Isaías 46
46
1Dawan dauh Bel kidika limbabahwi,
dawak dawan dauh Nebo kidika sau yakat bukwi.
Dawan dauh balna kidika aras minit yakat ilwi duwi uiwi,
dawakat tikikini ki didauh di trukyang balna niningna yakat.#Jr 50:2; 51:44.
2Dawan dauh balna kidika lamwi sau yakat bubukwi,
dawak sip kal-laihwi yakwas ki,
dawak witingna bik laihwi pa ūk yakat duwi uiwi.
3“Jacob sulani balna yadakanauh,
Israel tawanni muihni balna sutni wawatna bangkidika:
Yang manatruknayang batahndatasmana kaupak;
yang tingki yakat manadutik yawanayang,
4dawak manna muihbararak kaltanama bik yang laih ban awaki ki;
basmana pihna karang bik ban manalaihtik manaduta awaki.
Yang manayamnayang, bahang ban manatrukki ki;
kaput bik laih manadulautik manalaihtik yakna awaki.
5“¿Manna, wais karak sipyah yalibitta talnamna?
¿Manna kultamana kidika wais kapatyang?
6Muih manas paninakit kaupak gol yayakwi,
dawak lalah kidika paun ahawi;
dawak tingkau diyamyang balna yakat papakwi dawak dauh as yamwi diana atnin,
kaput laih kidika yakat limbabahwi minitna yulna atnin.
7Salahnina yakat trukwi duwi uiwi;
dawak di minityakat ilsasakwi,
bahang yakat watwi sip kalitikwas ki pāni kaupak.
Witing yakat sarahwi ilp yuyulwarang bik nangnitnalawaski,
dawak bik dilaihwi yakwas karangki kakaida kidika kaupak.#Jr 10:5.
8“Adika dakanauh dutni yamyang balna,
di dauh mana kulnamna yakat kukulwinih, yamni yul kulta talnauh;
9ismangnakattanauh, tanit mani kaupak di balna kalahna kidika.
Yang laih Papangyang, ūk diski Papang;
yang laih Papangyang, yang apat ūk diski.
10Yang lawik yultayang tatuna kaupak,
mani witni balna kat di kalahwarang kidika;
di balna kalahwarang kidika tanit kau uman yultayang.
Yang yultayang: yang yamnik dini balna kidika kat kalahna karang;
di balna yamnik kultayang balna kidika bitik yamkiki.
11Ma kilwa kaupak muih al as kainin kalyulnayang,
sihm uhu yakat kapat kaiwarang ki
bahang witing yaklauwi yamnik balna kidika yamna karang.
Yang yultayang kaput yamna awaki,
yang warkki balna ānayang sakkidika kaput yamna awaki.
12Dakanauh muih dudutni balna,
kultamana laihwi yaknin kidika naikau sakki;
13Yang yamtayang yaihkit yakat kainin laihtik yaktayang warkni kidika;
yang laihtik yaknik kidika laih laihwatwas ki, naikau awaski.
Yang lawik Sayan yakat laihwi yaknin kidika kalaki,
dawak yang lawik Israel yakat kalaki ayangni nuhni atnin kidika.
Currently Selected:
Isaías 46: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
