Esdras 5
5
Makat yulnin ūni laihwi dulauwi yayamna kidika
1Prapit balna Hageo dawak Ido walanibis Zacarías kauna witingna Israel Papangni Dawan kaupak yul duduna dai kidika yulni Judá dawak Jerusalén muihni ju balna yakat disisihna dai. 2Bahang Salatiel walanibis Zorobabel dawak Josadac walanibis Josué karak, witingna watwi Jerusalén yakat Papang ūni yamnin kidika warkni kalalahna dai, dawak Papang pranipit balna kidika laih witingna karak bangdai, ilp diana atninna yulni.#Hag 1—2; Zac 1:1; 4:6-10; 6:15. 3-4Kaunah Tatnai, witing Éufrates wasni kaupak ma kawa niningkauh sau sahyakna yakat kabamint kawadai kidika, Setar-boznai dawak witingna karak kaltalyang muihni yayamni balna dai kidika karak uiwi aput diyuyulna: “¿Wais yaklau adika makat yulnin ūni adika yamnin manayulnayah dawak tat kau daklana atnin? ¿Adika ūni yayamwa muihni balna kidika ayangnina amputyah?” 5Kaput bik, Papang witing tingni dinit yakat diduwadai ju muihni tunan duduwa balna yakat, kaput laih dadawakat tanitna yakat wark balna kidika yayamwas dai king Darío yakat wauhtaya sisihwakat biriwi disihwak duduwarang kat.
6Éufrates wasni kaupak ma kawa niningkauh sau sahyakna kabamintni kayang Tatnai, Setar-boznai dawak witingna karak kaltalyang muihni yayamni balna dawak Éufrates kaupak ma kawa niningkauh kabamintni dini yamyang balna kauna witingna wauhtaya uhulna kidika king Darío yakat kalsisihna dai, 7-8kidika wauhnitaya yakat aput yulwa dai:
“Yangna dukih yanawi king man muihma nuhni kidika yamni atnam, man yakat mayultayangna yangna Judá sauni dawak Papang nuhni ūni yakat bik yawik talnayangna kidika, kidika laih kipala nunuhni kau dulauwi yayamwi. Waralaih itiknin kidika laih tat kau itikwa bangki, bahang sirihni palni wark kalalahwi dawak wark kidika laih sirihni tanityakat kiwi. 9Ju muihni tatuna duyang balna yakat diyultik dakanayangna wais yaklau makat yulnin ūni kidika yamwi tat kau itikna atnin diyulna pa, 10dawak tatuna duyang balna ayangnina kidika amput pa, ayangnina kidika ulwi king yakat kalyulna atnin. 11Witingna yaklau nangkitnalalana witingna laih kisang dawak sau Papangni kidika yakat ayangni tanit nuhni yayamwi, dawak witingna makat yulnin ūni kidika laihwi dulauwi yayamwi kurih mahni bayakna yakat Israel kingni nuhni as yaklau bitik yamwi yakna dai kidika.#1 Re 6—7. 12Witingna muihninabararak balna yaklau kisang kau Papang sakkidika yakat kulnin daukakalna dai kidika dawak witing yaklau caldeo kaupak Babilonia kingni Nabuconodosor tingni yakat diana dai kidika bik yuyulna dai.#2 Re 25:8-12; 2 Cr 36:17-20; Jr 52:12-15. 13Witni kat Ciro witing Babilonia kingni kana kurihni tatuna yakat, Papang ūni kidika laihwi dulauwi yamna atnin yulna dai.#Esd 1:2-11.
14“King Ciro yaklau Babilonia kau makat yulnin ūni kau gol dawak lalah dini balna Nabuconodosor yaklau Jerusalén kau Papang ūni kidika kaupak duwi Babilonia kau makat yulnin ūni yakat duwi kiuna dai kidika yakwi Sesbasar yakat kalana dai kidika bik yanayuyulna dai, bahang Sesbasar yakat laih kabamint ana dai. 15Ciro yaklau Sesbasar yakat yamnin kalyulna dai gol dawak lalah dini balna kidika dulauwi Jerusalén kau makat yulnin ūni yakat nawatwi dukiwi sihm kidika pāni yakat Papang ūni kidika laihwi dulauwi yamna atnin. 16Bahang Sesbasar laih kiwi Jerusalén kau Papang ūni rahni balna sau paskau kawa balna kidika sau pasyakat ana dai; bahang kidika mani kaupak laihwi dulauwi yayamna, kaunah baisa yamwi yayakwas ki.
17“Bahang waralaih, king man namangyakat yamni kapat talaman kat, man yakat mayuldi Babilonia kingni ūni wauhnitaya balna yakat walta talah rahm king Ciro yaklau Jerusalén kau Papang ūni kidika yamnin yulna pa, dawak king man lawa adika lani amput yamnam kidika yanayultah.”
Currently Selected:
Esdras 5: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
