YouVersion Logo
Search Icon

Jueces 16

16
Sansón Gaza yakat
1Ma as kat Sansón Gaza tawanni nuhni yakat kiuna. Yakat pini yalni as talna, dawakat uni pasyakat kana dai albu payahna atnin yal yakarak. 2Gaza muihni balna, Sansón yakat kiuna kidik dakakana kat, kalahwi awaihdadakna, dawak tawan ta kawa balna yakat tahawi tatalna dai mapiris kaupak masan kat.#16.2 Mapiris kaupak masan kat: kaput kapat ulna ki. Hibru kau laih pukta bitik yakat. Pukta laih uiwi yakururupdana dai, witingna kukulna kidika payahlawarah kat inin. 3Kaunah Sansón kalangna dai pukpapus kat manah. Kidika yakat yaklauwi tawan dūrni putwa kidika bahyakwi dukiuna panan nunuhni dungna balna bitik trukwi Hebrón muhnit yakat asang as sakki, tuna yakau uiwi ilwi dana dai.
Sansón dawi Dalila karak
4Kidika usnit kat Sansón yal as yamni talna di ayangni laih Dalila bahang yal kidika Sorec yakat yalahwa dai. 5Filisteo tunan muihni balna Dalila yakat uiwi talwi aput kalyuyulna:
—Sansón yakat alas kalyulta walta talah witing parasni nuhni duwa kidika angkaupak duwi dawakat amput minit bayaknin sip awanaki yah; kaput laih sip laihtik sittik dutanaki. Man kaput yamma kat yangna bitik kau muihkina kat kat manaki lalah tausin as minit kau andat as.
6Yal dai kidika Sansón yakat kalyulna:
—Plisma yayulta, parasma nuhni kidika angkaupak dutamahn. ¿Amput masitdak sip uluhtas awamanayah?
7Sansón yaklauwi nangnitlana:
—Las wahni tiaskaubu baisa buhlalawas kidika kau yasittanama kat, paraski diswarang dawakat muih al ūk kaput awaki.
8Filisteo tanituna muihni balna Dalila yakat uiwi kalalana las wahni tiaskaubu wisasam manah, dawakat yakau duwi Sansón yakat sitna. 9Baisa sitwas tanitkau payahwa pāni yakat ahal buas awi malna bahang, sarahna:
—¡Sansón, filisteo balna namangyakat aiwi!
Sansón kiri yaklauwi sitna kidika iswi dakna, wah kuh kau buswi wanan manah yamna kapat. Filisteo balna walwi yakwas dadana parasni kidika angkaupak kaiwa kidika. 10Dalila yaklauwi kalyulna:
—¡Alas yayultada! ¡Alas yayulnaman dai! Kaunah waralaih plisma yayulta, amput yamwi man sitnin yah.
11Sansón nangnitlana:
—Wah wisasam palni kau yasittanama kat paraski diswarang, dawakat al ūk kaput awaki.
12Dalila wah wisam kau duwi sitwi dawi sarahna:
—¡Sansón, filisteo balna namangkauh aiwi!
Sihm payahwa pāni yakat ahal buas awi malna dai; Sansón watwi iswi dakna dai wah dibinina kapat. 13Dalila yaklauwi Sansón yakat kalyulna:
—¡Baisa alas yayultaman! ¡Yayulta amput yamtik masitki yah!
Sansón yaklauwi nangnitlana:
—Man yamnam kidika laih baski labuna tiaskaubu kidika, asna yamnin dini kau duta asna kapat yamdata, pan subangni kau duta libitta sau yakat tista āma. Kaput laih paraski diski, dawakat muih al ūk kapat awaki.
Kaput laih Dalila yaklauwi Sansón yakat pakwak kamana, dawakat basni labuna tiaskaubu kidika libitwi asna yamwa dini yakau sitna,#16.13 Kaput laih paraski diski...asna yamwa dini yakau sitna: grik kau ulna kidika laih kaput yulwi. Adika S.d. 13 ulna witni kau kidika laih hibru wauhnitaya ulna yakat kalahwas ki. 14dawi pan subangni kau duwi sau yakat dungwi āna usnit kat sarahna:
—¡Sansón, filisteo balna namangyakat aiwi!
Sansón kiri yaklauwi sau kau pan ukna balna dai kidika iswi dutyakna. 15Yal dai kidika kalyulna:
—¡Alas muihni! ¿Amput man yang akat dalani matalayang yatimahn? Wat bās yangkau sarahni yatalaman, dawakat baisa yayultasman angkaupak parasma kaiwapa.
16Dalila yaklauwi wat wat kalyulna, sihm kidika dini manah kalyulwi dakana, Sansón kidika dakana manah kalsuhna dai dawakat bik daukihni kallaihna dai; 17witni kat parasni angkaupak duwa kidika kalyulna dai:
—Baisa muih as bik baski dadakwas ki baisa batahn datasyang kau Papang dini yayakna. Baski dadakwarang kat, paraski diswarang ki dawakat muih ahal ūk kapat awaki.
18Dalila yamni amanglana mani kat Sansón parasni angkaupak duwa kidika, filisteo tunan muihni balna yakat yul sihwi diyulna:
—¡Waralaih aiwanauh Sansón parasni angkaupak duwa kidika nikingkana!
Bahang tingnina yakat lalah karuk uiwi kaltatalna dai.
19Sansón Dalila barahnimak yakat tunan awi kamana dai, dawakat muih al as yulwak laihna, Sansón basni labuna tiaskaubu kidika daknin. Usnit kat dutni kalyamwi 20dawi sarahna:
—¡Sansón, filisteo balna namangkauh aiwi!
Sansón sahmuhwi kulna witing nining yaklawa bahang ban watwi yaklauwarang kulna, witing amanglawasdai Dawan yaklauwi kaldana kidika. 21Kaput dawak filisteo balna laihwi minikpa yakmumukna dai dawi Gaza yakat duwi uiwi sīn kau yamni sitwi dawi silak ūni paskau tiknin dini nuhni sakyakat papakwak wark kalahna. 22Kaput kaunah basni kidika watwi nanaina dai.
Sansón dauna
23Filisteo tunan muihni balna kaluduhwi alasna dunin, minit bayayakna kidika yulni, dawak sakripais yamnin daninawan dauh Dagón yakat. Dawak aput unbabauna:
“Mayang mapapangki yaklauwi,
mawaihkila Sansón kidika matingki akat āna.”
24Muih balna tatalna kat, witingna bik, daninawan kau ayangni nuhni yayamna, dawi aput yuyulna:
“Mayang mapapangki yaklauwi mating akat āna
mawaihkila Sansón kidika,
witing kuduh mayakimak daukalwa dai kidika
dawak mawanaihki balna mahni bik iwadai kidika.”
25Isningnalak bangdai bitik ki, yuyulna Sansón kidika duwi uiwak kalyakisdi niningkarinin. Silak uni kaupak yakwi niningkari alasnina duduna, dawakat duwi uiwi dulalauna rahni nunuhni bu walsah yakat. 26Sansón yaklauwi kalyulna albin as witing tingni yakat laihwi murwi kiwalik kidika yakat:
—Yaduyawah rahni nuhni palni ūni adika laihwi duwa sak yakat, kidika yakat taihtik dakakih yawi.
27Filisteo balna taninatuna bitik kidika ūni yakat bangdai, bahang kaput laih buhngdai, ahal dawak yayal bik. Kidika minit yakat, muih tausin bās kapat bangdai uptis yakat, talwa bangdai amput Sansón yakat uswi alasna duduwa kidika. 28Sansón Dawan yakat kalyulwi aput yulna: “Kalma dinit yakat buktik yultayang, Dawan, baisa wat as bik yang akat yakulta, paraski yatah filisteo balna mikpa bupak yayakna kidika yulni, witingna yakat minit diyulkih yawi.” 29Usnit kat walwi laihna rahni nunuhni balna prinias ūni nuhni laihwi duwasak kidika dawakat tingni bupak yamni laihwi, 30sarahna: “¡Filisteo balna yang karak dautanaki!”
Kaput laih parasni bitik rahni laihna sakdai kidika tukna, dawakat prinias uni kidik bahwi filisteo balna tanina tuna muihni balna minitna yakat bukna, muih bahng kidika bitik minitna yakat. Sansón witing dauna yakat muih ina kidika laih tanit mahni dai, sangnika bitik yakat muih ina kidika karak dawakat.
31Sansón wirahni balna aiwi duwi uiwi ahana Zora dawi Estaol pāni walsah kau yakat Manoa sauni-ū yakat, Manoa laih Sansón papangni dai. Kurih muihasluih Israel balna taninatuna kana dai.

Currently Selected:

Jueces 16: SUMU

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy