Ester 8
8
La ahana kidika laih Ju balna ilpnina
1Kidika mani, king Asuero yaklauwi, Ester yakat dauh kalana Amán ūni dai kidika, Ju balna waihninala, dawak Mardoqueo laih witing king muhni yakat kiuna, kat Ester yaklauwi king yakat uman kalyulna dai Mardoqueo kidika witing papani walanibis. 2Dawakat king tingni anin yakna, Amán kaupak dakyakna dai kidika, dawi Mardoqueo tingni yakat āna. Ester niningkauh laih, Amán dini balna kidika bitik tingni yakat āna maintalnin. 3Usnit kat watwi Ester yulbauna king karak, kalni yakat bukwi kaidīnah yulna Amán lā āna kidika dauhyamna atnin Ju balna niningna kauh lā ānasak kidika yamnin awas. 4King tulninah gol kidika dulauwi Ester niningyakat yuna. Witing yaklauna kalni kau king muhnit yakat 5dawi yulna:
—King man namangyakat yamni kat, dawak yultayang kidika bik kasak barangni kat, dawak king man kidika rahm yakultaman kat, dawak ismang a bik yatalaman kat, wauhtaya as ultah bahang Amán wauhtaya sihna kidik Ju balna bitik iwi dis yamnin yulni pa bitik yakat, kidika lani dauh yamna karang. 6¿Amput yang tawanki minit yakat di dutni bukwa kidika, dawak yang palni wanaihki balna minitna yakat bik kaiwa kidika sip awakiyah wauhna atnik?
7King Asuero yaklauwi nangnitnalana Ester dawak Mardoqueo, Ju al yakat bik:
—Yang lawik kalanayang Ester yakat, Amán ūni dai kidika, dawak Amán laih wahkau sitwi īna ki, Ju balna inin yamna yulni. 8Waralaih yang yultayang manna ulna atnamna yang ayangki kau, manna amput yamni talamana kaput Ju balna ilpnina. ¡Dawak wauhnitaya balna kidika king tampni yakau taihtanauh!
(Wauhtaya as king ayangni ulna, dawak tampni kau taihna kidika sip parasnidis yamwas ki.)
9Ulyang muihni balna king duwa dai kidika sirihni yulwak uina. Kidika mani laih ma 23 dai, waiku bās kana dai yakat, yuldarang kat Siván wainiku yakat, dawak Mardoqueo yaklauwi dipakna kidika bitik uhulna Ju balna yakat, sau sahyakna kau kabamint muihni balna yakat bik, dawak sau sahyakna 127 kidika balna yakat tunan muihni balna bitik yakat, India kaupak Etiopía kat, dawak kidika laih witingna tunina yuyulwa kat kat ulwi sisihna dai. 10Wauhtaya balna kidika king Asuero ayangni kau ulna dai, dawak bik witing ayangni āna dai; king tampni kau taihna usnit kat mahka palni king aras pararasni kirayang duwa kidika kilyang balna karak sihna dai sau sahyakna balna bitik yakat. 11Kidika wauhnitaya yakat king yaklauwi dipakna dai Ju balna yakat, angdik tawanni nuhni yakat witingna yalalahwa kidik bitik laih kaluduhwi sangninaka nanitdadakna atnin, dawak kaput laih, inin, daukalwi disyamnin, dinina balna kidika bitik dunin, angdik angdik tawanni kaupak kalbauyang balna witingna niningna yakat yaklalauwarang kat, kulnin-awas ki yayalkarangpa, dawak walabis karangpa bik. 12Kidika bitik laih ma aslah yamnin karang, king Asuero sauni sahyakna balna bitik kau yakat; mani ahana kidika laih, waiku 12, dawak ma 13 yakat dai, yuldarang kat Adar wainiku yakat. 13Kidika wauhnitaya ulna kidika as kidik lāih yakna atnin dai muih balna bitik yakat, kidika sauni sahyakna balna yakat, kaput laih Ju balna kidika ridi atnin, kidik mani kiwi kawakat waihninala balna kaupak nanitnadakna atnin. 14King anidar, wauhtaya duwi uiwa muihni balna kidika sirihni palni kalahwi uina, witing aniras balna kau dawak kidika lani muih balna niningna kakana dai Susa tawanni yakat bik.
15Mardoqueo king ūni kaupak prak yamni kat kana, kidika laih sangni dawak pihni karak kat, dawak paknin bik gol manah kat pakna dai, dawak linin asnina paisa as kalmuknin dini kat kalmukwi kalahna. Dawak Susa tawanni bitik laih alasna kalahwi sararahna, 16dawak Ju balna niningna yakat laih, yaringni, alasna dawak ayangni nuhni yamnin bik dai. 17Sau sahyakna balna bitik kau, dawak tawan bitik kau kidika king lā āna kidika kiwi kawakat, Ju balna alasna duduna dawak kasnin alasnina yayamna dai. Kidika minit yakat Ju muihni awas balna bik manas ju kakalna, kat witingna laih Ju balna yamaninaduduna kidika yulni.
Currently Selected:
Ester 8: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
