Isaías 51
51
Walaniānin yulni balna Jerusalén yakat
1“Dakanauh manna bitik, barangni lani yakat yalahnin kulta
yawaltamana kidika —Dawan yaklau aput yulwi—.
Talnauh angdika kinidara kaupak manadakwi yakna kidika,
angdika kinipala pahrna kaupak manayakna kidika;
2talnauh papangmana Abraham yakat
dawak Sara yakat bik, witingna yaklauwi sangmanaka manana kidika.
Yang manayulnayang mani kidika laih aslah dai,
kaunah yang lawik blisin kalanayang, dawak sulani manas palni bik.#Gn 12:1-3.
3Yang Sayan yakat kulnik dalani talki,
tawan nuhni as daukalna dai kidika sau buhni kauhmak wanilang kidika wirlana awaki dipulu yanimak yamni as,
sihm Edén kau Dawan yamna dai kapat.
Kidika yakat isninglak lani dawak alasna bik sakkarang,
unbaunin bik sakkarang paswi yakisdinin dini karak.#Gn 2:8; Ez 36:35.
4“Tawan muihni balna yadakanauh,
dawak sau pīsni ūk balna mana kidika bik yadakanauh:
yang sumaltayang kidika muih bitik yakat lāih yakki,
dawak yang laki balna kidika tawan balna yakat yaringni duna karang.
5Yang minit bayaknik kidika ulis dana,
laihtik yaknik warkni yamtayang kidika bik ta yakat uman kaiwi;
yang paraski kau tawan balna minitna yakat kabamint awaki.
Kuma kau muih balna kidika bik yang akat taki-ahawarang
dawak yang paraski yakat rahm kukulwarang.
6“Mamaknapa kidika makau kisang yakat dulauta talnauh,
dawak sau yakat talnauh:
makau kisang kidika diswarang wayau kapat,
sau kidika witna karang sihm asna as kapat
dawak sau muihni balna kidika dadauna karang sihm sasah kapat.
Kaunah yang laihtik yaktayang kidika laih niningh ban kaput karang,
yang minit bayaktayang kidika laih sarandis karang.#Sal 102:25-28; Mt 24:35.
7“Yadakanauh, manna la kat tanka amanglatamana kidika,
tawan as yang sumaltayang yakat rahm laihwi duduwa kidika.
Yamaduduwinih, manna muih namangna kauh yuyulwa balna kidika,
datanangkat tikini manataihnin-awaski namangnakauh yuyulwa kidika yulni,
8kat sihm asna banibil kasna kapat karang,
dawak bik asna as banibil kasna kapat.
Kaunah minit bayakki kidika laih ban kaput atnin karang,
dawak laihtik yaknik kidika laih ban kaput karang.”
9Sahmuhta, sahmuhta, Dawan tingni,
parasma dutah;
sahmuhtah ma balna bayakna yakat yamnaman dai kaput,
ma mahni balna bayakna yakat.
Man lawa Rahab#51.9 Rahab: talah Job 9:13 kau ulna yakat. yakat īnaman dai, kuma paskau di dutni taldas dini dai kidika;#Job 9:13; 26:12.
10kuma kidika buhni manah yamnaman dai,
pa kudungni tuhni nuhni kidika,
dawak kuma tuhni dai kidika yakat ta as yamnaman dai
laihwi yakna muihni balna kidika bayakna atninna.#Ex 14:21-22.
11Sihm kaput bik laih Dawan yaklauwi laihwi yakna muihni balna kidika,
Sayan yakat uiwi kakana karang Sayan yakat alasna duwi sarahwinah;
witingna muhnina kidika alasna manah karang;
kidika yakat isningnalak kidika yayakwarang,
dalani dawak kaidinin balna kidika laih disna karang.#Is 35:10.
12“Yang, yang lawik kulnam dulautayang.
¿Wais yakat yamadutamahn? ¿Muih ahal yakat?
¿Muih ahal dauyang muihni balna sihm dibasta kapat balna yakat?
13¿Damawan mayamna kidika damatkahwarang yah,
dawak witing yaklauwi makau kisang, sau yamna kidika?
¿Awar bitik yakat mayukwarang yah,
mataihyang muihni balna ridi kakalwa kidika maīna atnin?
Kaunah ¿angkat sakyah, kulnin daukalnin parasni kidika?
14Kaltaihwakat wauhwa muihni dai kidika,
sirihni laihwi yakna karang ki;
silak uni puksani yakat dauwas karang ki,
dawak bik witing kasnin kidika dis awaskarang ki.
15“Yang laih man Papangma Dawan yang,
yang ayangki laih Dawan parasni nuhni;
yang lawik kuma kidika isihting kat
lalamwa balna kidika parasni yulna dai,
16panuhni yamnayang#51.16 Panuhni yamnayang: sara kau uhulna kidika kaput uhulna dai. Hibru kau laih yulwi dahnayang. makau kisang kidika,
dawak sau bik yamnayang.
Yang lawik man tampas yakat yulki balna kidika ānayang
dawak yang tingki kau namatdaknayang.
Sayan yakat kalyulnayang: ‘Man laih yang tawanki man.’ ”
17Sahmuta, sahmuta,
Jerusalén, lawah.
Man wauhnaman, Dawan kulnin daukalna kidika
sihm muih as sutak kau di diwa kapat,#Jr 25:15; Rib 14:10; 16:19.
dawak bik bitik diwa kapat,
diwi wanisak dauwa kapat.
18Walamabis balna bitik dunaman pasyakat,
as bik diski ta namangkanin;
muhnaman balna bitik pasyakat,
as bik diski tingma yakat laihwi maduwi kiunin.
19Adika di dutni bu kidika man namang yakat kaina:
man sauma kidika bitik laih daukakalna dawak dini balna kidika yakwi duduna,
dawak muihma balna kidika laih yuh kau dadauna war kal babauwakat.
¿Wais man yakat mamakun matalwarang yah?
¿Wais walama āwarangyah?
20Sihm kauhmak wanilang laihnin dini pasyakat bukna kapat ki,
walamabis balna kidika parasnina diski,
ahni ta kung yakat kalangna bangbangki,
Dawan kulnin daukalna kidika dihina,
Papangnina barangni diyakwa yulni.
21Kidika bahang, tawan nuhni,
man yamni-awasman kidika, adika dakah,
man wasak daunaman kidika, kaunah man wain laih ditasman;
22man Papangma dawak Damawan,
man tawanma yulni tanit dakwa kidika yulwi:
“Man tingma kaupak sunitak kidika dakyakki,
kat dita wasak daunaman bahang,
baisa yang annayang sunitak kaupak watta ditas awama.
23Yang lawik diana awaki,
man yakat dutni mayayamna muihni balna yakat,
aput mayuyulwa dai kidika:
‘Alangwa, man mamat munah bayakdarang matwadai kidika’;
dawak man sau yakat alangwanaman dai,
sau yahamni kapat ma-atakna atnin.”
Currently Selected:
Isaías 51: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
