih kasnin alasnina as karak yamwi alasna kalahnin dai, kat man wirahma al dauna dai kidika laih, watwi sangka kalna; disna dai dawak watdi yaknamayang.’ ”