Ezequiel 17
17
Wain dawak yakalnuh karak
1Papang yang akat kaiwi, yayulna: 2“Man muih al Israel yakat di as karak kallibittah. 3Kalyultah:
‘Adika Papang yulwi:
Yakalnuh nuhni as Líbano yakat kiuna;
lawani kidika nunuhni dai, butuni manh duwa dai dawak mapla satni duwa
4dai. Suhun sutni as kau laihna,
dawak tingnirahni tanit maluihni kidika dakyakna,
dawak duwi kiwi, di wauhwi bakanyang balna saunina yakat dahna,
dawak tawanni nuhni kidika laih di wauhwi bakannin kidika manas dai.
5Usnit kat, sau kaupak di minik bin as duna,
bahang kidika laih pa as di dadahna pakkat yakat dukiwi dahna,
waskung kau, bahang was manas dai.#17.5 Waskung kau, bahang was manas dai: wirlana ūk yakat sipki aput wirlana atnin: was manas kung yakat dahna simh kahas kapat.
6Di minik dai kidika pitwi kalahna,
dawak wain panan as nuhni yamni dai, naini palni awasdai, tingni sutni balna kidika laih yakalnuh niningyakat yuna dai,
dawak rikni balna kidika laih sau yakat kalawak kawi kiuna.
Wain panan as kalna dai;
sulani balna yakna dawak tingni rahni balna bik kalahna.
7Kauna yakalnuh ūk likdai, lawani nunuhni dawak butuni mahni palni.
Wain panan kidika rikni balna duna, dawak tingni rahni balna kidika yakalnuh niningyakat yuna, baisa was lanin yulni, kat kidika kaupak naikau dai.
8Kaput kaunah, sau yamni kat dahna sakdai, was manas yaihnit yakat, kidika yakat sip dai tingni rahni manas yaknin dawak minik bik manas yaknin, kaput laih wain panan yamni nuhni as kalna atnin.’
9“Kalyultah yangkaupak:
‘Adika Papang yulwi:
Adika wainni laih nuhni kalwas karang.
Tatuna yakalnuh dai kidika yaklauwi rikni balna iswi dutwarang, dawak kalyamwak minik balna buk'uiwarang;
parasni yakwas, dawak muih bulah kalahwi rikni balna iswi dudutwarang, dawak sulani balna kalahwa bangdai kidika laih kusulawarang.
10Watwi pa ūk yakwi dadahwarang bik ukuswas karang, ma kilwa kaupak wing wauhwakat kusulawarang;
ukusnin dai kidika pāni yakat kusulawarang.’ ”
11Papang, yang akat kaiwi yayulna: 12“Yul dakawas muihni balna diyulta dakah, adika yulni amanglawapa. Diyulta: ‘Babilon kingni kidika Jerusalén akat kaiwi Judá kingni yakat laihwi silak āna, dawak tunan muihni balna yakat bik, kaput laih duwi kiuna Babilon yakat. 13Usnit kat king walanibis al askat laihwi pramis yamna witing karak, dawak taihwi kalyamna witing muhni yakat barangni atnin, dawakat usnitkat muih nunuhni balna bitik laihwi duwi kiuna dai 14Judá sauni kidika parasni dis atnin yulni, yaklaunin bik sip-awas atnin, pramis kidika yakat yamnin kulwa karang bik. 15Kauna king walanibis al dai kidika Babilon kingni nining yakat yaklauna#2 Re 24:15-20; 2 Cr 36:10-13. witing ayangni kau muih yakwi sihna Egipto yakat aras yulna atnin, dawak muih bik mahni yulna atnin. ¿Manna kultamana laih kidi bitik usnit kat, kiri yaklawarang kultamanah? ¿Kiri yaklawarang kultamanah muih as pramis kat yamwas kidika? 16Yang, Papang yang kat, sangkika kau yaktik yultayang Babilon yakat dauna karang pramis as yamdawi sarahni yamna kidika, king witing yaklauwi king yalahnin pāni yakat kalana dawak pramis kat yamwas dana kidika. 17Babilon kingni kidika yaklauwi kalbauwi, tawan nuhni daklana yaihnit yakat sau uhwi ilwi, dawak muih mahni iwakat, fero laih kalbauyang muihni balna sihwas karang ki, 18kat witing laih pramis yamna kidika yakat sarahni yamna, pranimis kat yamwas dana, yamnin yulna dai bik, dawi aput kau yamna. Kaput bahang sip kiri yaklawas karangki.
19‘Yang, Papangyang kat sangkika kau yaktik yultayang: witing yang kau pramis yamna dai kidika sarahni yamna, pranimis kat yang kau yamwas dana; kidika bahang yang witing yakat minit kalyulki ki. 20Waspa laihnin dini kidika witing minit yakat ruhmna awaki, kaput laih witing kidika laihna awaki kidika dini kau; Babilon yakat duyawaki dawak kidika yakat lani yamki, yang kau barangni-awas dai bahang.#Jr 37:1-2; 52:4-11; Ez 12:13. 21Witing kalbauyang tanit yamni duwa kidika#17.21 Kalbauyang tanit yamni duwa kidika: sāra mani kau ulna kidika kaput yulwi. Hibru kau laih yamaduwi kirayang balna dawak kalbauyang balna bitik yakat. dadauna karang kalbaunin yakat, dawak dauwas yaklalawarang balna kidika laih wing sutni arungka yakat rani sihna karang. Kaput laih manna amanglatanama, yang Papangyang kidika yulnayang.
22‘Yang, Papangyang kat yultayang: suhun tuna tanit maluihni kidika duki ki; tingni rahni tanit maluihni kau udungni batani kidika dakyakna awaki, dawak yang palni dahna awaki asang tanit maluihni yakat, 23Israel asangni tanit maluihni yakat. Tingni rahni balna yakwarang, dawak minik bik yakwarang, kaput laih suhun tanit yamni kalahna karang. Dawak tinglau, asangpas dini#17.23 Tinglau, asangpas dini: grik kau laih kaput ulna. Kauna Hibru kau laih kalahwas ki. satni balna bitik kidika dinit yakat aiwarang yalahna atnin, uhu satni balna bitik aiwi tingni rahni yakat ūnina yayamna karang. 24Dawak pan nunuhni balna ūk kidika amanglalana karang yang kidika Papang- yang. Pan nuhni as witing manah kapat kaldakawa kidika yang lawik tuklaktayang, dawak pan dibin kidika kalating barakwi. Yang lawik pan sangni yamni kidika kalating buhlawi, dawak pan buhlana kidika kalating sanni yamni kalwi. Yang, Papangyang kat yultayang, dawak kidika kaput yamtayang.’ ”
Currently Selected:
Ezequiel 17: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
