Éxodo 32
32
1Israel balna tatalwak Moses kidika bainah yaklakkaiwas kat asang kaupak, Aarón yakat uiwi kaluduhwi kalyuyulna:
—Man dawan dauh as yamtang kat matakituna kawi kiwang, kat mayang amangladaski Moses yakat ais as kalkalahnapa, witing Egipto kaupak yanayakna dai kidika.#Ap.w 7:40.
2Dawak Aarón yaklauwi nangnitnalana:
—Manna yalmana balna, walamanabis yayal balna gol tapa ana duduwa kidika duaitanauh dakyakta akat.
3Tapa āna gol duduwa balna dai kidika bitik dakyakwi duwi uina, Aarón yakat, 4witing golni balna kidika duwi arwi dawi, turuh almuk bin wayani as yamna.#Ap.w 7:41. kaput dawak witingna bitik yuyulna:
—¡Israel, adika kuduh man damawan, Egipto kaupak mayakna kidika!
5Aarón witing talwi dawi, turuh wayani muhnit yakat sakripais busnin pāni as yamna, dawak usnit kat sarahwi yulna:
—¡Yahan mani, Dawan risnipik kau alasna as yamdarang!
6Payahwak, mapiris yaklauwi sakripais karauni kauna bubusna, dawak wanaihni karak watwi yamni kalahnin sakripaisni bik yayamna. Kidika usnit kat tawan muihni balna kidika yalahwi kakasna, didina, kidika usnit kat yaklauwi alasna duduna.#1 Kor 10:7. 7Kaput laih Dawan yaklauwi Moses yakat kalyulna:
—Lawa lakyawah, kat man tawanma Egipto kaupak yaknaman dai kidika diswi. 8Sirihni palni, yang lawik ta niningnakanayang dai kidika kaupak dawi kalalahna. Turuh wayani as gol kau arwi yayamna, dawak kidika yakat minitnayuyulwi, dawak minitdis kalanin dini bik kalalawi; dawak yuyulwi: ‘¡Israel adika kuduh man damawan, Egipto kaupak mayakna kidika!’
9Kidika minityakat Dawan yaklauwi kalyulna:
—Kidika muihni balna yakat talnayang, dawak amanglanayang witingna laih muih dudutni ki. 10¡Waradika laih kulnik aslah yadatah, kulnik uba daukalna, witingna kidika bitik dahnyamki! Kaunah, man kaupak nisan nuhni as yamki.
11Moses laih, witing traiyamna, adika yulni balna karak Dawan kulnin lungna atnin:
—Dawan, ¿ais yamta man tawanma niningyakat kulnam daukalmayah, man lawa Egipto kaupak yaknaman kidika, parasma nuhni kidika kau yakta? 12¿Ais yamta datangkat Egipto muihni balna yuyulwarangyah: ‘Papang kidika kulnin dutni karak yakwi dukiuna, asangpas yakat imukna atnin, sau adika kaupak dismukna atnin’? Kulnam daukalna kidika datah; tawanma yakat kaldaukalnin kulnin dutaman kidika dapamtah. 13Ismangkattah, man dima yamyang balna Abraham, Isaac dawak Israel kidika balna, kidika balna yakat man ayangma kau yakta diyulnaman dai kidika: ‘Manna sulamana balna kidika mahni palni yamki, sihm kisang#Gn 22:16-17. kau yala balna kapat, dawak adika sauni manna yakat mananik yulnayang kidika manaki, manna dimana atnin ban kaput.’#Gn 17:8.
14Dawan, witing tawanni yakat kaldaukalpamnin kulnin duna dai kidika dapamna.#Nm 14:13-19. 15Kaput laih Moses witing mahka asang kaupak yaklakwi kiuna, witing tingni yakat kipala lababanni bu duwi kiuna lā ulna dai kidika, kidika laih muhni nabupak ulna dai. 16Kinipala lababanni balna kidika Papang yaklauwi yamna dai, dawak bik witing tingni palni ulna dai.
17Josué witing muih sararahwak dakawi, Moses yakat kalyulna:
—Ū lababanni balna yakat muih war kalbaunin kidika sararahwi.
18Kaunah Moses yaklauwi nangnitlana:
—Minit bayakna kat alasna duwi sararahwa kapat awaski, kaput bik laih sip-awas dana kat kulninna bukna kat unbabauwa kapat bik awaski; kidika laih unbaunin satuk kat dakayang.
19Moses, witing ū lababanni balna yaihnit yakat kiwi talna turuh almuk bin wayani kidika dawak ububuwa kidika bik, kulnin daukalwi tingni kau kipala lababanni lā ulna dai kidika ruhmlakna sau yakat, dawak asang saryakat bahwi bikisni kalna dai; 20kidika usnitkat turuh almuk bin wayani dai kidika laihwi kuhpa yakat ruhm'āna, usnitkat tikwi yahamni yamna, dawak yahamni kidika was minit yakat wauhna; kaput laih Israel balna yakat dipakwak kidika wasni didina. 21Dawak Aarón yakat kalyulna:
—¿Adika tawanni ais mayayamnayah, dawak man dutni nuhni yamnaman kidika?
22Dawak Aarón nangnitlana:
—Yang dakiwan, yang nikingkauh kulnam daukalwinih. Man yamni amanglataman, adika muihni balna laih di dutni kidika yamkih diawa kidika. 23Witingna yaklauwi yayuyulna: ‘Dawan dauh as yamta mayatang takinatuna duwang, kat mayang amangladaski Moses kidika ais kalahnapa, Egipto kaupak yanayakna dai kidika.’ 24Yang lawik nangnitnalanayang: ‘Wais gol duwakat duaiwang.’ Dawak witingna duahaiwi yayana gol kidika, dawak kuhpa yakat ānayang, ¡dawak adika tuniruh almuk wayani kalahna!
25Moses witing talna, adika tawanni witingna laihwatwas uina, witingna waihninala kidika sarahni diyulna atnin, kat Aarón witing sip barangni awas dana bahang, 26kaput laih, ū lababanni balna kiwi kawa yakat kiwi yaklauwi yulna:
—Dawan karak muihni balna kidika yang akat aiwa kaluduhtanauh.
Dawak libait balna bitik witing yakat uiwi kalududuhna. 27Kaput laih Moses yaklauwi diyulna:
—Dawan aput yulwi, Israel Papangni kidika: ‘Manna bitik isparah laihtanauh, dawak ū lababanni yakat yawanauh, dūr balna yakat yawanauh, dawak manna wirahmana balna kidika, kaltalyang yamni dutamana kidika, dawak yaihmatna kau muih yalalahwa balna kidika bik itanauh.’
28Libait balna kidika Moses yaklauwi dipakna kidika kaput yayamna, kidika mani muih ahal tausin bās kapat dadauna. 29kaput dawak Moses yulna:
—Warmani manna Dawan muhni yakat parasni bitik kidika dutanauh, kat manna buas mana kat walamanabis, dawak wirahmana niningkauh lawanamana bahang. Kaput bahang warmani Dawan yaklauwi blisin manawi.
30Kidika payahwak, Moses yaklauwi muih balna yakat diyulna:
—Manna dutni nuhni as yamnamana. Waralaih Dawan sakyakat ilwik yawinikki, sip karangpa manna dutmana kidika dawak disnin.
31Kaput laih Moses watwi kilwi kiuna Dawan sakdai yakat, dawak kalyulna:
—Rahm palni laih tawan kidika dutni nuhni as yamna, dawan dauh as gol kau yamna kidika. 32Man kalma dinit yakat buktik yultayang dutni datang diswang; kaunah man dutnina datang diswas karang kat, ¡yang ayangki wauhtaya kau ulnaman kidika tappamtah!#Sal 69:28; Rib 3:5.
33Kaunah Dawan yaklauwi nangnitlana:
—Yang wauhkitaya kaupak ayangni tappamki, angdika muihni yang nikingkauh dutni yamwa kidika manah. 34Kaput bahang yawah, tawan kidika duyawah mayulnayang pāni yakat. Yang inkisal kidika tāmatuna duwarang. Dawak wah dianik mani kiwi kawakat, yang lawik wah diaki dutni yayamna kidika yulni.
35Dawak Dawan yaklauwi wah as sihna tawan minit yakat, kat Aarón turuh almuk bin wayani yamwi diana yakat minitnayuyulna dai bahang.
Currently Selected:
Éxodo 32: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998