Génesis 41

Fero amana talna kidika José yaklauwilāih yakwi kalyulwi

1Kurih bu bayakna dai. Ma as kat Fero witing amana talna, bahang witing kidika Nilo wasnikung yakat yaklauna sakdai, 2dawak was paskaupak turuh salalani tiaskaubu kalalahna, dawak dibasta kakasna junco walsah yakat. 3Kidika balna usnitna yakat turuh dutni ararakni tiaskaubu waspa kaupak kil'kalalahna waskung yakat, as balna kidika yaihnitna yakat uina. 4Usnit kat turuh dudutni ararakni balna kidika yaklauwi turuh yamni salalani tiaskaubu balna yakat kasmumukna.

Dawak Fero witing sahmuhna, 5kauna watwi kamana dawak amana ūk talna: witing talna plawar minik tiaskaubu yayamni bararakna panan aslah kidika kaupak. 6Kidika balna dangnitna kaupak plawar minik tiaskaubu kusulana balna kat kalalahna, kidika laih ma kilwa wingni daihni kidika yaklauwi busna dai, 7dawak adika plawar minik kusulana balna kidika yaklauwi plawar minik yayamni balna yakat kakasna.

Fero witing sahmuhna, dawak witing amanglana kidika laih amana talna dai. 8Kaunah mapiris yakat witing kulnin kidika bahna palni dai, dawak pakna sukia balna kidika bitik uina atnin witing yakat, dawak Egipto kau sins duyang balna bitik. Fero yaklauwi diyulna amana talna kidika, kaunah witingna as bik tanka yakwi kalyuyulwas dadana. 9Kaput dawak wain sutak yakat utuhyang tunan muihni kidika yaklauwi Fero yakat kalyulna:

—Waradika amanglatayang yang dutni yamnayang kidika. 10King, man plawar busyang balna tanina tuna nining yakat kulnam daukalnaman kat dawak man dima yamyang adika bik, albupak silak yakat yanasihnaman dai, kalbauyang balna tanina tuna kau silak ūni yakat. 11Pukta as kat plawar busyang balna taninatuna kidika amana as talna dai, dawak yang bik amana ūk talnayang, dawak amana talnayangna kidika tannika duwadai bupak. 12Kidika pāni yakat hibru wahma as sakdai, bahang kidika laih kalbauyang balna taninatuna dini yamyang dai, dawak witing yakat kalyulnayangna dai amana talnayangna kidika, dawak witing yaklauwi tanka lāih yakwi yanayulna dai. 13¡Dawak, witing amput yanayulna dai yakat kalahna! Yang wattik warkki kidika dunayang, dawak as kidika laih wah kau sitwi ina.

14Kaput dawak Fero yaklauwi José yakat yulna kiuna atnin witing yakat, kaput laih kidika minitni silak kaupak yayakna. Kaput laih José kidika basni dadakna, prakni ūk ahana, dawak Fero muhni yakat kiuna. 15Dawak Fero yaklauwi kalyulna:

—Yang amana as talnayang kaunah muih as bik diski tanka lāih yakwi yayulnin, kaunah yang dakanayang, man amana as dakama kat tanka lāih yakta yulnin sipman.

16José biriwi kalyulna:

—Kidika laih yang kaupak laih awaski; kaunah Papang yaklauwi king yakat tanka lāih yakwi kalyulna karang man yamni atnam kidika yulni.

17Dawak Fero yaklauwi José yakat kalyulna:

—Amana talnayang kidika laih, yang Nilo wasnikung yakat lawana sakyang dai, 18dawak was paskaupak turuh salalani tiaskaubu, nunuhni salalani yayamni kalalahna dawak dibasta kakasna. 19Kidika balna usnitna yakat turuh ūk tiaskaubu, dutni ararakni palni kalalahna. ¡Yang kaput palni yang talas yang dai Egipto yak! 20adika turuh yayal ararakni wayakani balna kidika yaklauwi turuh salalani balna yakat kasmumukna; 21kasmumukna kaunah muih as bik amanglawasdai kat ararakni kidika bandai bahang sihm muhnilau dai kapat.

“Sahmuhnayang, 22dawak wat amana ūk talnayang, kidika laih plawar minik tiaskaubu nunuhni yayamni bararakna sihm panan aslah yakat. 23Kidika usnit yakat plawar minik ūk bararakna kaunah kususuni dai, kidika laih makilwa wingni daihni kidika yaklauwi busna dai. 24Adika planiwar minik kususuni balna kidika yaklauwi kakasna plawar minik yayamni balna tiaskaubu yakat. Adika yang lawik sukyah balna yakat diyulnayang, kaunah witingna as bik sip adika tanka yayulwas dadana.

25Kaput laih José yaklauwi Fero yakat nangnitlana:

—King man amana bu talnaman kidika laih sihm dini yakauna ki. Papang yaklauwi mayulna, witing di balna yamwarang kidika. 26Turuh yayal yayamni nunuhni tiaskaubu talnaman kidika laih kurih tiaskaubu ki. Dawak plawar minik yayamni talnaman kidika bik sihm dini kidika ki. Amana talnaman kidika laih sihm aminin kidika kauna ki. 27Turuh yayal ararakni dawak wayakakani as balna dangnitna kaupak kilwi kalalahna kidika bik kurih tiaskaubu ki, dawak plawar minik kusuni talnaman kidika bik sihm kaput ki, makilwa wingni daihni yaklauwi busna dai kidika. Kidika laih kurih tiaskaubu di dis karangki. 28Mayultikda kidika kaput ki: Papang yaklauwi king yakat kalyulna witing ais yamwarang kidika. 29Egipto sauni bitik yakat kurih tiaskaubu kaiwarangki di manas palni kalahna karangki, 30dawak kidika usnit yak yuhlakna nuhni kalahwarang kurih tiaskaubu. Egipto sauni yakat di manasdai kidika muih as bik isning aiwas karang ki, kat yuh lakna kidika yaklauwi sauni kidika bitik daukalpamwarang bahang. 31Di dis kalahna kidika laih nuhni palni karang ki, bahang muhnilau di manas dai kidika sainni as bik dis kalna karang. 32King man amana bu talnaman kidika laih sihm dini yakauna ki, kat Papang laih adika dini yamnin ridi kalahna bahang, dawak sirihni palni yamna karang ki.

33“Kaput bang waradika yamni karang king, man lawa muih al as sins duyang muihni kat walmakat, bahang witing kidika adika sauni bitik witing tingni yakat duna karang. 34Bahang king man aput yamtah: kabamint balna atah dawak witingna uiwang, pa balna bitik yakat, dawak Egipto akat di minik kalahwa balna kaupak sahyakna singka kidika ududuhwang, kurih tiaskaubu di minik manas kalahwarang kidika yakat. 35Plawar minik balna kidika bitik ududuhwang, kurih balna yamni kaiwa kidika yakat; dawak pa as kau uduhta, king man maintalah, dawak tawan nunuhni balna yakat uduhwi duwi dawi muih balna yakat bayayahna atnin. 36Kaput laih plawar minik kidika apakna karang, adika sauni bitik yakat, kaput laih kurih tiaskaubu di diskarang yakat muih balna kidika yuh dauna atnin-awas, Egipto akat.

José laih Egipto kabamintni

37Kaput yamnin kidika yamni kapat talwadai Fero, dawak witing yaihnit kau wark kalahyang balna kidika bik, 38kaput laih, fero yakluwi diyulna:

—¿Muih al ūk witing apat yaknin sipyah, Papang spiritni duwa kidika?

39Dawak José yakat kalyulna:

—Muih sinsni sirihni ūk diski man kapat, Papang yaklauwi mana adika balna bitik amanglana atnin. 40Yang ūki adika man tingma yakat karang,#Ap.w 7:10. dawak yang tawanki bitik man yulma dakakana karang. Yang manah man mamat yakat awaki, kat yang laih king yang bahang. 41Talah, yang lawik man kidika Egipto sauni bitik yakat kabamint mahatayang.

Kidika yulwi, 42Fero witing tingni yakat ting-ānin tamp duwadai kidika yakwi, José tingni yakat āna. Usnit kat witing yaklauwi pakna José kidika linin asnina tanit yamni kidika āna atnin, dawak dinimak yakat gol alahni kidika alahna atnin. 43Usnit kat pakwak witing kārni usnit yakat kar ūk kiwa yakat kilna atnin: “¡Tanipas kaupak lāwanang bayakwang!”#41.43 Adika yul as āna kidika tanka laih amangladaski, sipki Egipto yulni atnin. Kidika yakat amput kalahna kidika manah wirlana ki. Kaput laih José kidika Egipto sauni bitik yakat witing tunan kana dai.

44Usnit kat Fero yaklauwi kalyulna:

—Egipto sauni akat muih as bik tingni dulauwas karang man kalyultas man kat.

45Fero yaklauwi José yakat Egipto yulni kau ayangni paknadai: Zafnat-panea, dawak Asenat karak kalawak kalduduna, Potifera walanbis yal kidika karak, kidika laih On sumalniyang dai. Kaput laih José kidika Egipto tani tuna kana. 46Dawak José laih kurih 30 duwa kat Fero Egipto kingni muhni yakat duwi uina.

Kaput laih José witing Fero kaupak kalparaswa dawi mahka kalahwi kiuna, dawak Egipto sauni bitik yakat awaihwi talna. 47Sau kidika di minik mahni palni yakna, kurih yayamni tiaskaubu pasyakat, 48dawak José witing plawar minik kidika sauni yakat kalahna kidika bitik uduhna kurih 7 kidika pasyakat; dawak tawan nunuhni balna yakat apakna, dawak tawan nunuhni yaihnit kau di minik balna uduhna kidika, sihm kidika tawanni nunuhni balna yakat uduhna dai. 49José witing plawar minik uduhna kidika laih sihm kuma kauhnimak kapat mahni uduhna dai. Plawar minik kidika uba mahni bahang witing sip kulwas danadai, kat ampus bang kidika sip-awas dai kulwi talna atnin, uba mahni.

50Yuh lakwas tanit kauh José witing walabis bu duna dai yalni Asenat karak. 51Walambis tatuna kidika laih ayangni paknadai Manasés,#41.51 Hibru kau, Manasés kidika yulni tanka laih dinitkahnin sihm kapat paruh yulwi. kat aput yulna dai bahang: “Papang yaklauwi yāyamwak wauhnayang balna kidika bitik dating dikitkahna, dawak kaput bik wanaihki balna bik dikitkahna.” 52Dawak kidika kaupak usnit yakna kidika laih ayangni pakna Efraín,#41.52 Hibru kau, Efraín kidika yulni tanka balna laih walabis yaknin kidika awaskat minik yaknin sihm kapat paruh yulwi. kat yulna dai bahang: “Papang yaklauwi yāwak walakibis as dunayang dalani wauhnayang sauni yakat.”

53Egipto yakat kurih tiaskaubu di manas kalahna mani balna dai kidika bayakkiuna, 54dawak kurih tiaskaubu di dis atnin dai kidika uman tunan bahna,#Ap.w 7:11. José yulna dai kidika kaput. Sau balna kidika bitik yakat yuh lakna dai, kaunah Egipto yakat manah laihtakat kaput awasdai, kat kidika yakat laih di kasnin kidika bangdai bahang; 55dawak egipto muihni balna kidika mahka yuh dauwi dakawi fero yakat uiwi plawar yuyulna. Dawak Fero yaklauwi Egipto muihni balna yakat diyulna: “Manna José yakat yawa talnauh, dawak witing ais mana yulwarang yakat yamtanauh.”#Jn 2:5.

56Yuh kidika Egipto sauni bitik yakat kawi yaklawakat, José yaklauwi plawar minik puna ūni balna dai kidika bitik laih apahna, Egipto muihni balna yakat di bakanna atnin yulni; kat yuh kidika laih baisa dutni kalwi kiuna bahang. 57Sau ūk balna kidika bitik Egipto yakat uina José yakat, witingna plawar bakanna atnin yulni, kat sau pāni balna yakat as bik di kasnin disdai bahang.

Currently Selected:

Génesis 41: SUMU

Highlight

Copy