Job 3
3
Job, witing dutni kalahna kidika yulni yulna
1-2Ap dai kaupak, mahka Job yulbauwadai, batahndana mani kidika dutni kulwadai.#Jr 20:14-18.
Job
3¡Dutni palniki kidika puknita muih kalnayang dai kidika!
¡Dutni ki batanh danayang mani kidika!
4¡Yamni dai, kidika mani puksani lakna dai kat,
dawak kaput laih Papang yaklauwi kalawak bayakwi kiwitdai,
dawak kidika puknita ban kaput payahlawas atnindai!
5¡Yamnikitdai puksani tubakni as kalawak puklakna dai kat laih,
kidika awasbik mukus sani as duailakna katlaih,
kidika awasbik waiku dikaswa kaput bik kalwak yamadunin parasni as bitik kau yamaduduwitdai!
6¡Yamnikitdai kidika pukta, puksani nuhni yakat disna katlaih,
kidika mani laih kulnin awasdai,
waiku balna pasyakat dawak kurih balna pasyakat bik!
7¡Yamni dai, kidika puknita minik yakwasdai katlaih,
dis atnindai alasna duwi sarahnin kidika!
8¡Yamni kitdai, di talyang balna dutni yuyulna dai katlaih,
kuma paskau di anyang#3.8 Kuma paskau di anyang: barangni yulnin kat Leviatán: kuma pasyakat di anyang, bahang kidika laih simh yapu kapat ki. (Talah 41:1-34 yakat.),#Job 41:1; Sal 74:14; 104:26; Is 27:1. minitna yakat parasni nuhni duduwa kidika!
9¡Yamni kitdai mapiris balna kidika yaringni duduwasdai katlaih,
kidika yaringni tani tahawa kidika bik kiwaskitdai,
mapiris masar kalann bik tatalwaskitdai!
10¡Dutni palni ki kidika puknita batahn danayang kidika,
di dis minikunni atnin kidika yang mikpa kaupak malwasdai!
11¿Amput dawak nanangki bānipas yakat dautasyang dai,
kidika awaskat batanh datayang minitni yakat?
12¿Amput dawak kalki balna dunayang dai,
dawak ta bik sunayang dai?
13Yang daunayang dai katlaih
waradika yamni amatus awaki,
kulnik aslah awaki,
14king balna dawak tunan nunuhni balna
ū#3.14 Ū: kaput ulna kidika yamni kapat ki. Hibru kau laih yulwi daukalwi bahwi uhna. yayamwa balna karak,
15kidika awaskat kabamint balna
witingna ūnina yakat gol dawak lalah manah puwi babahngwa balna kidika karak.
16¿Amput dawak sau yakat yanunuwasdai,
muih binina nanangnina bāni pasyakat dauwi dawak batanh dadawak nunuwa kapat?
17Muih dudutni balna kidika laih sau ū yakat uiwi witni kat,
dawak disuhna balna kidika laih sau ū yakat wingninata pupuhwi;
18silak muihni balna laih kidika yakat kulninna lani aslah duduwi,
dawak taninatuna disarahwa kidika baisa dakakawaski;
19kidika yakat laih nunuhni balna, dawak dibinina balna kidika sihm aslah kapapatki,
dawak warau muih dini yamyang kidika kaupak dakwi kalahna.
20¿Amput dawak Papang yaklauwi dawak muih dutni wauhwa kidika ma yaringni talwi?
¿Ais yamwi sangnika kalawi baisa, tapalhni wauhwa muihni yakat,
21daunin walwa muihni kidika yakat sip daunin kiwas kidika,#Rib 9:6.
gol disna kat walwa kapat tanit walwarang bik?
22Kidika alni yakat alasnina kidika kiwi kawi,
sau ū yakat kiwa mani kat.
23Papang yaklauwi yamwak minikpa dis lapakwi,
dawak tani balna bitik putna ki.
24Kaidinin kidika laih yang kasnik,
dawak yang dīnik kidika laih dalani wauhtayang kidika ki.
25Di bitik pasyakat yang yamadutayang dai kidika,
dawak baisa tanit yamadutayang dai kidika,
yang mikityakat bukna.
26Yang wingkita puhnik disyang,
isinglak bik awaski,
kulnik aslah lani bik yaktasyang,
kauna kulnik abahlni manahki.
Currently Selected:
Job 3: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
