Hibru 13
13
Amput Papang dukih kalawa kidika yamnin
1Biri biri dalani kaltalnin kidika dadawinih kalwirah kapat. 2Manna ūmana yakat muih uiwa balna kidika kulnamna yamni dutanauh, kaput laih, manna amanglatasmana kat, as as laih insal balna bik kawi payayahna.#Gn 18:1-8; 19:1-3; Rom 12:13; 1 Pi 4:9.
3Silak muihni balna kidika bik ismangnapuk awanauh, manna bik witingna karak silak yakat mana kapat awanauh. Dutni diyayamna balna yakat bik kultanauh, kat manna bik sihm kaput atnamna sipki.#13.3 Kat manna...sipki: satuk wirlanin sipki: sihm manna muihmana yakat kapat.,#Mt 25:35-46.
4Marid lani kidika rispik dutanauh, marid lani yakat maisihnidis awanauh; kat Papang yaklauwi lanina yamwarang lā munah kalduduwas kidika, dawak lā babahwa kidika balna bik.
5Lalah dalani tatalwinih;#1 Tim 6:6-10. dutamana kidika karak ismangnalak awanauh, Kat Papang yulna bahang: “Madatas awakiki, dawak marumhtik bik datas awaki.”#Dt 31:6,8; Jos 1:5; Fil 4:11-13. 6Kaput bahang makulnik ādi dudi yulnin sipki:
“Dawan laih yang ilpki ki,bahang yamadutas awaki.
¿Muih al kidika ais yayamnin sipyah?”#Sal 56:3-4,9-11; 118:6.
7Ismangna kattanauh wais balna tamanatuna kakana kidika, dawak Papang yulni manasumamalna kidika; kulta talnauh sangninaka kidika amput dahnkalna kidika; bahang witingna yakat talnauh amput kasak kukulna dai kidika.
8Jisaskrais laih sihm ki, damai, warmani, dawak ban kaput ki. 9Sumalnin satuk balna yakat datanangkat manadukiunin awaski. Tanit yamni ki makulnik kidika Papang dalani lani duwa yakat parasni kalwarang kat, kasnin dini balna lani kidika laih sip di yamni as dudas ki.
10Mayang laih sakripais busnin pāni as dudi, kidika kaupak sumalniyang balna holi pāni umani yakat wark yayamwa balna kidika sip kakaswaski. 11Kat sumalyang nuhni kidika tinglau āni kidik duwi kiwi holi pāni yakat, minitdis kalanin dini as muih dutni yamna kidika yakpamnin yulni, kaunah dinimuihni kidika laih busna ki ū lababanni kidika kaupak ahni naikau.#Lv 16:27. 12Kaput bik, Jisas kidika tawan kaupak ahni yakat dauna, kaput laih muih balna kidika witing dini kalna atnin āni utuhna kidika kaupak. 13Kaput bahang Jisas karak mawang, ū lababanni kaupak ahni yakat, dawak sihm rispik dis lani kidika wauhdang, witing wauhna kaput. 14Adika sauni akat tawan nuhni as dismayang ban kaput atnin, kidika bahang matakit kau tawan nuhni kidika waldi mawi. 15Kidika bahang mayang ban Papang ayangni nuhni yamnin ki Jisaskrais munah. Adika ayangni nuhni yamnin laih sakripais yamnin kidika ki. ¡Mayang matikpas kau ayangni nuhni yamdang!#Lv 7:12; Sal 50:14,23; Os 14:2. 16Di yamni yamnin dawak muih ūk yakat di duda kidika yunin kidik madikitkahnin awaski; kat kidika sakripais kuduh Papang dukih kalawa kidika.
17Tamanatuna balna yulnina dakanauh dawak witingna dinitna yakat awanauh, kat witingna laih wingninata pupuhwas mainmanatatalwa bahang, kat amanglalawi Papang yakat uiwi yuyulwarang bahang ais yayamna kidika. Wark yamni kidika kultanauh kaunah asalni kidika laih awaski, nawatnikauh karang kat manna namangna yakat di as diskarang ki.
18Yangna yulki mamatnayultanauh, yamni amanglatayangna kulnikna kidika klin dutayangna, kat di bitik yakat yamni manah atnin kultayangna bahang. 19Tanit yamni as mamatnayulnin yultayang, watwi yāwak manna karak atnik kidika, sirihni.
Blisdiyamna dawak mahka witni yulni balna
20Kulnin aslah lani Papangni, witing Madakiwan Jisaskrais dauna kaupak watwi dulauna kidika, Sīp Maintalyang Nuhni as kidika,#Is 40:11; Ez 34; Lc 15:4-5; Jn 10:1-16. witing āni karak aslah ban atnin kaput yamna kidika,#Ex 24:8; Hib 10:29. 21witing yaklauwi yamni barangni manayamna karang di bitik yakat, witing kulnin lani yamnamna yulni; dawak witing ais maiyamnin kulwa kaput maiyamna karang, Jisaskrais munah. ¡Alasna yaksihni kidika ban karang Krais yakat! Amén.
22Wirah balna, kalmana dinit yakat buktik yultayang, adika dini kulnamna laihwatna karuk laihta dutanama, wingmanata dunamna yulni bin buas manasihtayang adika. 23Manna dakanauh mawirahki Timoti laih uman pri kalahna; sirihni kiwarang kat, manatalna yawaki yakat dutik yawaki ki.
24Tamanatuna balna bitik yultanang pararaswang, dawak holi tawanni kidika bitik. Italia muihni balna manaparasnin sisihwi.
25Papang tingnikih kidika manna mamatna yakat utuhwang.
Currently Selected:
Hibru 13: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
