Hibru 5
5
1Sumalyang nuhni kidika bitik laih muih al paskaupak walwi yakwi, bahang ayangni pakna ki Papang muhni yakat kiunin, minitdis dini kalanin dawak bik muih dutni yulni sakripais yamnin. 2Dawak sumalyang laih muih yudutni kalahwa kidika kallaihwa bahang, miniknakun talnin sipki di amanglalawas ta disna balna kidika yakat bik; 3dawak witing silp yudutnina yulni sakripais yamnin ki dutnina yulni, sihm tawan dutni yamna balna kapat.#Lv 9:7. 4Muih as bik sip adika risnipik laihwi duwaski, kaunah Papang yaklauwi yulwak kiwak kalanin risnipik kidika, Aarón kau kalana kidika.#Ex 28:1. 5Sihm kaput bik laih, Krais kidika witing silp sumalyang nuhni kawasdai, kaunah Papang yaklauwi kidika risnipik kalana, kat witing kuduh kalyulna:
“Man laih yang walakibisman;
warmani mayaknayang.”#Sal 2:7.
6Dawan Ulna pīsni ūk yakat bik kalyulna:
“Man laih sumalyang kidika ban man,
sihm Melquisedec kapat.”#Sal 110:4.
7Krais kidika sau akat likkat, witing yulni parasni dawak minikwas karuk minityulna Papang kau, witing parasni duwi daunin kaupak laihwi yaknin;#Mt 26:36-46; Mk 14:32-42; Lc 22:39-46. dawak witing yulni dakawi yamwa kidika yulni laih, Papang dakana. 8Kaput bahang Krais laih, witing Walanibis dai karang bik, dalani wauhwi lankalna yulni dakawi yamnin kidika;#Mt 26:39; Jn 10:18; Fil 2:8. 9dawak kaput yamwi barangni kalwi, witing munah laihwi yaknin kidika kalahwi kaina yulni dakawi yayamwa muihni balna bitik yakat, 10dawak Papang yaklauwi sumalyang nuhni pakna, sihm Melquisedec kapat.
Kasak kulnin lani kidik daninyamadangni kidika
11Di manas yulnin dudi adika yulni, kaunah dadasni ki lāih yakwi yulnin laih, kat manna laih sip sirihni di amanglatasmana bahang. 12Ma mahni bayakna bahang, manna laih uman maestro kalnamana atnin ki; kaput kaunah nidmana watwi tanka lāih yakwi manayulnin Papang isi sumalna balna kidika. Parasmana dis kalnamana, di dadasni balna kasnamna dai kidika waralaih tāwas dinin yultamana. 13Tāwas didiwa balna kidika laih sihm muihbinina kapat ki, la barangni bik sip yayamwas ki.#5.13 La barangni bik sip yayamwas ki: satuk wirlanin sipki: muih lanina yamni yamnin sip awas.,#1 Kor 3:2. 14Kasnin dadasni balna kidika laih muihbararak balna dinina, muih lani yamnin sip balna kidika, kat uman amanglalawa bahang di dutni dawak yamni kidika bik.
Currently Selected:
Hibru 5: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
