Éxodo 24
24
Pramis kidika watwi parasni kalana
1Dawan yaklauwi Moses yakat kalyulna:
—Aarón, Nadab dawak Abiú, kidika balna karak ilwa aiwah, dawak bik Israel pasyakat muihbararak balna 70 kidika balna karak bik, yang sakyang akat; kaunah apis nailuih wattanauh, dawak kidika yakat limbabahtanauh. 2Man manah sip awama yaihkit yakat yawanam, as balna kidika laih yaihkit yakat kiunin awas ki, dawak muih balna kidika bik kilwi ainin awaski man karak.
3Moses, witing kiwi tawan muihni balna yakat bitik diyulna dai, Dawan yaklauwi yulna balna kidika, dawak yamnin pakna kidika bik, dawak witingna bitik laih papatni yuyulna:
—¡Dawan yulna balna kidika bitik laih yamtanaki!#Ex 19:8; Dt 5:27.
4Kaput laih Moses witing ulna dai, Dawan yulna balna kidika bitik, kidika payahwakat, mapiris palni yaklauwi asang sar yakat sakripais busnin pāni as yamna dai, dawak kidika yamna kidika laih kipala salap minitkau bu Papang dini yakna kidika lakna dai, kidika laih Israel sulani balna kidika ayangnina kau kulwi as as lakna dai. 5Usnit kat Israel wawahma binina buas sihna dai turuh ahalmuk kidika īna atnin, dawak Dawan yakat sakripais karauni kauna busna kidika yamna atnin, dawak bik wanaihni karak watwi yamni kalahnin sakripaisni kidika bik busnin. 6Moses witing ā kidika papuswayah duwi, sutak nunuhni kau utuhna, dawak papuswayah ūk kidika laih sakripais buswa pāni minit yakat rasna. 7Kidika usnit kat pramis wauhnitaya kidika duwi, tawan muihni balna yakat yulwak dakakana, dawak witingna yuyulna:
—Yangna Dawan yaklauwi yamnin yulna yakat manah talik yamtanaki.
8Kaput laih Moses witing ā kidika duwi muih balna minitna yakat rasna, dawi yulna:
—Adika kuduh Dawan yaklauwi pramis#Mt 26:28; Mk 14:24; Lc 22:20; 1 Kor 11:25; Hib 10:29. as yamna kidika manna karak, kidika yulni balna bitik karang duwi yamwi.#Hib 9:19-20.
9Moses witing asang yakat kilwi kiuna, Aarón, Abiú dawak Israel muihnibararak balna 70 karak. 10Kidika yakat Israel Papangni kidika tatalna: witing kalni dinit yakat di as yaringni pakdai sihm kipala sangni minit nuhni as kapat, dawak bik ingni lāih dai sihm kisang kapat. 11Papang yaklauwi kidika alni balna yakat dutni as bik diyamwasdai Israel ahalni balna nunuhni dikulna kidika yakat, witingna Papang yakat tatalna dawak di kaswi, diwi bik yayamna dai kidika.
Moses Sinaí asangni yakat kilwi kiuna
12Dawan yaklauwi Moses yakat kalyulna:
—Asang akat ilwa aiwah, yang sakyang akat, dawak kidika yakat taki tahatah, kat kipala tatni balna kidika maki ki, dawak kidika yakat lā balna kidika ulnayang Israel balna yakat sumalnin kidika.
13Moses yaklauwi, Papang asangni yakat kilwi kiuna, witing tingnisut laihyang Josué karak. 14Muihbararak balna yakat diyulna:
—Adika pāni akat tākina atanauh, nawattik aiwanaki kat. Akat wawatwi Aarón dawi Hur kidika balna manna karak, muih as niningyakat dutni kalahwarang kat witingna yakat yawanauh.
15Adika yulwa dawi, Moses asang yakat kilwi kiuna, dawak witing kidika mukus kaiwi kalmuklakna dai. 16Dawak Dawan alasnina yaksihni kidika Sinaí asangni minit yakat kaiwi bukna dai, kaput laih ma tiaskauas mukus kidika kaiwi bukna sakdai. Dawak ma tiaskaubu yakat Dawan kidika mukus paskaupak Moses yakat kalyulna dai kiuna atnin. 17Papang alasnina kidika kalahna dai Israel balna miniknapa yakat sihm kuhpau dahlwa kapat, asang tuna tanit maluihni yakat. 18Dawak Moses laih mukus pasyakat kawi kiuna, asang yakat kilwi kiuna, dawak kidika yakat watna dai madah 40, pukta 40.#Dt 9:9.
Currently Selected:
Éxodo 24: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998