Parallel
10
Jisas yaklau muih 72 balna yakatsihna kidika
1Kidika usnit kat, Dawan yaklau baisa muih 72#10.1 Tingkau ulna balna as as yakat laih aput yuyulwi: 70. walwi yakna dai, dawak witing tanityakat bu bu yakwi sihna dai, tawan balna bitik yakat dawak angkat angkat kiwarang pāni balna yakat bik.
2Aput diyulna: “Di minik balna kidika laih rahm mahni ki, kaunah wark muihni balna kidika laih bulah ki. Kidika bahang, yamak Dawan yakat kalyultanangkat wark muihni balna sihwakat di minik balna kidika dulalauwang.#Mt 9:37-38. 3Manna yawanauh; talnauh sihm sīp kurih as duduwa balna kapat manasihtayang nawah pauni balna pasyakat.#Mt 10:16. 4Bik, lalah dawak sus bik duwi uiwinih; dawak ta bamak yakat watta muih as bik pararaswinih.#Mt 10:7-14; Mk 6:8-11; Lc 9:3-5. 5Ū as kau āwanama mani kat, tatuna kidika aput yulta parastanauh: ‘Kulnin aslah lani adika ūni akat.’ 6Dawak kidika ūni yakat kulnin aslah lani muihni bangkarang kat, man kulnin aslah lani dukih mawa kidika kaput karang; kaunah kaput awas laih kultaman kaput kalahwas karang. 7Kidika ūni yakat wattanauh, dawak kastanauh dawak bik ditanauh witingna ais duduwa kidika, kat wark muihni kidika laih witing rahmni duwi minit duna atnin.#1 Kor 9:14; 1 Tim 5:18. Ū ūk ūk kau uiwinih. 8Tawan as kau yawanangkat manaparaswi ais mananawarang kidika kastanama; 9kidika pāni yakat siknis muihni balna bang karang kidika yamni diyamtanama, dawak aput diyultanauh: ‘Papang king kāwa lani kidika laih manna yakat ulis ki.’ 10Kaunah tawan as kau yawanangkat manapararaswas karang kat, ta balna yakat alahwa aput yultanama: 11‘¡Manna tawanmana sauni yahamni kalkina yakat kilna kidika, manna namangnakauh yultayangna kapat ustik yaknayangna!#Ap.w 13:51. Kaunah manna adika amanglatanauh, Papang king kāwa sauni kidika laih manna yakat uliski.’ 12Manayultayang kidika mani yakat kidika tawanni yakat wah kaiwarang kidika laih dutni palni karangki Sodoma muihni balna kidika karak dawakat.#Gn 19:24-28; Mt 10:15; 11:24.
Tawan balna yul dakakawas kidika
(Mt 11:20-24)
13“¡Corazín man laih dutni palni awamaki! ¡Betsaida man laih dutni palni awamaki! Kat manna pasyakat di taldas dini balna yamna kidika Tiro yakat dawak Sidón#Is 23:1-18; Ez 26:1—28:26; Jl 3:4-8; Am 1:9-10; Zac 9:2-4. yakat yamna kat laih, uman Papang yakat wirlawa asna utuhni āwa dawak wan yakat yalahta niningkanamana karang. 14Kaunah la yamwarang kidika mani manna yakat wah kaiwarang kidika laih dutni palni karangki Tiro dawak Sidón muihni balna kidika kawak dawakat. 15Dawak man, Capernaum tawanni, ¿kisang kat ilwama kultamahn? ¡Wakarhni tuhni nuhni yakat maruhmna karangki!#Is 14:13-15.
16“Angdika muihni manna yakat manadakawa kidika laih, yang yakat bik yadakawi;#Mt 10:40; Mk 9:37; Lc 9:48; Jn 13:20. dawak angdika muihni manna yakat yamni manatalwas kidika laih, yang yakat bik yamni yatalwas ki; dawak angdika muihni yang yakat yamni yatalwas kidika laih, yasihna muihni yakat bik yamni kaltalwaski.”
Muih 72 balna nawatwi aina kidika
17Muih 72 balna kidika laih uba palni alasna nawatwi aina dai, aput yulwinah:
—¡Dawan, spirit dudutni balna kat bik yulkina dakakawi man ayangma usnit yakat!
18Jisas yaklau diyulna:
—Agha, kat yang talnayang sitan kidika kisang kaupak sihm alwana lapwi yaringni bukwa kapat bukwakat. 19Yang lawik parasmana mananayang bil balna dawak wakurus balna minitna yakat lapaknamna,#Sal 91:13. dawak bik manna namangnakauh yaklalauwa balna yakat minitna bayaknamna, dalani as bik wauhtas. 20Kaunah spirit dudutni balna yaklau manna yulmana dakanin yulni laih alasna kalalahwinih, kaunah alasna alahwanauh manna ayangmana laih kisang yakat uman ulna kidika yulni.
Jisas alasna kalahna kidika
(Mt 11:25-27; 13:16-17)
21Kidika minitni yakat Spirit Holi yaklau Jisas yakat alasna kalyamna mani kat, aput yulna: “Papangki, kisang dawak sau Daniwan, ayangma nuhni yamtayang, kat sins duyang balna dawak di amanglalawa balna yakat niningnakatasman dai dini balna kat muih miniknakunni balna yakat niningnakanaman kidika yulni. Agha, Papang, kat kaput dukih mawadai kidika yulni.
22“Yang Papang ki yaklau di balna bitik yang tingki yakat āwi dana.#Jn 3:35. Muih as bik amanglawaski waispa Walanibis kidika, kaunah Papangni kidika manah amanglawi; dawak muih as bik amanglawaski waispa Papangni kidika, kaunah Walanibis kidika manah amanglawi dawak walanibis yaklau angdika muihni balna yakat niningnakanin dukih kalawa kidika balna yakat manah niningnakawi.”#Jn 10:15.
23Disainipil balna yakat wiryaklawi aput diyulna: “Alasna isningnalak karang manna talamana kidika yakat tatalwarang muihni balna kidika laih; 24kat prapit balna dawak king balna mahni palni talkih diana dai adika dini manna talamana kidika, kaunah witingna tatalwasdai; dakakih diana dai manna dakamana dini kidika, kaunah dakakawasdai.”
Samaria kaupak al as yamnidaikidika yulni malni yulni
25Lā sumalniyang as yaklau Jisas#Mt 22:35-40; Mk 12:28-34. yakat kiwi yulbauna dai, dawak traini talnin yulni aput kalyulwi dakana:
—Sumalyang, ¿ais yamkiyah sangka ban kaput atnin lani kidika duna atnik?
26Jisas yaklau nangnitlana:
—¿Lā yakat amput ulnayah? ¿Ais palni yulta talamahn?
27Lā sumalniyang kidika yaklau nangnitlana:
—Man Papangma Dawan yakat dalani talah ismang bitik karak, solma bitik karak, parasma balna bitik karak dawak sinsma bitik karak bik;#Dt 6:5. dawak man wanaihma yakat dalani talah sihm man muihma kapat.#Lv 19:18.
28Jisas yaklau kalyulna:
—Yamni yulnaman. Man kidika yamtaman kat, sangka ban kaput atnin lani kidika duma.#Lv 18:5.
29Kaunah lā sumalniyang kidika laih, yulwi dakana yakat barangni lāih yakkuhti, Jisas yakat aput kalyulna:
—¿Dawak yang wanaihki kidika waisyah?
30Bahang Jisas yaklau nangnitlana:
—Muih al as Jerusalén kaupak Jericó kiwa tani yakat kiwalikdai, dawak di dakyang muihni balna buas kalahwi dini dakyayakna dai dawak prakni balna kat bik dakyayakna dai; dalani kalawi ipamnin manah dawi uinadai. 31Kidika tani munah sumalyang as bayakna dai; kaunah kaltalna mani kat, pirini naikau awaihwi bayakwi kiunadai. 32Libait muihni as bik sihm kidika pāni yakat kiwi kana, dawak kaltalna mani kat, pirini naikau awaihwi bayakwi kiunadai. 33Kaunah Samaria kaupak muih al as sihm kidika tani munah kiwalikdai kidika, kaltalna mani kat, dalani kaltalna dai. 34Yaihnit yakat kiwi kaldakna balna kidika dia dawak wain wasni karak utuhwi dawi lakwi sitnin asnina kau sitwi kalana dai. Usnit kat witing aniras yakat ilwi ū as kau duwi kiwi maintalna dai. 35Kidika payahwakat, samaria muihni kidika yaklau lalah dadasni bu yakwi ū dawan yakat kalana dai, dawak aput kalyulna: ‘Adika alni akat maintalah, dawak man lawa baisa minityakat lalah disma kat, nawattik aiwik lautik manayang karang.’ 36Bahang yamni, ¿kidika muih balna bās kidika kaupak angdika kauh muih dudutni balna yaklau dini dakyayakna muihni kidika wanaihni kapātyah?
37Lā sumalniyang kidika yaklau nangnitlana:
—Witing yakat minikun kaltalna kidika.
Jisas yaklau kalyulna:
—Bahang talah dawak man bik yawa kaput yamtah.
Jisas laih Marta dawak Meryūnina yakat kiuna kidika
38Jisas laih tanityakat kiuna dawak tawan bin as kau kiwi kanadai, muih yal as ayangni Marta witing ūni yakat duna dai. 39Marta laih wirahni yal as duwadai ayangni laih Mery,#Jn 11:1. witing laih Jisas kalni yakat yalahna dai ais balna yulwa kidika dakana atnin. 40Kaunah Marta witing wark balna mahni yamnin duwadai kidika pasyakat, Jisas yaihnit yakat kaiwi aput kalyulna:
—Dawan, ¿man kulta kalbautasmahn yang wirahki yal yaklau yang alas yadawa kidika wark balna yamna atnin? Kalyultangkat tingkisut laihwang.
41Kaunah Jisas yaklau nangnitlana:
—Marta, Marta, man laih kulta kalbautaman di mahni yulni, 42kaunah di aslah kidika laih dunin aitani ki. Mery laih dunin dini yamni kidika duna dawak witing tingni kaupak muih as bik sip kaldak'yakwas karangki.