Jueces 21
21
Benjamín sulani wisamni kalahna kidika
1Israel muihni balna witingna Mizpa yakat pramis yayamna dai walaninabis yayal balna kidika dadawakat Benjamín sulani balna kidika karak kalduninna awas. 2Kaunah usnit kat Betel yakat kaluduhwi Papang muhni yakat kaida bangdai dawak bik dutni dakakawa kidika yuyulna dai puklakwak kat: 3“¡Dawan, Israel Papangni! ¿Ais yulni adika dini yanakalahnayah? ¿Amput dawakat waradika sulani as diskarangyah Israel yakat?”
4Kidika payahwakat Israel muihni balna kidika ma baisa yaklauwi, sakripais busnin pāni yamwi Dawan yakat sakripais karauni kauna dawak watwi wanaihni karak yamni kalahnin yulni sakripais buswi kalalana dai. 5Dawak biri biri yulwi dakakawa dai: “¿Mayang bitik mayang adika paskaupak wais kidika kaluduhnin yakat kiwas daih Mizpa yakat?”, bahang pramis yayamna dai wais kiwas karang kat īna atnin.
6Israel muihni balna laih uba palni kulninna bukna dai witingna wanaihnina Benjamín muihni balna yakat kidika dini dikalahna dai kidika yulni, dawak aput yuyulwadai: “Adika mani Israel sulani balna kaupak as dakyakna ki. 7¿Amput yamdi Benjamín muihni balna sangka wawatna kidika yakat yayal waldi diadarangyah? Mayang laih Dawan yakat pramis yamnamayang mawalakibis yayal balna kidika witingna karak kalduninna awas. 8¿Akat Israel muihni as sakyah baisa Mizpa yakat kiwi Dawan muhni yakat kalahwas?”
Bahang witingna isningna kakatna dai Galaad sauni Jabes kaupak muih as bik kaluduhnin yakat kiwas dai kidika, 9bahang muih ayangnina yulwi bayakwakat adika pāni kaupak laih muih as bik nangnitlawas dai. 10-11Bahang tawan muihni balna kidika kaupak kalbauyang muihni balna yayamni kidika manah 12,000 yakwi sihna dai Jabes muihni balna bitik yakat isparah baini kau īna atninna, kidika pasyakat muihbinina dawak muih yayal uman ahal karak kalpapakna balna kidika bik. 12Jabes yakat muih yalalahwa balna kidika pasyakat muih yayal sirarau baisa ahal karak kalpapakwas balna kidika manah 400 yayakna dai, dawak Canaán sauni Silo kau ū labanni witdai kidika yakat duahaina dai. 13Bahang tawan muihni balna bitik yakat walnin disihna dai Benjamín muihni balna Rimón kinipala kau bangdai yakat, dawak diyuyulwakat uina dai kulnin aslah lani kidika duna atnin yulni. 14Bahang Benjamín sulani balna kidika nawatwi aiwakat Israel muihni balna Jabes kaupak yayal duahaina dai kidika diayana dai. Kaunah muih yayal kidika mahni palni awas dai witingna bitik duna atninna.
15Israel muihni balna laih dalani dakakana dai Benjamín sulani balna kidika yulnina, kat Dawan yaklau Israel sulani balna kidika paskaupak yakna dai kidika yulni. 16Dawak tawan tanituna balna kidika laih biri biri yulwi dakakawa dai: “¿Amput yayal waldi yakdarangyah ūk balna kidika dinina, kat Benjamín sulani yayal balna kidika laih laihwi pa ūk kau duwi uina kidika? 17Benjamín laih mayang masulaki balna pasyakat pa duwa kidika yakat sak atninki, witing sulani sangka wawatna balna kidika karak, kaput laih Israel sulani balna kidika kaupak as bik dis atnin awas. 18Kaunah yangna sip awasyangna walakinabis yayal balna kidika diatiningkat witingna karak kalduninna, kat yangna Israel muihni balna bitik pramis yamnayangna walakinabis yayal balna kidika Benjamín sulani balna yakat dianikna awas, la yanatuhnin awas yulni. 19Kaput bik, kurih balna bitik yakat Silo#1 Sam 1:3,21. yakat kasnin alasnina nuhni as sak ki Dawan dini, Betel kaupak tingpal niningkauh, Betel kaupak Siquem yakat kiunin tani kidika kaupak ma kilwa niningkauh dawak Lebona kaupak wadah niningkauh pakkidika yakat.”
20Bahang Israel muihni balna yaklau adika yulni sisihna dai Benjamín sulani balna yakat: “Silo yaihnitkau wain yamak balna yakat yawa maldanauh, 21dawak bik ismangnapuk bang awanauh. Silo yayalni balna kidika dakni, dakni kalahwi ubuwi yakikisdarang kat, man bik maldanamana kidika kaupak alahwa muihmana kat kat yayal as as malta saumana yakat yawanama. 22Dawak papangnina balna kidika kidik awaskat wirahnina ahal balna kidika aiwi yanayuyulwarang kat diyultanaki ki: ‘Yangna laih manna kalmana dinit yakat buktik yultayangna, sihm yangna ilpkina kapat as, dutnina kidika datanangkat diswang, kat yangna sip witingna bitik yakat yayal yaktik diatas danayangna Jabes niningyakat kalbauna yangna kidika kaupak. Baisa kidika minityakat manna lawa diatas danamana bahang, manna laih pramis yamnamana kidika yakat dutni as bik yamtasmana.’ ”
23Benjamín sulani balna laih yamnin diyuyulwa yakat dakakana dai, kaput laih muihnina kat kat yayal ubuwa bangdai kidika kaupak as as malwi duwi uina dai. Usnit kat saunina yakat nawatwi uiwi tawannina nuhni kidika laihwi dulauwi yamwi kidika yakat yalalahna dai.
24Israel muihni ūk balna kidika bik witingna saunina dawak sulanina kat kat nawatwi uina dai.
25Kidika mani yakat Israel kidika baisa king dis dai, bahang witingna ais yamnin dukih diawa kidika kat yayamwadai.#Jue 17:6.
Currently Selected:
Jueces 21: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998