Éxodo 27
27
Sakripais busnin pāni bras kau yamna kidika
(Ex 38:1-7)
1“Sakripais busnin pāni rabutni as yamtah, acacia panan kau, pirini balna kidika aput duwarang, metro bu minitkau centímetro 25 karang, dawak maluihni laih, metro as minitkau centímetro 25 karang. 2Tamni arungka yamtah, sipintang arungka yakat ilnin, kidika balna bitik laih sakripais busnin pāni kidika barangni aslah karang, dawak sakripais busnin pāni kidika bras kau manah kahtah bitik. 3Sakripais busnin pāni kau di yusyamwa balna dini balna kidika bitik laih bras kau manah karang: wan puwa dini, subil, sutak nunuhni, di pawi dulaunin dini, dawak kuh tuturni puwa dini kidika bik. 4Kaput bik laih bras panani kau lakwi par dawi birna kidika as yamma, dawak sipintang arungkapak dini bras kau taihta tuyuyulni yamma. 5Kidika usnitkat bras kau lakwi par dawi birna dini kidika lakma, sakripais busnin pāni dinit kau kungyakat. 6Dawak bik yamma uhrlanin panani balna kidika acacia panan kau, dawak bras kau manah kahma. 7Uhrlanin panani balna kidika sulihni tuyuyulni balna kidika munah uhrlawarang, dawak sakripais yamnin pāni kidika pirini balna bupak yakat dulkarang, kaput laih kidika yakat laihwi dulauwi duwi kiunin. 8Sakripais busnin pāni kidika laih sulihni atnin karang, dawak pan kau yamnin karang, asang kau talnaman kapat yamnin karang.
Holi pāni kidika watakni
(Ex 38:9-20)
9“Holi pāni kidika watakni yamtah. Wadah niningkauh watakni kidika laih asnina rinin kidika linin asnina wirna kidika karang, naini centímetro 45 kidika bitik rina karang. 10Pan ukna balna 20 kidika dawak, rahni balna 20 kidika bitik laih bras kau manah karang, dawak alahnin pāni rahni balna yamna kidika dawak tingni ānin kidika balna bitik laih lalah kau manah yamna karang. 11Sihm kaput bik, tingpal niningkauh yakat, dūr rinin kidika -ana karang, naini metro 45 duwa kidika bitik, pan ukna balna 20 kidika dawak rahni balna 20 bras kau yamna kidika balna bitik yakat, dawak alahnin dini rahni balna dawak tingni ānin lalah kau yamna balna kidika bitik yakat. 12Ma kāwa niningkauh yakat, dūr rinin kidika naini metro 22 minitkau papusbah duwarang, watak panuhni kidika bitik, pan ukna balna salap dawak rahni balna salap kidika yakat. 13Ma kilwa niningkauh yakat, watak panuhni kidika bitik yakat dūr rinin duna karang naini metro 22 minitkau papusbah. 14Kiwi kāwa pirini nakaskauh yakat dūr rinin metro tiaskaubu duwarang, pan ukna balna kidika bās dawak rahni balna kidika bik bās karang; 15dawak nakastawa yakauh yakat bik dūr rinin metro tiaskaubu karang naini, pan ukna balna kidika bās dawak rahni balna kidika bik bās karang. 16Sihm kidika watak kiwi kāwa kau yakat dūr rinin asnina paisa sa kidika āna karang naini metro tiaskauarungka, asna paisa, pauni, dawak linin asnina wirna kidika bik, bahang kidika laih trit kau ulna karang, dawak pan ukna kidika arungka dawak rahni balna kidika bik arungka karang. 17Pan ukna balna bitik kidika watak kungkau, tingni ānin duwa karang bitik lalah kau yamna kidika, dawak rahni alahnin dini balna kidika bik lalah kau yamna karang, dawak ūni rahni balna kidika laih bras kau yamna karang. 18Watak kidika naini duwarang metro 45, dawak panuhni laih metro 22 minit kau papusbah, dawak maluihni laih metro bu minitkau centímetro 25 karang. Dūrni rinin balna kidika laih linin asnina wirna balna kidika karang, dawak rahni ukna balna kidika bras kau yamna karang. 19Di dunin dini balna bitik kidika holi pāni yakat prias yamnin kat, kidika laih bras manah karang, sihm kaput bik pan pararahni subangwi ukna balna kidika, dawak watak kau ukna balna kidika bik
Awas wasni balna kidika
(Lv 24:1-4)
20“Israel balna yakat paktangkat olib salani kidika duahaiwang, awas balna kidika ban dahlwi duna atnin yulni. 21Aarón dawak walanibis balna karak kalpakwi awas balna kidika yayamwarang, kaput laih Dawan muhni yakat ban dahl atnin pukta bitik yakat, Papang karak kalpaknin ūni yakat, pramis baksni kau dahlwa kidika laih ūk karang. Adika laih lā as ban kaput karang Israel balna niningna yakat, dawak sulanina balna kau bik ban kaput karang.
Currently Selected:
Éxodo 27: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998