Jims 4
4
Sau lani karak isning aslah dunin lani kidika
1¿War balna kidika angkaupak kaiwih dawak manna pasyakat kalbaunin kalahwa kidika? Kidika laih di dutni dukih manawa kidika kaupak kaiwi. 2Di as dukih manawi, kaunah sip dutasmana; itamana, tumtamana, dawak sip yaktasmana bahang, mahka kalbautamana war yamtamana. Dukih manawa kidika sip yaktasmana kat Papang yakat yultasmana bahang; 3dawak yultamana bik dutasmana, kat dutni yultamana bahang, kat manna duta muihmana nuhni dukih kalawa yakat yusyamnin kultamana bahang. 4¡Muih barangni awas balna!#Is 1:21; Jr 3:6-10; Os 2:2. ¿Amanglatasmanah sau karak yamni atnin kidika laih Papang karak waihla kalahnin kidika?#Mt 6:24; Lc 16:13. Wais sau karak yamni atnin kulwakidika laih Papang waihnila kalwi. 5Ulna yakat di as yulwi: “Dawan yaklauwi spirit mayang mamuihki yakat āna kidika minit parasni anwi.”#4.5 Dawan yaklauwi spirit...parasni anwi: satuk wirlanin sipki: Spirit as, witing yaklauwi yamwak mayang akat maikana kidika laih mayang karak yalahwi. Grik kau laih amangladaski.,#Ex 20:5; Dt 4:24; Zac 8:2. 6Kaunah Papang laih minikun talnin kidika karak ilp mayawi, Ulna yakat yulwi: “Papang laih niningnakauh ki witingna manah kapat kaldakakawa muihni balna yakat, kaunah minikun diyamwi limahni balna yakat laih.”#Pro 3:34; 1 Pi 5:5. 7Papang dinit yakat awanauh. Dawak diablo niningkauh lawanauh kaput laih manna kaupak kirarang. 8Papang yaihnit yak yawanauh, witing yaihmatna yak kiwarang. ¡Tingma klin yamtanauh, dutni yamyang balna! ¡Ismangna maisihni dis yamtanauh, manna Papang yakat dalani talnin kultamana dawak sau yakat bik dalani talnin kultamana kidika! 9¡Kulnamna bukwang aidanauh! ¡Ara mana kidika data mamaknawas yaktanauh, dawak alasna kidika kulnamna bukna yakat wirlatanauh! 10Papang muhni yakat sau kat buktanauh, dawak witing manadulauwarang.#Mt 23:12; 1 Pi 5:6.
Wirahma lani yamwinih
11Wirah balna, manna biri biri dutni kalyuyulwinih. Wirahni niningyakat dutni kalyulwa kidika laih lani yamwasakki, dawak lā niningkauh dutni yulwa kidika laih lani yamwi. Dawak lā kidika yulni yulta yamma kat wihta alahwaman yulwa yakat daka yamnam dai kaunah. 12Aslah ki lā duaina kidika dawak witing bik Wihta bahang witing malaihwi yaknin sipki dawak dutni yakat masihnin bik sipki; kaunah man laih ¿waismahn yaihmatkau muihni kidika lani yamnin?
Lāih yamni awas kidika yahan mani
13Waralaih adika dakanauh manna yultamana kidika: “Warmani kidika awaskat yahan mani pa as kidik awaskat tawan nuhni as kau mawarang ki, dawak kidika yakat kurih as bayakdarang ki lalah warkni yamdi dawak lalah dudinah”, 14¡manna amanglatasmana, sangmanaka kidika ampat karangpa yahan mani!#Pro 27:1. Manna laih mukus pihni as kapat mana, minit as kaiwi kaunah tihn dawak diski. 15Manna yulnamna kidika laih: “Dawan dukih karang kat, sangka mawarang, dawak kidika balna yamdarang.” 16Kaunah, manna laih manna manah kapat yultamana; kidika witing manah kapat kaldakanin kidika laih dutni ki. 17Di yamni lan bik yamwas kidika, dutni yamwi.
Currently Selected:
Jims 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
