Jueces 19
19
Libait dawi ialni karak
1Israel balna king duduwas tanitkau, libait as naikau yalahwadai, bahang Judá sauni Betlehem pāni kaupak yal as duna dai. 2Kaunah yal kidika kulnin daukalna al kidika karak#19.2 Kulnin daukalna al kidika karak: grik kau ulna kidika laih kaput yulwi. Hibru kau laih yal kidika yaklau ahal suhl suhl kalna. dawak Betlehem yakat kiwi yalahna, papangni balna karak. Yal kidika pāni yakat waiku arungka sakkat, 3libait kidika walwi kiuna, kulnin laihwi witing karak nawatwi kiunin. Dini yamnin as, dawak biriku bu du'kiuna, dawak yal kidika papangni ūni yakat pa kalana dai libait yakat. 4Yal papangni bik kulnin alasna karuk pa kalana dawakat kalyulna watna atnin. Libait dawi dini yamyang karak yal papangni uni yakat ma bās wawatna dai, kaswi diwi kaminin manah, 5ma arungka laihwak yaklalauna mapiris kat, mahka uina atnin. Kaunah witingna mahka uiwak, yal papangni yaklauwi unisah al yakat kalyulna:
—Baisa yawasman kau di apis kasdata yawah, parasma duna atnam yulni.
6Dawak witingna albu yalahwi kakasna dawak didina, kaput laih yal kidika papangni yaklauwi kalyulna watna atnin, dawak baisa pukta as alasna bayaknin. 7Dawak libait laih yaklauwi mahka yawakuh atna kaunah unisah yaklauwi watwat kalyulwak watna.
8Ma singka laihwak, libait yaklauna mahka kiuna atnin, kaunah watwi sirau papangni yaklauwi kalyulna di kasdawi kiunin, kaput laih parasni dunin; kaput laih kalpakwi di kakasna, dawak mani ulahna dai. 9Libait yaklauwi ialni dawi, dini yamyang karak mahka mawang atwak, unisah yaklauwi kalyulna ma pukna, bahang watta pukta as payahta, dawak payahwak lawa kulnam alasna karuk yawah. 10Kaunah libait kidika watwi payahnin yulwasdai, bahang ialni dawak dini yamyang,#19.10 Dawak dini yamyang: grik kau ulna kidika laih kaput yulwi. Hibru kau laih adika yulni diski. biriniku bu kidika dangni ilwi mahka kiuna. 11Dini yamyang yaklauwi libait yakat kalyulna:
—¿Amput talaman jebuseo tawannina nuhni akat watdi payahnin?
12Dawak Libait biri nangnitlana:
—Tawan nuhni ūk yakat mawas karang Israel balna awaskat. Guibea kat uskit uitah, 13payahdang Guibea awaskat Ramá yakat.
14Kaput laih ban lapapakna ma kakiwasīk kat Guibea kat uina dai Benjamín sulani balna tawannina. 15Kaput laih Guibea pāni yakat kawi payayahna, libait muih as bik pa kalawas bahang muih kalududuhwa pāni yakat kiwi yalahna.
16Ma puklakna yakat, muih barak as yamak kaupak wark kalahwa likkauna nawatwi kaina. Muihni barak kidika Efraín asangnipas kaupak dai, bahang kidika yakat pa ūk muihni kapat likdai, kat Guibea yakat yalalahwa balna kidika laih Benjamín sulani balna manah dai. 17Muih barak kidika libait yakat talwi kalyulwi dakana:
—¿Angkaupak aiwamahn dawak angkat yawanauh?
18Dawak libait biriwi nangnitlana:
—Akūt aiwik bayaktayang. Judá sauni kau Betlehem kaupak aiwayangna, dawakat Efraín asangnipas tanit naikau yakat yawayangna, yalahtayang pāni yakat. Kat yak Betlehem yakat sakyang dai, dawak waralaih ūki kau,#19.18 Ūki kau: grik kau ulna kidika laih kaput yulwi. Hibru kau laih Dawan ūni. nawattik yawayang, kaunah akat muih as bik kalpaktasyang pa yāwak payahnik. 19Yang birikiku balna kasninna sihrsihr dutayang dawak plawar busna wain dutayangna yangna kasnikna, yuldarang kat, yalki, diki yamnin, yangna kasnikna di bitik duta yangna.
20Kaunah muih barak dai biri nangnitlana:
—Yamni aiwanaman akat. Yang lawik ais dukih mawa kidika bitik maki. Madating kat muih kaluduhnin pāni akat payahtas awama.
21Al muih barak dai yaklauwi uni kau dukiwi diawak kalnina susuhna di kaswi ahawak, al muihbarak dai kidika biriku balna yakat di bayahna dai. 22Witingna isningnalak bangkat, muih ahal dudutni buas aiwi dūr yakat bauwi ū dawan yakat kalyuyulna:
—¡Unipas kau muih al as matalna kaina kidika yakta! ¡Witing karak alangwanakih yanawi!
23Kaunah ū dawan dai kidika kalnin dinit yakat bukna:
—¡Dikah plismana! ¡Di dutni kaput palni yayamwinih, adika ahal laih yang ūkipas akat kaiwi kana sakki! 24Talnauh, akat walakibis sirau, baisa al kalpakwas as sakki. Dawakat al adika ialni bik sakki. Bahang yaktik mana tingkat ais yamnin kultamana kidika yamtanama. Kaunah adika alni akat laih di as bik kalyayamwinih.
25Kaunah witingna muih barak yulni dakawas dadana, dawak kat, libait yalni yakat laihwi ahni yakat tukwi yakpamna dai dawakat kidika ahalni balna laihwi dutni kalyayamna pukta bitik payahlawakat, dapapamwak kiuna. 26Mahka payahlawi kaiwak ya dai kidika muih barak ūni yakat kiuna, witing alni sakdai yakat, dawak dūr yakat dauwi bukna. 27Alni dai kidika mapiris yaklauwi mahka yawakuhti dūr apahwak ialni dai kidika dūr kiu'kawa yakat tingni laih dawi bukna tusdai. 28Dawakat kalyulna:
—Lawang mawang.
Kaunah nangnitlawas dai. Kaput laih muih dauna kidika biriniku minit yakat ilwi duwi kiuna ūni kau. 29Kiwi dawi muih dauna muihni dai kidika kuhbil as duwi sahrna dawak dakni salap minitkau bu yakna, kaput laih Israel sauni bitik kau sihna dai. 30Muih tatalna kidika bitik yuyulna:
—Israel balna Egipto kaupak kalalahna dai kidika, di kapat as bik taldasdai. Adika dini kulwi talninna ki, dawakat ais as yamna atnin kidika.
Currently Selected:
Jueces 19: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998