Jueces 6
6
Papang yaklau Gedeón yakat kiunin kalyulwi
1Kaunah Israel muihni balna di yayamna kidika laih Dawan minikpa yakat dutni manah dai, dawak kurih tiaskaubu pasyakat Dawan yaklau madianita balna tingnina dinityakat ana dai. 2Madianita balna yaklau Israel muihni balna yakat baisa ditataihwa dai kidika yulni, Israel muihni balna laih madianita balna yakat yamaninaduwi asang, pasulihni dawak uiwi dikuihnin sip awas pāni balna yakat bik yakmaldinin pāni yayamna dai. 3Israel muihni balna kidika di as dahna duduwa karang kat, madianita, amalecitas dawak ma kilwa niningkauh muihni balna kidika yaklau niningna yakat kalbabauna dai. 4Israel muihni balna saunina yakat watwi ūnina labanni yamwi di minik dadahna balna kidika daukakalwa dai Gaza sauni kat, Israel muihni balna kasninna laih di as kat bik dadawas dai, sīp, turuh ahalmuk wark kalahyang balna dawak biriku ahalmuk balna kat bik dadawas dai. 5Saunina kidika ūnina labanni dawak tuninaruh balna kauna bangkat kawi bitik daukakalwa dai. Muih mahni kidika kianinamil balna karuk duwi aiwa dai, sihm sisin dudutni di daukalyang balna kapat. 6Madianita balna dutni yayamwakat, Israel muihni balna kidika ma mahni miniknakunni bayayakna dai, dawak witni kat Dawan yakat ilp yuyulna dai.
7Israel muihni balna witingna madianita balna tingnina kaupak dilaihwi yakna atnin yulni Dawan yakat kalyuyulna mani kat, 8witing yaklau Prapit as sihwakat diyulna dai: “Aput yulwi Dawan dawak Israel Papangni yaklau: ‘Yang lawik manna kidika Egipto sauni yakat muih dinina yamta yalahtamana dai kidika kaupak manayaknayang, 9Egipto muihni balna tingnina kaupak manah laih manalaihtik yaktasyang, kaunah manna yakat manataihwi duduwa muihni balna bitik tingnina kaupak bik manalaihtik yaknayang. Witingna laih manna tamatna kaupak yakmuknayang dai, dawak witingna saunina kidika laih manna yakat mananayang dai. 10Dawak yang lawik manna yakat manayulnayang dai yang laih manna Papangmana Dawan yang, dawak amorreo balna saunina yakat yalahtamana kidika witingna daninawan dauh balna yakat yamaninadunam awas ki manatnayang dai; kaunah manna laih yang yulki dakas danamana dai.’ ”
11Bahang Dawan innisal kidika kaiwi Ofra yakat kirah panani as sakdai kidika dinit yakat yalahna dai, kidika laih Abiezer sulani Joás dini dai. Joás walanibis Gedeón#Hib 11:32. laih, yakmaldi wain minik taihnin pāni yakat plawar minik klin yamwasak dai, madianita balna talninna awas yulni.
12Dawan innisal kidika witing yakat kalahwi kalyulna dai:
—¡Muih al parasni dawak kulnin dadasni, Dawan laih man karak ki!
13Dawak Gedeón yaklau nangnitlana:
—Dutki datang diswang dakiwan, kaunah Dawan kidika mayang karak kat, ¿ais yulni adika dini balna maikalahwih? ¿Angkat bangyah taldas dini balna yulni maiyuyulwa kidika mayang mamuihkibararak balna yaklau, Dawan yaklau Egipto kaupak maiyakna atwa kidika? Dawan laih mairuhmwi dawi madianita balna tingnina dinit yakat maiāna.
14Dawan laih kaltalwi, aput kalyulna:
—Man parasma dutaman kidika kau duta yawa Israel muihni balna kidika laihta yaktah, madianita balna tingnina dinit kaupak. Yang lawik masihtayang.
15Kaunah Gedeón laih watwi nangnitlana dai:
—Yang dakiwan baisa wat as mayultayang, dutki datangkat diswang, kaunah ¿amput yang Israel yakat laihtik yakkiyah? Yang sulaki kidika laih baisa minikunni ki Manasés sulani balna kidika bitik pasyakat, dawak yang laih walakibis balna pasyakat baisa dibindauh yang.
16Dawak Dawan yaklau nangnitlana:
—Yamnam sip karang kat yang laih man karak awaki ki. Madianita balna yakat dikalbauta minitna bayaknaman karang sihm muih al aslah kat kalbauta minit bayaktaman kapat.
17Bahang Gedeón yaklau yulna:
—Yang adika man muhma yakat yamni yatalaman kat, sain as yatah rahm palni man yah yang karak yulbauta sakman adika. 18Plisma palni, man adika pāni kaupak kiwinih yang minit dis kalanin dini as duaitik mana atnik kidika dukih yawi.
Dawak Dawan kalyulna yamni ki kalatna:
—Akat tahata sak-awaki man nawatta aiwama kat.
19Gedeón laih kiwi kuts bin as iwi lahna dai, dawak plawar batal 20 karak plawar pupuhnin dini dis awi busna dai; usnit kat di muihni kidika di punin dini as puwi dawak di wasni kidika laih suba as kau bitik utuhwi duwi kiuna dai kirah panan sak kat. 20Papang innisal kidika yaklau kalyulna dai di muihni kidika dawak plawar pupuhnin dini dis busna balna kidika kipala as minitkau dukiwi ilna atnin, dawak di wasni kidika laih minityakat utuhna atnin. Gedeón yakat yamnin kalyulna kidika kaput yamna usnit kat, 21insal tingni yakat tulnah duwa sakdai kidika sutni kau di muihni dawak plawar busna balna yakat sukna, dawak kipala kidika kaupak kuh dahlwi kalahna dai, kidika karak di muihni dawak plawar busna balna kidika busyayamna dai; usnit kat Dawan innisal kidika witing minikpa kaupak disna dai. 22Gedeón witing amanglawakat Dawan innisal kat, aput yulna dai:
—¡Alakaih Dawan, Dawan! ¡Dawan innisal kidika karak biri biri muhkina kaltalnayangna!
23Kaunah Dawan yaklau nangnitlana:
—Yamaduwinih, kat dautas awama ki. Yang kulnik aslah lani kidika dutah.
24Bahang Gedeón witing kidika pāni yakat sakripais busnin pāni as yamna dai Dawan risnipik yakat, dawak ayangni pakna dai “Dawan laih kulnin aslah lani kidika ki”. Kidika sakripais busnin pāni kidika waradika kat bik ban pakki Abiezer sulani tawanni nuhni Ofra yakat.
25Sihm kidika puknita Dawan yaklau Gedeón yakat kalyulna:
—Papangma tuniruh balna kaupak turuh almuk as dutah, turuh almuk ūk kidika laih kurih tiaskaubu duwa kidika duma, dawak papangma witing dawan dauh Baal yakat sakripais buswi kalanin pāni duwa kidika sau yakat tuklakpamtah. Dawan dauh Baal yakat sakripais buswi kalanin pāni yaihnitkau pan as Papang dini yakna sak kidika bik dakta lakpamma, 26dawak kidika dadasni minityakat Papangma Dawan yakat sakripais buswi kalanin pāni as yamta kalatah. Usnit kat turuh almuk bu kidika duta sakripais karauni kauna busta yatah, kidika balna busma kat pan holi balna dini kau laknaman kidika kau bita busma.
27Bahang Gedeón witing dini yamyang balna kidika kaupak muih salap duwi di bitik yamna dai Dawan yaklau yamnin kalyulna dai kidika; witing madah yakat yamwas dai, kaunah pukta yakat yamna dai, witing papangni walanibis balna dawak tawan nuhni ahalni balna kidika yakat yamaninaduwi. 28Kidika payahwakat, tawan nuhni muihni balna kidika yaklalauna mani kat, dawan dauh Baal yakat sakripais busnin pāni kidika dawak yaihnit yakat pan as Papang dini yakna sakdai kidika bik sau yakat tuklalakna kat tatalna dai, dawak baisa kidika minityakat sakripais busnin pāni wisam kidika minityakat turuh almuk bik as sakripais karauni kauna bubusna kat tatalna dai. 29Biri biri kalyulwi dakakana dai: “¿Wais yamnapah adika dini?”
Ma mahni walwi dawak yulwi dakakana kat, witingna amanglalana dai Joás walanibis Gedeón yamna dai kidika, dawak Joás yakat uiwi kalyuyulna dai:
30—Walamabis kidika yaktah itanaki ki. ¡Dawan dauh Baal yakat sakripais yamnin pāni kidika dawak yaihnit yakat pan as Baal dini yakna sakdai kidika bik sau yakat tuklakna!
31Kaunah Joás witing yaihnit yakat muih bangdai kidika yakat nangnitnalana dai:
—¿Manna dawan dauh Baal kidika tanit dakta witing tunan minit kalbautanamayah? ¡Bahang angdika muihni dawan dauh Baal kidika yakat tanit dakwarang kat baisa payahlawas kau dauwarangki! Dawan dauh Baal kidika Papang kat, datanangkat witing alas tanit dakwang, kat sakripais busnin pāni bukkiuna kidika laih witing dini dai bahang.
32Bahang kidika mani kaupak Gedeón yakat Jerobaal#6.32 Hibru kau laih, Jerobaal dawak yul balna tannika kidika laih Baal witing tanitdakwang yulni yulwa kidika sihm kapapat parah yulwi. papakna dai, dawak aput yuyulwa dai: “Dawan dauh Baal laih witing alas tanit dakwang”, kat Baal yakat sakripais buswi kalanin pāni kidika laih Gedeón yaklau sau yakat tuklakna bahang.
33Bahang madianita, amalecitas dawak ma kilwa niningkauh yalalahwa muihni balna bitik kalpakwi Jordán wasni kidika dakyaklalawi Jezreel sauni langni yakat watwi ūnina labanni papakna dai. 34Kaunah Dawan spiritni kidika laih Gedeón sangnika yakat kana dai, dawak Gedeón laih sīp almuk tamni as duwi puhna dai Abiezer sulani balna kidika kaluduhna atninna yulni; 35baisa kidika minit yakat yul duwi uiyang muihni balna sihna dai Manasés sulani balna bitik yakat uiwi diyuyulwakat kalududuhna atninna yulni. Aser, Zabulón dawak Neftalí sulanina balna yakat bik yul duwi uiyang muihni balna sihna dai, uiwi diyuyulwakat witingna bik kalahwi witing karak kalpakna atninna.
36Dawak Gedeón yaklau Papang yakat kalyulna: “Rahm palni yayaktang kat Israel kidika laihtik yakki laih, man lawa yulnaman kaput, 37sīp unitak butuni dahni duwa kidika lakki ki plawar minik sakwi unitak yakwa kidika pāni yakat. Mapiris niningkauh yakat di butuni kidika yalawas suihna karang kat, kaunah sau kidika laih buhni karang laih, yang amanglaki ki rahm palni yayaktang kat Israel yakat laihtik yakki kidika, man lawa yulnaman kaput.”
38Bahang rahm kaput kalahna dai. Gedeón witing mapiris yaklauwi di unitak butuni dahni kidika wirna kat yalawas manah sutak as yakna dai. 39Kaput bik Gedeón yaklau yulna: “Yang yakat kulnam daukalwinih wattik mayulki bik. Kaunah baisa di aslah yamtik talna atnik kidika dukih yawi. Waradika laih di butuni kidika buhni dawak sau kidika laih suihni yamnaman karang.”
40Kidika puknita yakat Papang yaklau kaput yamna dai. Dawak payahwak mapiris kat di butuni kidika buhni dai dawak sau kidika laih yalawas manah suihni dai.
Currently Selected:
Jueces 6: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
