Ezequiel 19
19
Kulnin kaidana Israel kingni balna yulnina
1“Man, muih al, dauna laniwana adika unbautah Israel kingni balna yakat:
2‘Man nanangma kidika layan yal as dai,
bahang layan balna pasyakat likdai.#Gn 49:9; 1 Re 10:18-20.
Witing pāni yamna dai kidika balna pasyakat,
dawak kidika pāni yakat walanibis balna muhna dai.
3As laih kalawak tanit barakwatna dai.
Witing lan kalna dai di laihwa kidika kaswi bisna atnin dawak muih bik laihwi kasnin.
4Nisan balna kidika dakakana dai witing yamwa kidika;
bahang laihnin dini kau yamwi lalaihna,
pan rahni kau āwi murwi duwi uina Egipto sauni kat.#2 Re 23:30-34; Jr 22:10-12.
5Layan yal kidika talna witing tahanin as duwa dai kidika bitik laih disna,
dawak walanibis ūk dai kidika ilp kalawak barakna.
6Layan barakwatna dawak lan balna pasyakat kiwi kaiwi uina.
Lan kalna dai di laihwa kidika kaswi bisnin dawak muih bik laihwi kasnin.
7King ūni yakat di balna bitik laih daukalwa dai#19.7 King ūni...daukalwa dai: saramani kau uhulna dai kidika kaput yulwi. Hibru kau laih yulwi dawak amanglawa dai tingnimak balna. dawak tawan nunuhni balna kidika bik;
witing parasni sarahwa kidika muih bitik laih diyukwadai.
8Kaput dawak, yaihnitkau tawan balna kidika witing niningkauh yaklalauna;
laihnin dini kidika ririna dawak kidika yakat bukna dai.
9Kaput laih pan rahni kau duwi uiwi ānin uni yakat awi puputna,
dawak Babilon kingni yakat duwi uina;
kaput laih silak ahana, watwi sarahwa kidika muih dakanin-awas yulni, Israel asangnipas yakat.#2 Re 24:8-15; Jr 22:24-30.
10‘Nanangma laih wain#Is 5:1-4; Jr 2:21. as waskung yakat dahna kapat dai,
nuhni sangni yamni dawak minik bik yamni yakwi,
was yamni duwa kidika yulni.
11Tingni rahni balna kidika dadasni kakalna dai dawak king balna tulninanah kakalna,
dawak baisa barakna kaput laih mukus kat kilwi kana.
Tanit yamni kalna naini dawak sangni yamni nuhni kidika yulni, tingni balna.
12Kauna laihwi iswi dudutna dai kulninna anna parasni karak,
dawak sau yakat ruhm'lalakna.
Ma kilwa kaupak wing kaiwa kidika yaklauwi kusulana#Jr 52:1-11; Ez 17:7-13. dawak wainni minik balna kidika bubukna;
tingni rahni dadasni balna dai kidika buhlana dawak kuh pasyakat ruruhmna.
13Waralaih kauhmak wanilang yakat dahna ki,
sau buhni was dis pāni yakat.
14Tingni rahni balna kaupak kuhpau kalahwi sulani ukuswa balna dawak minik balna kidika buswi.
Tingni rahni dadasni balna kidika uman dis kalna, king balna tulninanah duna atnin.’ ”
(Adika laih muih dauwak nunin laniwana dawak muih dauwak nunin laniwana kapat yusyamna karang.)
Currently Selected:
Ezequiel 19: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
