Isaías 63
63
Papang yaklauwi wah diawi waihnila balna yakat
1—¿Waisyah Edom tawanni nuhni#Is 34:5-17; Jr 49:7-22; Ez 25:12-14; 35:1-15; Am 1:11-12; Abd 1-14; Mal 1:2-5. Bosra kaupak kaiwa kidika,
prakni pauni yaksinh kat kahwi dawi
dawak witing parasni kidika yamadangni karak?
—Yang kuduh, minit bayaknin yulni isningpaknayang dai kidika
dawak yang laih paraski nuhni dutayang laihtik yakna atnik.
2—¿Amput dawakat prakma kidika pauni kahnayah,
taldas laih kalma kau wain atakna kapat man kidika?
3—Agha, yang alas wain ataknayang,#Lm 1:15; Jl 3:13; Rib 14:20; 19:15.
muih as bik tingkisut laihwas dai;
kulnik daukalna karak nikingkauh yaklalauwa balna yakat ataknayang,
kulnik daukalna karak taihtik labannayang,
dawakat ānina kidika prakki yakat raswi laihna
kaput laih prakki bitik laihna.#Rib 19:13.
4Yang yamnik kulnayang dai, ma askat la barangni kidika yamna atnin;
mani balna kaiwi kāna dai yang tawanki kidika laihtik yakna atnik.
5Talnayang, muih as bik disdai tingkisut laihna atnin;
bahang muih as bik tingkisut laihwas kidika di taldas dini as kapat talnayang dai.
Yang tingki kidika yaklauwi minit bayaknin kidika yāna,
dawak kulnik daukalna kidika yaklauwi yalaihwi duna dai.#Is 59:16.
6Kulnik daukalna karak waihkila balna kidika ataktik labannayang,
kulnik daukalna kau īnayang,
dawak yamtingkat ānina kidika sau yakat kirana.
Papang kulnin dalani Israel nining yakat
7Yang yulbaukih yawi Dawan dalani lani duwa kidika yulni,
dawak ayangni nuhni yamtik unbauna atnik,
di bitik yamna kidika mayang mayulki,
dalani lani nuhni duna kidika Israel sulani balna niningna yakat,
witing dalani lani nuhni duwa kidika kau yamna kidika.
8Witing yulna:
“Witing kuduh yang tawanki balna,
walanibis balna as sip yang niking yakat malni kau dutni yāyayamwas karang kidika.”
Bahang witing yaklauwi laihwi yakna
9kulninna bukna bitik kau.
Witing muih as sihwak laihwi yakwas ki;
Dawan witing palni yamna.#Dt 32:11-12.
Witing dalani lani duwa kidika kau laihwi yakna,
dulauwi tingni yakat duna.
Witing nining kaput yamwi.
10Kaunah witingna Dawan niningkauh yaklalauna,
dawak witing maisihnidis kidika yakat dutni kalyuyulna;
kidika bahang witingna karak waihla kalahna dawak war diyamna.#Dt 32:15-25.
11Witingna ma bayakna balna yakat isningnakatna,
Moisés witing tawanni kau laihwi yakna dai yakat,
dawak yulwi dakakawa dai:
“¿Angkat sakyah Papang,
witing Nilo wasni kaupak laihwi yakna dai kidika Moisés yakat,
sīpni maintalyang muihni dai kidika?
¿Angkat sakyah kidika muihni Moisés yakat piritni yamni kalawadai kidika
12kalawakat parasni nuhni yamni kidika Moisés karak dai kidika,
dawak witing tawanni muhni yakat#Ex 14:21.
kuma kidika kalawak sahwi kalahwadai kidika,
kaput yamwi ayangni nuhni ban kaput atnin duwa dai kidika,
13diyamwakat kuma tuhni pas munah bayayakwa dai kidika kahrwak bukwas,
sihm kauhmak wanilang kau aras uiwa kapat,
14sihm turuh balna kidika walang yakat yaklalakwa kapat?”
Dawan spiritni yaklauwi taninatuna kawi kiwadai.#Sal 77:20.
Kaput tawanni kidika tanituna kawi kiuna,
ayangni nuhni kalna dawak alasnina bik.
Papang kau minit yulwi ilp yulna
15Talah, Dawan makau kisang kaupak,
maisihnidis alasna manah panikau sakman yakaupak.
¿Angkat sakyah dalani lani parasni dutaman kidika dawak parasma kidika bik?
¿Angkat sakyah di balna ismang aitah dakaman kidika?
¿Minikun talnin lani dutaman kidika yangna nikingna yakat dahn kalnayah?
16¡Man kuduh mayang Mapapangki man!
Abraham kaput maikulwas karang
dawak Israel kidika kulnin yakat isningkatwas karang bik yangna adika,
man kuduh mayang Madakiwan man;
tanit kaupak nining mailaihta yaktaman.
17¿Dawan aisyamta kaput maiyamtang kat tama yakaupak naikau malahwi,
dawak maising dadasni yamdi, man yakat makuldas atnin kidika?
Satuk yamta, man dimayamyang balna yakat dalani talaman kidika yulni,
dawak man tawanma kidika man dima bahang.
18¡Ma parahni man tawanma maisihnidis kidika daukalna dai!
Mawaihkila balna kidika man uma yakat kalnina kau atatakna.
19Akat bangmayang man matakituna awasman kapat,
dawak bik man ayangma kidika wat as bik dudas dai kapat.
Biblia Sumo
Texto © Sociedad Bíblica de Nicaragua 1998