Joel 1
1
Di dadahna kidika sisin yaklauwi daukakalwi
1Adika yulni kuduh Papang yaklauwi sihna dai kidika Petuel walanibis Joel yakat.
2Manna adika yulni yamni dakanauh muih bararak balna,
manna bitik kau, adika sauni muihni balna.
¿Manna di as kapat as kalahwak talas manah?
¿Manna muihmana bararak balna manina dai yakat,
di kapat as kalahwak talasmana daih?
3Walamanabis balna yakat yultanang dakakawang,
dawak witingna walaninabis balna yakat diyuyulwarang,
dawak kidika kaupak ūk batatahnwarang yakat.
4Sisin#Dt 28:38; Jl 2:2-11; Am 4:9; 7:1. balna yaklauwi bitik kasmumukna
dawak as as kaswas dadawak bayakna dai kidika,
witni ūk aina yakat bitik kakasna.#1.4 Tanka laih yulna sisin balna amput di daukakalna dai kidika, hibru kau laih ayangni sat arungka yulwi, kauna tanka laih mani balna pis arungka yakat warkni balna yamna yakat yulwa kapat ki.
5¡Manna, wasak muihni balna sahmuhtanauh!
¡Aidanauh, wain diyang balna,
kat wain minik wasni kidika bik manadakyakwarang ki!
6Sisin kidika kalbauyang muihni balna mahni dawak pararasni kapat ki,
dawak ananina kidika layan anani,
dawak ananina nuhni kidika laih layan yal anan kapat ki,#Rib 9:8.
bahang yang sauki akat aiwi kakana.
7Mayang mawainki yamak balna bik daukalna,
dawak ani damni panan balna unitak kidika bitik tuturna,
dawak tingni rahni balna kidika turwi pihni yayamna.
8Yal sirau, witing alni dunin dai kidika dauna kat
kaidi asnina sani manh kawa kapat,
9kaput kakaidi sumalyang balna
kat makatyulnin ūni yakat kasnin dini, dawak wain bik dis ki
minitdis dini Papang yakat kalanin kidika.
10Sau di dahnin pāni balna kidika bitik laih di diski,
sau kidika dalani wauhnin laih bahngna ki.
Plawar minik balna bik disna ki,
wain yanimak balna bitik kusulana,
dawak olib basni balna bik kusulalana.
11Manna asangpas yakat,
dawak wain yamak yakat wark alahwamana kidika kulnamna bukwak aidanauh,
kat di dahnamana kidika bitik dislawarang,
plawar minik balna bik.
12Wain yanimak balna kusulalana,
ani damni panan balna bik dislalana.
Kuku panan, mansana panan,
dawak pan minik yakwa ūk balna bik kusulalana.
¡Kaput laih muih balna alasnina dai kidika disna!#Os 4:3; Am 4:6-9.
13Manna sumalyang balna,
walapni buswa pāni yakat tatuna nuhni,
asna utuhni āwa, dawak aidanauh dalawa kidika yulni,
kat Papangmana ūni yakat
di minik diski, dawak wain bik, minitdis kalanin dini.
14Muih balna yakat uduhta diyultanauh dikaswas atnin,
dawak muih bararak balna kidika bitik,
makat yulnin uni yakat duyawanauh,
Papang uni yakat, muih bitik kaluduhnin,
dawak Papang yakat ilp yulnin.
15¡Alakaih, Papang mani kaiwi uliswi!
¡Ma yamadangni, bahwi disyamnin duaiwa kidika
Parasni nuhni bitik duwa kidika kaupak!#Is 13:6; Ez 30:2-3; Sof 1:14-18.
16Mayang laih mamikpa taldabangmayang kat makasnik dakyayakwi,
dawak Papang uni yakat alasnina dai kidika dahnkalna.
17Di minik dai kidika dauna, dahna pāni yakat,
plawar minik dai kidika disna,
dawak di minik punin uni balna dai kidika bitik daukakalna.
18¡Turuh balna kidika ampat mamahwi!
Dauh kalmakunwi sihrsihr wawalwi turuh balna kidika,
sīp balna bik daulalawi.
19¡Man yakat yultayang Papang,
kuh yaklauwi walang kau dibasta balna dai kidika busna,
dawak asangpas kau pan balna dai kidika bik busna!
20¡Asangpas kau tinglau balna palni bik yuyulwi man yakat
was buhlakna kidika,
dawak dibasta, sihrsihr balna bitik laih busyamwi kuhpau yaklauwi!#Am 7:4-5.
Currently Selected:
Joel 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998